حضرت سعید بن مسیب رحمہ اللہ اور حضرت حسن رحمہ اللہ فرماتے ہیں کہ طلاق کو مقدم کرے یا مؤخر اس کا ان شاء اللہ کہنا باقی رہے گا۔ [مصنف ابن ابي شيبه/كتاب الطلاق/حدیث: 18994]

حضرت زہری رحمہ اللہ طلاق اور عتاق کے استثناء کے بارے میں فرماتے ہیں کہ طلاق کو مقدم کرے یا مؤخر اس کا ان شاء اللہ کہنا باقی رہے گا۔ [مصنف ابن ابي شيبه/كتاب الطلاق/حدیث: 18995]

حضرت شریح رحمہ اللہ فرماتے ہیں کہ جب طلاق سے ابتداء کرے تو واقع ہوجائے گی حانث ہو یا نہ ہو۔ [مصنف ابن ابي شيبه/كتاب الطلاق/حدیث: 18996]

ابراہیم رحمہ اللہ فرمایا کرتے تھے کہ شریح کیا جانتے ہیں! [مصنف ابن ابي شيبه/كتاب الطلاق/حدیث: 18997]

حضرت سعید زبیدی کہتے ہیں کہ ایک مرتبہ میں رات کو اپنی بیوی کے پاس بہت دیر سے آیا تو وہ مجھے کہنے لگی تم میرے پاس اس وقت صرف اس لئے آئے ہو کہ تمہاری کوئی اور بیوی بھی ہے، میں نے کہا کہ اگر میری کوئی اور بیوی ہو تو اس کو تین طلاق ہے، میں نے اس بارے میں ابراہیم رحمہ اللہ سے سوال کیا تو انہوں نے فرمایا کہ اس جملے سے کچھ نہیں ہوتا۔ [مصنف ابن ابي شيبه/كتاب الطلاق/حدیث: 18998]

حضرت ابراہیم رحمہ اللہ طلاق میں استثناء کے قائل تھے۔ [مصنف ابن ابي شيبه/كتاب الطلاق/حدیث: 18999]

حضرت عطاء، حضرت طاوس، حضرت مجاہد، حضرت نخعی اور حضرت زہری s فرماتے ہیں کہ اگر کسی آدمی نے اپنی بیوی سے کہا اگر میں ایسا ایسا نہ کروں تو ان شاء اللہ تجھے طلاق ہے تو اس کا استثناء قابل لحاظ ہوگا۔ [مصنف ابن ابي شيبه/كتاب الطلاق/حدیث: 19000]

حضرت حماد رحمہ اللہ فرماتے ہیں کہ اگر کسی آدمی نے اپنی بیوی سے کہا کہ ان شاء اللہ تجھے طلاق ہے تو اس کا استثناء قابل لحاظ ہوگا۔ [مصنف ابن ابي شيبه/كتاب الطلاق/حدیث: 19001]

حضرت حکم رحمہ اللہ بھی یونہی فرماتے ہیں۔ [مصنف ابن ابي شيبه/كتاب الطلاق/حدیث: 19002]

حضرت قتادہ رحمہ اللہ اور حضرت ایاس بن معاویہ رحمہ اللہ فرماتے ہیں کہ اگر کسی آدمی نے اپنی بیوی سے کہا کہ ان شاء اللہ تجھے طلاق ہے تو طلا ق ہوجائے گی۔ [مصنف ابن ابي شيبه/كتاب الطلاق/حدیث: 19003]