حضرت شعبی رحمہ اللہ فرماتے ہیں کہ جب حالت طہر میں طلاق دی تو سمجھو کہ طلاق سنت دی خواہ اس سے جماع کیا ہو۔ [مصنف ابن ابي شيبه/كتاب الطلاق/حدیث: 18674]

حضرت عکرمہ رحمہ اللہ اور حضرت مجاہد رحمہ اللہ فرماتے ہیں کہ قرآن مجید کی آیت { فَطَلِّقُوہُنَّ لِعِدَّتِہِنَّ } کا مطلب یہ ہے کہ اسے حالت طہر میں بغیر جماع کے طلاق دے۔ [مصنف ابن ابي شيبه/كتاب الطلاق/حدیث: 18675]

حضرت محمد رحمہ اللہ فرماتے ہیں کہ قرآن مجید کی آیت { فَطَلِّقُوہُنَّ لِعِدَّتِہِنَّ } کا مطلب یہ ہے کہ اسے حالت طہر میں یا حالت حمل میں طلاق دے۔ [مصنف ابن ابي شيبه/كتاب الطلاق/حدیث: 18676]

حضرت علی رضی اللہ عنہ فرماتے ہیں کہ طلاق سنت دینے والا کبھی نادم نہیں ہوتا۔ [مصنف ابن ابي شيبه/كتاب الطلاق/حدیث: 18677]

حضرت عبد اللہ رضی اللہ عنہ فرماتے ہیں کہ طلاق سنت بغیر جماع کے طہر سے پہلے ہوتی ہے۔ [مصنف ابن ابي شيبه/كتاب الطلاق/حدیث: 18678]

حضرت عبد اللہ رضی اللہ عنہ فرماتے ہیں کہ جو شخص صحیح معنی میں طلاق دینا چاہتا ہے اسے چاہئے کہ صرف ایک طلاق دے کر عورت کو چھوڑ دے اور تین حیض گزرنے دے۔ [مصنف ابن ابي شيبه/كتاب الطلاق/حدیث: 18679]

حضرت طاؤس رحمہ اللہ فرماتے ہیں کہ طلاق سنت یہ ہے کہ آدمی اپنی بیوی کو بغیر جماع کے طہر میں طلاق دے پھر اس کی عدت گذرنے دے۔ [مصنف ابن ابي شيبه/كتاب الطلاق/حدیث: 18680]

حضرت ابو قلابہ رحمہ اللہ فرماتے ہیں کہ طلاق سنت یہ ہے کہ آدمی ایک طلاق دے دے پھر اسے چھوڑ دے یہاں تک کہ وہ بائنہ ہوجائے۔ [مصنف ابن ابي شيبه/كتاب الطلاق/حدیث: 18681]

حضرت علی رضی اللہ عنہ فرماتے ہیں کہ اگر لوگوں کو طلاق پر حد جاری ہو تو کوئی آدمی بیوی کو طلاق دینے کے بعد شرمندہ نہ ہو، وہ عورت کو ایک طلاق دے دے اور پھر اسے تین حیض آنے تک چھوڑے رکھے۔ [مصنف ابن ابي شيبه/كتاب الطلاق/حدیث: 18682]

حضرت ابراہیم رحمہ اللہ فرماتے ہیں کہ اسلاف اس بات کو مستحب سمجھتے تھے کہ آدمی بیوی کو ایک طلاق دے پھر تین حیض تک اسے چھوڑے رکھے۔ [مصنف ابن ابي شيبه/كتاب الطلاق/حدیث: 18683]