حضرت طاؤس رحمہ اللہ سے بھی (دوسری سند سے) یہی منقول ہے۔ [مصنف ابن ابي شيبه/كتاب الطلاق/حدیث: 19364]

حضرت عامر رحمہ اللہ سے بھی (دوسری سند سے) یہی منقول ہے، ان حضرات نے فرمایا کہ اگر کوئی باندی کسی آزاد شخص کے نکاح میں ہو، پھر اسے آزاد کیا جائے اور وہ (اپنے نفس کو) اختیار کرلے تو یہ بغیر طلاق کے فرقت ہوگی۔ [مصنف ابن ابي شيبه/كتاب الطلاق/حدیث: 19365]

حضرت حماد رحمہ اللہ اور حضرت ابراہیم رحمہ اللہ فرماتے ہیں کہ اگر کسی باندی کو آزاد کیا گیا پھر اسے اختیار دیا گیا اور اس نے اپنے نفس کو اختیار کرلیا تو یہ بغیر طلاق کے فرقت ہوگی۔ [مصنف ابن ابي شيبه/كتاب الطلاق/حدیث: 19366]

ابراہیم رحمہ اللہ سے بھی (دوسری سند سے) یہی منقول ہے، دونوں حضرات نے فرمایا کہ اگر باندی کو آزاد کیا جائے اور اسے اختیار دیا جائے اور وہ اپنے نفس کو اختیار کرلے تو یہ بغیر طلاق کے فرقت ہوگی۔ [مصنف ابن ابي شيبه/كتاب الطلاق/حدیث: 19367]

حسن رحمہ اللہ فرماتے ہیں کہ یہ طلاق ہے۔ [مصنف ابن ابي شيبه/كتاب الطلاق/حدیث: 19368]

حضرت محمد رحمہ اللہ فرماتے ہیں کہ اگر اس نے اپنے نفس کو اختیار کرلیا تو یہ طلاق بائن ہے۔ [مصنف ابن ابي شيبه/كتاب الطلاق/حدیث: 19369]

حضرت ابراہیم رحمہ اللہ فرماتے ہیں کہ اگر کوئی شخص اپنی بیوی سے کہے کہ اگر تو چاہے تو تجھے طلاق ہے تو اگر وہ چاہے تو طلاق ہوگی اور اگر نہ چاہے تو طلاق نہیں ہوگی۔ [مصنف ابن ابي شيبه/كتاب الطلاق/حدیث: 19370]

حسن رحمہ اللہ فرماتے ہیں کہ اگر کوئی شخص اپنی بیوی سے کہے کہ اگر تو چاہے تو تجھے طلاق ہے تو اگر عورت نے کہا کہ میں نے طلاق کو چاہ لیا تو اسے ایک طلاق ہوجائے گی اور مرد کو رجوع کا حق ہوگا اور اگر کہا کہ اگر تو چاہے تو میں تجھے طلاق دے دوں اور اس نے کہا کہ میں نے چاہ لیا تو اگر مرد چاہے تو اسے طلاق نہ دے۔ [مصنف ابن ابي شيبه/كتاب الطلاق/حدیث: 19371]

حضرت عروہ بن فائد رحمہ اللہ کہتے ہیں کہ ایک آدمی نے اپنی بیوی سے کہا کہ اگر تو فلاں فلاں کام کرے تو میری بیوی نہیں ہے، اس عورت نے وہی کام کیا، پھر وہ اپنے خاوند کے ساتھ حضرت عبد الرحمن بن ابی لیلیٰ رحمہ اللہ کے پاس آئی انہوں نے فرمایا کہ جو نیت کی تھی وہ واقع ہوگیا، پھر وہ اپنے خاوند کے ساتھ حضرت ابو عبداللہ جدلی کے پاس گئی انہوں نے بھی فرمایا کہ جو نیت کی ہے وہ واقع ہوگیا، اور حضرت سعید بن جبیر رحمہ اللہ نے فرمایا کہ یہ کچھ نہیں ہے۔ [مصنف ابن ابي شيبه/كتاب الطلاق/حدیث: 19372]

اور وہ اپنے خاوند کے ساتھ حضرت ابو عبد اللہ جدلی کے پاس گئی تو انہوں نے فرمایا کہ جو نیت کی ہے (وہی واقع ہوگا)۔ [مصنف ابن ابي شيبه/كتاب الطلاق/حدیث: 19373]