حضرت عطاء رحمہ اللہ سے بھی یونہی منقول ہے۔ [مصنف ابن ابي شيبه/كتاب النكاح/حدیث: 18420]

سوید بن غفلہ رحمہ اللہ فرماتے ہیں کہ اسلاف نکاح شغار کو ناپسند فرماتے تھے۔ شغار یہ ہے کہ آدمی کسی مرد کی شادی بغیر مہر کے اس شرط پر کرائے کہ وہ اس کی شادی کرائے گا۔ [مصنف ابن ابي شيبه/كتاب النكاح/حدیث: 18421]

حضرت عطاء رحمہ اللہ نکاح شغار کے بارے میں فرماتے ہیں کہ ان کا نکاح باقی رہے گا اور دونوں کو مہر ملے گا۔ [مصنف ابن ابي شيبه/كتاب النكاح/حدیث: 18422]

حضرت عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ اسلام میں نکاح شغار نہیں ہے۔ [مصنف ابن ابي شيبه/كتاب النكاح/حدیث: 18423]

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے شغار سے منع فرمایا ہے۔ [مصنف ابن ابي شيبه/كتاب النكاح/حدیث: 18424]

حضرت عبد اللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ہمیں نماز اور حاجت کا خطبہ سکھایا۔ نماز کا خطبہ تشہد ہے اور حاجت کا خطبہ یہ ہے:: تمام تعریفیں اللہ کے لئے ہیں، ہم اس سے مدد مانگتے ہیں، ہم اس سے معافی چاہتے ہیں، ہم اپنے نفس کے شرور سے اللہ کی پناہ چاہتے ہیں، جسے اللہ ہدایت دے اسے کوئی گمراہ نہیں کرسکتا اور جسے وہ گمراہ کردے اسے کوئی ہدایت نہیں دے سکتا، میں گواہی دیتا ہوں کہ اللہ کے سوا کوئی معبود نہیں، میں گواہی دیتا ہوں کہ محمد صلی اللہ علیہ وسلم اللہ کے بندے اور رسول ہیں۔ پھر قرآن مجید کی تین آیات پڑھتے:: اللہ سے ڈرو جیسا کہ ڈرنے کا حق ہے، اور تم اسی حال میں مرنا کہ تم مسلمان ہو۔: اے لوگو! اپنے رب سے ڈرو جس نے تمہیں ایک جان سے پیدا کیا، اور اسی سے اس کا جوڑا پیدا کیا، اور ان دونوں سے بہت سے مرد اور عورتیں پھیلا دیے، اور اللہ سے ڈرو جس کے واسطے سے تم ایک دوسرے سے (اپنے حقوق) مانگتے ہو، اور رشتوں (کو توڑنے) سے بچو، بیشک اللہ تم پر نگہبان ہے۔: اللہ سے ڈرو اور سیدھی بات کرو۔ اللہ تمہارے اعمال کی اصلاح فرمائے گا اور تمہارے گناہوں کو معاف فرمائے گا۔۔۔۔۔۔ یہ خطبہ پڑھنے کے بعد اپنی حاجت کا ارادہ کرو۔ [مصنف ابن ابي شيبه/كتاب النكاح/حدیث: 18425]

حضرت جعفر رحمہ اللہ کے والد فرماتے ہیں کہ حضرت حسین بن علی رضی اللہ عنہ حضرت حسن رضی اللہ عنہ کی ایک لڑکی کا نکاح اس حال میں کروا رہے تھے کہ وہ ہڈی سے گوشت اتار کر کھا رہے تھے۔ [مصنف ابن ابي شيبه/كتاب النكاح/حدیث: 18426]

حضرت نصر رحمہ اللہ فرماتے ہیں کہ حضرت عطاء رحمہ اللہ سے بسم اللہ الرحمن الرحیم پڑھ کر نکاح کرادیا۔ [مصنف ابن ابي شيبه/كتاب النكاح/حدیث: 18427]

حضرت اسماعیل رحمہ اللہ فرماتے ہیں کہ حضرت مسروق رحمہ اللہ نے حضرت شریح رحمہ اللہ کی شادی کرائی لیکن خطبہ نہیں پڑھا اور فرمایا کہ یہ ضرورت پوری ہوگئی۔ [مصنف ابن ابي شيبه/كتاب النكاح/حدیث: 18428]

حضرت عروہ بن زبیر رحمہ اللہ فرماتے ہیں کہ میں نے حضرت ابن عمر رضی اللہ عنہما کی بیٹی کے لئے نکاح کا پیغام بھجوایا تو انہوں نے فرمایا کہ ابو عبداللہ (زبیر) رضی اللہ عنہ کا بیٹا نکاح کا اہل ہے۔ ہم اللہ کی تعریف کرتے ہیں، نبی صلی اللہ علیہ وسلم پر درود بھیجتے ہیں۔ ہم نے اللہ کے امر {إمْسَاکٌ بِمَعْرُوفٍ، أَوْ تَسْرِیحٌ بِإِحْسَانٍ } پر عمل کرتے ہوئے تمہاری شادی کرادی۔ [مصنف ابن ابي شيبه/كتاب النكاح/حدیث: 18429]