حضرت عمر بن عبدا لعزیز نے اپنے ماتحتوں کے نام خط لکھا کہ جب آدمی اپنی بیوی سے ازدواجی تعلق قائم کرلے تو معجل اور مؤجل مہر واجب ہوجاتا ہے۔ البتہ اگر مؤجل کی شرط لگائی ہو تو پھر واجب نہیں ہوتا۔ [مصنف ابن ابي شيبه/كتاب النكاح/حدیث: 16960]

حضرت ابراہیم فرماتے ہیں کہ اگر کسی آدمی نے عورت سے آسانی سے مہر ادا کرنے کی شرط لگائی تو مہر کی ادائیگی موت یا جدائی پر فرض ہوگی۔ [مصنف ابن ابي شيبه/كتاب النكاح/حدیث: 16961]

حضرت حسن فرمایا کرتے تھے کہ اگر مہر مؤجل کی مدت معلومہ مقرر نہ ہو تو وہ فوری طور پر واجب ہوجاتا ہے۔ [مصنف ابن ابي شيبه/كتاب النكاح/حدیث: 16962]

حضرت ابن سیرین فرماتے ہیں کہ ایک مرتبہ ایک آدمی نے کسی عورت سے آسانی سے ادائیگی کی شرط پر مہر معجل اور مؤجل کے ساتھ نکاح کیا۔ عورت یہ مقدمہ لے کر حضرت شریح کی عدالت میں آئی تو انہوں نے اس عورت سے فرمایا کہ تم ہمیں آسانی کی تفصیل بتادو ہم تمہیں مہر دلوا دیتے ہیں۔ [مصنف ابن ابي شيبه/كتاب النكاح/حدیث: 16963]

حضرت ایاس بن معاویہ فرماتے ہیں کہ جب آدمی نے عورت سے ازدواجی ملاقات کرلی تو اب عورت کے لئے مؤجل کا دعویٰ نہیں ہوگا۔ [مصنف ابن ابي شيبه/كتاب النكاح/حدیث: 16964]

حضرت شعبی فرماتے ہیں کہ مہر عاجل بھی آجل ہے اور اجل موت یا فرقت تک ہے۔ [مصنف ابن ابي شيبه/كتاب النكاح/حدیث: 16965]

حضرت حماد فرماتے ہیں کہ اگر وہ چاہے تو وہ اسی وقت وصول کرسکتی ہے۔ [مصنف ابن ابي شيبه/كتاب النكاح/حدیث: 16966]

حضرت مکحول اور حضرت زہری فرماتے ہیں کہ اگر ایک آدمی نے کسی عورت سے شادی کی اور اس سے ازدواجی تعلق قائم کیا، پھر اس عورت میں جنون، کوڑھ، برص یا شرم گاہ میں گوشت ابھر آنے کی بیماری (عفل) دیکھی تو ان بیماریوں کی وجہ سے اسے واپس بھیج سکتا ہے۔ البتہ عورت کو وہ مہر ملے گا جس کے بدلے اس نے اس کی شرم گاہ کو حلال کیا، خواہ مؤجل ہو یا معجل۔ یہ مہر اس شخص پر واجب ہوگا جس نے آدمی کو دھوکا دیا ہوگا۔ [مصنف ابن ابي شيبه/كتاب النكاح/حدیث: 16967]

حضرت علی رضی اللہ عنہ بنو تغلب کے عیسائیوں کا ذبیحہ اور ان کی عورتوں سے نکاح کو مکروہ قرار دیتے تھے اور فرماتے تھے کہ یہ عرب لوگ ہیں۔ [مصنف ابن ابي شيبه/كتاب النكاح/حدیث: 16968]

حضرت حسن فرماتے ہیں کہ بنو تغلب کے ذبیحہ اور ان کی عورتوں سے نکاح کرنے میں کوئی حرج نہیں۔ انہوں نے ایک دین اختیار کیا، اب یہی ان کا دین ہے۔ [مصنف ابن ابي شيبه/كتاب النكاح/حدیث: 16969]