حضرت عبدا للہ مشرکہ باندی سے صحبت کو مکروہ قرار دیتے تھے۔ [مصنف ابن ابي شيبه/كتاب النكاح/حدیث: 17110]

حضرت زہری فرماتے ہیں کہ اگر کسی آدمی کے پاس اہل کتاب کی باندی ہو تو آدمی اگر چاہے تو اس سے جماع کرسکتا ہے۔ اور اسے غسل پر مجبور کرسکتا ہے۔ [مصنف ابن ابي شيبه/كتاب النكاح/حدیث: 17111]

حضرت ابن مسعود رضی اللہ عنہ فرماتے ہیں کہ قیدی عورت سے آدمی اس وقت تک جماع نہ کرے جب تک وہ لا الہ الا اللہ کا اقرارکرکے اسلام قبول نہ کرلے۔ [مصنف ابن ابي شيبه/كتاب النكاح/حدیث: 17112]

حضرت عمرو بن ہرم فرماتے ہیں کہ حضرت جابر بن زید سے سوال کیا گیا کہ اگر کوئی آدمی کسی قیدی باندی کو خرید لے تو کیا اس سے جماع کرسکتا ہے؟ انہوں نے فرمایا کہ اس وقت تک جماع نہیں کرسکتا جب تک اسے نماز، غسلِ جنابت اور زیرناف بال صاف کرنا نہ سکھا دے۔ [مصنف ابن ابي شيبه/كتاب النكاح/حدیث: 17113]

حضرت حسن بن محمد فرماتے ہیں کہ نبی پاک صلی اللہ علیہ وسلم نے ہجر کے مجوسیوں کے بارے میں حکم دیتے ہوئے خط لکھا کہ انہیں اسلام کی دعوت دی جائے اور جو اسلام لے آئے اس کا اسلام قبول کرلیا جائے اور جو اسلام قبول نہ کرے اس پر جزیہ مقرر کردیا جائے۔ البتہ ان کی عورتوں سے نکاح نہیں کیا جائے گا اور ان کا ذبیحہ نہیں کھایاجائے گا۔ [مصنف ابن ابي شيبه/كتاب النكاح/حدیث: 17114]

حضرت سعید بن مسیب نے حرامیہ باندی سے طلب اولاد کو مکروہ قرار دیا ہے۔ [مصنف ابن ابي شيبه/كتاب النكاح/حدیث: 17115]

حضرت ابو جعفر فرماتے ہیں کہ آدمی حرامیہ باندی سے جماع تو کرسکتا ہے لیکن اولاد حاصل کرنا درست نہیں۔ [مصنف ابن ابي شيبه/كتاب النكاح/حدیث: 17116]

حضرت ابو رواع فرماتے ہیں کہ میں نے حضرت ابن عمر رضی اللہ عنہما سے حرامیہ باندی کے بارے میں سوال کیا تو انہوں نے فرمایا کہ عورتیں بہت ہیں۔ [مصنف ابن ابي شيبه/كتاب النكاح/حدیث: 17117]

حضرت ابراہیم فرماتے ہیں کہ حرامیہ باندی میں تصرف کرنا جائز ہے۔ [مصنف ابن ابي شيبه/كتاب النكاح/حدیث: 17118]

حضرت حسن حرامیہ باندی کے بارے میں فرماتے ہیں کہ وہ اس کا مال ہے اس سے جماع کرسکتا ہے۔ [مصنف ابن ابي شيبه/كتاب النكاح/حدیث: 17119]