حضرت حکم فرماتے ہیں کہ میں نے یہ بات ابراہیم کو بتائی تو انہیں یہ بات پسند آئی۔ [مصنف ابن ابي شيبه/كتاب النكاح/حدیث: 16950]

حضرت ابو عیاض فرماتے ہیں کہ اہل کتاب کی عورتوں سے نکاح کرنا ہمارے لئے حلال ہے البتہ اگر وہ جنگ کررہے ہوں تو ان کی عورتیں اور ذبیحہ حرام ہوجاتا ہے۔ [مصنف ابن ابي شيبه/كتاب النكاح/حدیث: 16951]

حضرت حکم فرماتے ہیں کہ کچھ اہل کتاب ایسے ہیں جن کی عورتیں اور ذبیحہ ہمارے لئے حلال نہیں۔ وہ اہل کتاب مسلمانوں سے جنگ کرنے والے ہیں۔ [مصنف ابن ابي شيبه/كتاب النكاح/حدیث: 16952]

حضرت عبید اللہ بن عبد اللہ بن عتبہ، حضرت سعید بن مسیب اور حضرت عروہ بن زبیر نے اہل کتاب کی عورت کے بارے میں فرمایا ہے کہ اگر وہ ارض حرب سے نکلے تو ارض عرب میں امان کے ساتھ داخل ہوگی۔ اگر وہ ارض عرب میں سکون ظاہر کرے تو مسلمان کے لئے اس سے نکاح کرنے میں کوئی حرج نہیں۔ اگر وہ صرف پیغام نکاح کی صورت میں سکون ظاہر کرے تو اس سے نکاح نہیں کیا جائے گا۔ [مصنف ابن ابي شيبه/كتاب النكاح/حدیث: 16953]

یہی بات حضرت سعید بن مسیب سے بھی (عمرو بن سلیم زرقی کی سند سے) منقول ہے۔ [مصنف ابن ابي شيبه/كتاب النكاح/حدیث: 16954]

حضرت عروہ بن زبیر سے منقول ہے کہ ان حضرات نے اہل کتاب کی عورت کے بارے میں فرمایا کہ جب وہ ارض حرب سے امان لے کر ارض عرب میں داخل ہو، اگر وہ ارض عرب میں ٹھہرنے اور بس جانے کا اظہار کرے تو مسلمان کے لئے اس سے نکاح کرنے میں کوئی حرج نہیں، اور اگر وہ اس کا اظہار صرف پیغام نکاح کے وقت کرے تو اس سے نکاح نہیں کیا جائے گا۔ [مصنف ابن ابي شيبه/كتاب النكاح/حدیث: 16955]

حضرت ابو میسرہ فرماتے ہیں کہ اہل کتاب کی باندیاں ان کی آزاد عورتوں کی طرح ہیں۔ [مصنف ابن ابي شيبه/كتاب النكاح/حدیث: 16956]

حضرت حسن فرماتے ہیں کہ اس امت کے لئے اہل کتاب کی آزاد عورتوں سے نکاح کرنے کی اجازت ہے ان کی باندیوں سے نکاح کرنے کی اجازت نہیں۔ [مصنف ابن ابي شيبه/كتاب النكاح/حدیث: 16957]

حضرت مکحول نے اہل کتاب کی باندیوں سے نکاح کو مکروہ قرار دیا ہے۔ [مصنف ابن ابي شيبه/كتاب النكاح/حدیث: 16958]

حضرت مجاہد قرآن مجید کی آیت { مِنْ فَتَیَاتِکُمَ الْمُؤْمِنَاتِ } کی تفسیر میں فرماتے ہیں کہ آزاد مسلمان کے لئے مناسب نہیں کہ وہ کسی اہل کتاب باندی سے نکاح کرے۔ [مصنف ابن ابي شيبه/كتاب النكاح/حدیث: 16959]