حضرت عمران بن حصین فرماتے ہیں کہ سالی کے ساتھ زنا کرنے سے بیوی حرام ہوجائے گی۔ [مصنف ابن ابي شيبه/كتاب النكاح/حدیث: 17150]

حضرت ابن عباس رضی اللہ عنہما فرماتے ہیں کہ سالی کے ساتھ زنا کرنے سے بیوی حرام نہیں ہوتی۔ [مصنف ابن ابي شيبه/كتاب النكاح/حدیث: 17151]

حضرت ابو الوضیء فرماتے ہیں کہ ایک مرتبہ ایک آدمی نے شام کے ایک شخص کی بیٹی سے نکاح کیا جو اس کی آزاد بیوی (مہیرہ) سے تھی۔ لیکن شبِ زفاف میں اسے اس شخص کی ایک دوسری بیٹی پیش کردی گئی جو ایک باندی سے تھی۔ جب اس رات آدمی نے اس لڑکی سے جماع کرلیا تو پوچھا ”تو کس کی بیٹی ہے؟“ اس نے کہا کہ میں فلاں کی بیٹی ہوں، یعنی باندی کی۔ اس آدمی نے کہا تمہارے باپ نے تو میری شادی آزاد بیوی کی بیٹی سے کی تھی۔ پس یہ لوگ اپنا مقدمہ لے کر حضرت معاویہ بن ابی سفیان رضی اللہ عنہ کی خدمت میں حاضر ہوئے۔ حضرت معاویہ رضی اللہ عنہ نے فرمایا کہ عورت کے بدلے عورت ہوگئی لہٰذا کوئی جھگڑا نہیں۔ حضرت معاویہ رضی اللہ عنہ نے اپنے پاس موجود شامی علماء سے اس بارے میں مشورہ کیا تو انہوں نے بھی یہی فتوی دیا۔ پھر اس آدمی نے کہا کہ میں یہ قضیہ حضرت علی رضی اللہ عنہ کے پاس لے جانا چاہتا ہوں۔ حضرت معاویہ رضی اللہ عنہ نے اس کی اجازت دے دی۔ مقدمہ حضرت علی رضی اللہ عنہ کی خدمت میں پیش کیا گیا تو آپ نے زمین سے کوئی معمولی سی چیز اٹھائی اور فرمایا کہ میرے لئے اس کا فیصلہ کرنا اس چیز سے بھی زیادہ معمولی ہے۔ اس عورت کو تو اتنا مہر ملے گا جو تو نے اس کی شرمگاہ کو حلال کرنے کے لئے اسے ادا کیا ہے۔ اور اس کے باپ پر لازم ہے کہ دوسری بیٹی کو وہ مال دے جو تو نے اسے ادا کیا ہے اور تو اس کے قریب اس وقت تک نہ جانا جب تک یہ دوسری لڑکی (جس سے جماع ہوا) عدت نہ گزار لے۔ راوی کہتے ہیں کہ میرے خیال میں حضرت علی رضی اللہ عنہ نے لڑکی کے والد کو کوڑے لگوائے یاکوڑے لگوانے کا ارادہ فرمایا۔ [مصنف ابن ابي شيبه/كتاب النكاح/حدیث: 17152]

حضرت عمر رضی اللہ عنہ کے آزاد کردہ غلام حضرت عبد الرحمن بن بیلمانی فرماتے ہیں کہ ایک مرتبہ حضور صلی اللہ علیہ وسلم نے خطبہ میں ارشاد فرمایا کہ کنوارے لوگوں کی شادیاں کراؤ۔ ایک آدمی نے کھڑے ہوکر سوال کیا کہ اے اللہ کے رسول! ان کے مہر کیا ہوں گے؟ آپ نے فرمایا کہ جس پر ان کے گھر والے راضی ہوجائیں۔ [مصنف ابن ابي شيبه/كتاب النكاح/حدیث: 17153]

حضرت ابن ابی لبیبہ کے دادا فرماتے ہیں کہ حضور صلی اللہ علیہ وسلم نے ارشاد فرمایا کہ جس شخص نے ایک درہم کے ذریعہ بھی عورت کو حلال کیا اس کے لئے حلال ہوگئی۔ [مصنف ابن ابي شيبه/كتاب النكاح/حدیث: 17154]

حضرت ابوبکر (ابن ابی شیبہ) فرماتے ہیں کہ میں نے حضرت وکیع کو اسی کے مطابق فتوی دیتے سنا، وہ فرماتے تھے کہ آدمی ایک درہم کے عوض عورت سے نکاح کرسکتا ہے۔ [مصنف ابن ابي شيبه/كتاب النكاح/حدیث: 17155]

حضرت عامر بن ربیعہ فرماتے ہیں کہ ایک آدمی نے عہد نبوی صلی اللہ علیہ وسلم میں دو جوتے مہر کے عوض ایک عورت سے نکاح کیا اور آپ صلی اللہ علیہ وسلم نے اس کے نکاح کو جائز قرار دیا۔ [مصنف ابن ابي شيبه/كتاب النكاح/حدیث: 17156]

حضرت سہل بن سعد رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ایک آدمی کی ایک عورت سے اس مہر پر شادی کرائی کہ وہ عورت کو قرآن مجید کی ایک سورت سکھائے گا۔ [مصنف ابن ابي شيبه/كتاب النكاح/حدیث: 17157]

حضرت سعید بن مسیب فرماتے ہیں کہ عورت اگر ایک درّہ (کوڑا) مہر لینے پر راضی ہوجائے تو وہی اس کا مہر بن جائے گا۔ [مصنف ابن ابي شيبه/كتاب النكاح/حدیث: 17158]

حضرت انس بن مالک رضی اللہ عنہ فرماتے ہیں کہ حضرت عبد الرحمن بن عوف رضی اللہ عنہ نے سونے کی ایک گٹھلی کے عوض نکاح کیا، وہ گٹھلی تین درہم اور ایک تہائی درہم کے برابر تھی۔ [مصنف ابن ابي شيبه/كتاب النكاح/حدیث: 17159]