حضرت ابو جعفر رحمہ اللہ فرماتے ہیں کہ کسی آدمی کے ایسا کہنے کی صورت میں حضرت علی رضی اللہ عنہ نے قرعہ اندازی کرائی تھی۔ [مصنف ابن ابي شيبه/كتاب الطلاق/حدیث: 18984]

حضرت قتادہ رحمہ اللہ اور حضرت شعبی رحمہ اللہ فرماتے ہیں کہ اگر اس نے کسی ایک کا نام لیا تو اسی کو طلاق ہوگی اور اگر نام نہ لیا تو سب کو طلاق ہوجائے گی۔ [مصنف ابن ابي شيبه/كتاب الطلاق/حدیث: 18985]

حضرت شعبی رحمہ اللہ سے بھی یونہی منقول ہے۔ [مصنف ابن ابي شيبه/كتاب الطلاق/حدیث: 18986]

بنو سعد کے ایک عریف (نگران) نے حسن رحمہ اللہ سے سوال کیا، اور بادشاہ نے اس سے قسم لی تھی، تو انہوں نے فرمایا کہ تمہاری نیت کا اعتبار ہوگا۔ [مصنف ابن ابي شيبه/كتاب الطلاق/حدیث: 18987]

ابراہیم رحمہ اللہ فرماتے ہیں کہ اگر ایک شخص کی تین بیویاں ہوں اور وہ کہے کہ اس کی بیوی کو طلاق ہے تو اگر کسی کی نیت کی تھی تو اسے طلاق ہوگی اور اگر کسی کی نیت نہیں کی تو ان میں سے جس کو چاہے اختیار کرلے۔ ایلاء اور ظہار کا بھی یہی حکم ہے۔ [مصنف ابن ابي شيبه/كتاب الطلاق/حدیث: 18988]

حضرت ابو جعفر رحمہ اللہ سے سوال کیا گیا کہ ایک آدمی کی چار بیویاں تھیں، ان میں سے ایک بیوی نے اسے جھانکا تو اس نے کہا کہ تجھے قطعی طلاق ہے، جب وہ ان کے پاس آیا تو ہر ایک کہنے لگی کہ وہ دوسری تھی، وہ اسے پہچان بھی نہ سکا کہ وہ کون سی تھی تو کیا حکم ہے؟ حضرت ابو جعفر رحمہ اللہ نے فرمایا کہ سب اس سے جدا ہوجائیں گی۔ [مصنف ابن ابي شيبه/كتاب الطلاق/حدیث: 18989]

حضرت شریح رحمہ اللہ فرماتے ہیں کہ اگر کسی آدمی نے طلاق یا عتاق کا تذکرہ کرکے ان شاء اللہ کہا تو طلاق اور عتاق واقع ہوجائیں گے، خواہ وہ قسم توڑ دے یا باقی رکھے۔ [مصنف ابن ابي شيبه/كتاب الطلاق/حدیث: 18990]

حضرت سعید بن جبیر رحمہ اللہ فرماتے ہیں کہ اگر اس نے قسم نہیں توڑی تو پھر واقع نہیں ہوں گے۔ [مصنف ابن ابي شيبه/كتاب الطلاق/حدیث: 18991]

حضرت حسن رحمہ اللہ اور حضرت شعبی رحمہ اللہ فرماتے ہیں کہ طلاق کا مقدم اور مؤخر کرنا ایک جیسا ہے، جب اسے کلام کے ساتھ ملا کرلائے۔ [مصنف ابن ابي شيبه/كتاب الطلاق/حدیث: 18992]

حضرت شعبی رحمہ اللہ سے بھی یونہی منقول ہے۔ [مصنف ابن ابي شيبه/كتاب الطلاق/حدیث: 18993]