حضرت عبدا للہ فرماتے ہیں کہ آزادعورت کو عیب کی وجہ سے واپس نہیں کیا جائے گا۔ [مصنف ابن ابي شيبه/كتاب النكاح/حدیث: 17090]

حضرت زہری فرماتے ہیں کہ اگر شادی کے بعد مرد میں کوئی ایسا عیب معلوم ہو جس کا عورت کو علم نہ تھا، جیسے جنون، کوڑھ یا پھلبہری، تو عورت کے لئے اختیار ہے کہ چاہے تو اس کے ساتھ رہے اور چاہے تو علیحدگی اختیار کرلے۔ [مصنف ابن ابي شيبه/كتاب النكاح/حدیث: 17091]

حضرت حکم فرماتے ہیں کہ اگر شادی کے بعد مرد میں پھلبہری کا مرض معلوم ہو تو اس میں کوئی حرج نہیں اور اگر کوڑھ نکلے تو عورت کے لئے اختیار ہے کہ چاہے تو اس کے ساتھ رہے اور چاہے تو علیحدگی اختیار کرلے۔ [مصنف ابن ابي شيبه/كتاب النكاح/حدیث: 17092]

حضرت قتادہ فرماتے ہیں کہ اگر شادی کے بعد مرد میں جنون یا کوئی لاعلاج بیماری ظاہر ہو جس کا عورت کو علم نہ تھا تو عورت کے لئے اختیار ہے کہ چاہے تو اسی مرد کے ساتھ رہے اور چاہے تو علیحدگی اختیار کرلے۔ [مصنف ابن ابي شيبه/كتاب النكاح/حدیث: 17093]

حضرت ابو ہاشم فرماتے ہیں کہ یہ عورت اس مرد کی بیوی ہے وہ چاہے تو اسے رکھے اور چاہے تو طلاق دے دے۔ [مصنف ابن ابي شيبه/كتاب النكاح/حدیث: 17094]

حضرت موسیٰ بن ابی عائشہ رحمہ اللہ فرماتے ہیں کہ میں نے مرہ سے سوال کیا کہ اگر کوئی شخص مجوسیہ باندی کو خریدے یا قیدی بنا کر لائے تو اس کے اسلام قبول کرنے سے پہلے اس سے وطی کرسکتا ہے۔ انہوں نے فرمایا کہ ایسا کرنا درست نہیں۔ [مصنف ابن ابي شيبه/كتاب النكاح/حدیث: 17095]

اور میں نے سعید بن جبیر سے سوال کیا تو انہوں نے فرمایا کہ اگر وہ ایسا کرتا ہے تو یہ اس مجوسیہ سے بہتر نہیں ہے۔ [مصنف ابن ابي شيبه/كتاب النكاح/حدیث: 17096]

حضرت مکحول فرماتے ہیں کہ مجوسیہ باندی کے مسلمان ہونے سے پہلے اس سے نکاح نہیں ہوسکتا۔ [مصنف ابن ابي شيبه/كتاب النكاح/حدیث: 17097]

حضرت زہری فرماتے ہیں کہ جب تک مجوسیہ لا الہ الا اللہ کا اقرار نہ کرے مسلمان مرد اس کے قریب نہیں جاسکتا۔ جب وہ اقرار کرلے تو مسلمان ہے۔ [مصنف ابن ابي شيبه/كتاب النكاح/حدیث: 17098]

حضرت ابو سلمہ فرماتے ہیں کہ مجوسیہ کے اسلام قبول کرنے سے پہلے مسلمان اس کے قریب نہیں جاسکتا۔ [مصنف ابن ابي شيبه/كتاب النكاح/حدیث: 17099]