حضرت ابراہیم رحمہ اللہ فرماتے ہیں کہ اگر ایک عقد میں ایک آزاد اور ایک باندی سے نکاح کیا تو ان کا نکاح فاسد ہوگا۔ [مصنف ابن ابي شيبه/كتاب النكاح/حدیث: 18400]

حضرت حسن رحمہ اللہ سے سوال کیا گیا کہ ایک آدمی نے کسی عورت سے شادی کی، اس سے شرعی ملاقات کی پھر وہ مرگیا، پھر اس بات پر گواہی قائم ہوگئی کہ وہ عورت اس کی رضاعی بہن ہے۔ اب کیا حکم ہے؟ انہوں نے فرمایا کہ عورت کو مہر ملے گا لیکن میراث نہیں ملے گی۔ [مصنف ابن ابي شيبه/كتاب النكاح/حدیث: 18401]

حضرت رکین رحمہ اللہ فرماتے ہیں کہ حضرت مغیرہ بن شعبہ رضی اللہ عنہایک عورت کے ولی تھے، انہوں نے اس عورت کو پیام نکاح بھیجنا چاہا، ان کے ساتھ اس عورت کے کچھ ولی اور بھی تھے۔ انہوں نے ایک ولی کو حکم دیا کہ وہ ان کا نکاح اس عورت سے کرادیں۔ [مصنف ابن ابي شيبه/كتاب النكاح/حدیث: 18402]

حسن رحمہ اللہ فرماتے ہیں کہ اگر کسی عورت کے ولی کا ارادہ ہو کہ وہ اس عورت کی اجازت سے اس سے نکاح کرے تو اسے چاہئے کہ کسی آدمی کو عورت کا ولی بنادے اور پھر عادل گواہوں کی موجودگی میں اس عورت سے نکاح کرلے۔ [مصنف ابن ابي شيبه/كتاب النكاح/حدیث: 18403]

حضرت شریح رحمہ اللہ فرماتے ہیں کہ زبردستی کئے گئے شخص کا نکاح نہیں ہوتا۔ [مصنف ابن ابي شيبه/كتاب النكاح/حدیث: 18404]

حضرت مجاہد رحمہ اللہ فرماتے ہیں کہ زبردستی کئے گئے شخص کا نکاح نہیں ہوتا۔ [مصنف ابن ابي شيبه/كتاب النكاح/حدیث: 18405]

حضرت عبدالاعلیٰ رحمہ اللہ سے سوال کیا گیا کہ ایک آدمی نے عورت سے عاجل اور آجل مہر کے عوض نکاح کیا، آدمی نے عورت سے شرعی ملاقات بھی کی لیکن عورت نے یہ دعویٰ کردیا کہ اس نے ابھی عاجل مہر ادا نہیں کیا۔ تو حضرت عبدالاعلیٰ رحمہ اللہ نے فرمایا کہ سعید رحمہ اللہ نے قتادہ رحمہ اللہ کے بارے میں بیان کیا ہے کہ وہ فرمایا کرتے تھے کہ عاجل مہر کے بارے میں ثبوت پیش کرنا عورت کے ذمے ہے کہ مرد پر اتنا اتنا مہر باقی رہ گیا ہے اور مرد کا عورت سے دخول کرنا عاجل سے بری ہونا ہے۔ [مصنف ابن ابي شيبه/كتاب النكاح/حدیث: 18406]

حسن رحمہ اللہ فرمایا کرتے تھے کہ (عاجل مہر کی ادائیگی کا) ثبوت پیش کرنا مرد کے ذمے ہے۔ [مصنف ابن ابي شيبه/كتاب النكاح/حدیث: 18407]

حضرت حمید رحمہ اللہ فرماتے ہیں کہ حضرت انس رضی اللہ عنہ کو اپنے بچے کے بارے میں شک ہوا تو انہوں نے قیافہ شناس کو بلوانے کا حکم دیا۔ [مصنف ابن ابي شيبه/كتاب النكاح/حدیث: 18408]

حضرت عبد اللہ بن عبید بن عمیر رحمہ اللہ فرماتے ہیں کہ حضرت عبد الرحمن بن عوف رضی اللہ عنہ نے اپنی ایک باندی کے رحم کے خالی ہونے کا یقین کرنے سے پہلے اسے فروخت کردیا، پھر خریدنے والے کے پاس اس کا حمل ظاہر ہوا۔ تو یہ مقدمہ حضرت عمر رضی اللہ عنہ کے پاس پیش کیا گیا۔ حضرت عمر رضی اللہ عنہ نے حضرت عبد الرحمن بن عوف رضی اللہ عنہ سے فرمایا کہ کیا تم اس سے جماع کیا کرتے تھے؟ انہوں نے اقرار کیا، پھر پوچھا کہ کیا تم نے اس کے رحم کے صاف ہونے کا یقین کئے بغیر اسے بیچ دیا۔ انہوں نے اقرار کیا۔ حضرت عمر رضی اللہ عنہ نے فرمایا کہ تمہیں ایسا نہیں کرنا چاہئے تھا۔ پھر انہوں نے قیافہ شناسوں کو بلایا، انہوں نے بچے کو دیکھا تو حضرت عبد الرحمن بن عوف رضی اللہ عنہ کا بچہ قرار دیا، پھر اس باندی سے حضرت عبد الرحمن رضی اللہ عنہ کی بہت اولاد ہوئی اور کسی نے اسے برا قرار نہ دیا۔ [مصنف ابن ابي شيبه/كتاب النكاح/حدیث: 18409]