حضرت مسروق رحمہ اللہ فرماتے ہیں کہ میں نے حضرت عبد اللہ رضی اللہ عنہ سے سحت (حرام کمائی) کے متعلق دریافت کیا؟ آپ رضی اللہ عنہ نے فرمایا: کوئی شخص کسی دوسرے شخص کی کوئی ضرورت پوری کروانے کی کوشش کرے اور وہ اس کو کوئی ہدیہ دے اور یہ اس کو قبول کر لے۔ [مصنف ابن ابي شيبه/كتاب البيوع والأقضية/حدیث: 22136]

حضرت کلیب بن وائل رحمہ اللہ فرماتے ہیں کہ میں نے حضرت ابن عمر رضی اللہ عنہما سے عرض کیا کہ میرے پاس ایک دہقان (زمیندار) آیا جس کا بہت سارا خراج بنتا تھا۔ اس نے مجھ سے درخواست کی کہ آپ عامل کے سامنے میری ضمانت لے لیجیے۔ میں نے اس کی ضمانت اس لیے نہیں لی کہ اس کی طرف سے کچھ ادا کروں، صرف اس لیے لی تاکہ عامل اس کو امن دے اور وہ اپنی ضروریات کے لیے چل پھر سکے۔ ابھی تھوڑی ہی دیر ہی گذری تھی کہ وہ میرے پاس میرا صحیفہ لے کر آیا، میں نے کہا جزاک اللہ خیراً، اور اس نے مجھے سواری پر بٹھایا اور مجھے درہم دئیے اور کپڑے پہنائے، حضرت ابن عمر رضی اللہ عنہما نے فرمایا: آپ کا کیا خیال ہے اگر تو اس کی ضمانت نہ لیتا تو وہ تجھے یہ عطاء کرتا؟ میں نے عرض کیا کہ نہیں، آپ رضی اللہ عنہ نے فرمایا کہ یہ تیرے لئے ٹھیک اور درست نہیں ہے۔ [مصنف ابن ابي شيبه/كتاب البيوع والأقضية/حدیث: 22137]

حضرت حسن رحمہ اللہ سے مروی ہے کہ کوفہ کے گاؤں کے چودھریوں میں سے ایک چودھری حضرت عبد اللہ بن جعفر رضی اللہ عنہ کی خدمت میں حاضر ہوا، وہ حضرت عبداللہ بن جعفر سے علی رضی اللہ عنہ کے خلاف مدد مانگ (کوئی سفارش) مانگ رہا تھا، آپ رضی اللہ عنہ نے حضرت علی رضی اللہ عنہ سے اس کی سفارش کی تو حضرت علی رضی اللہ عنہ نے اس کی ضرورت پوری فرما دی، چودھری نے آپ کو چالیس ہزار درہم ہدیہ میں بھیجے اور اس کے ساتھ کچھ اور چیزیں، مجھے نہیں معلوم وہ کیا تھا، جب وہ سب کچھ حضرت عبد اللہ بن جعفر رضی اللہ عنہ کے سامنے رکھے گئے تو آپ رضی اللہ عنہ نے پوچھا یہ کیا ہے؟ لوگوں نے عرض کیا کہ آپ رضی اللہ عنہ نے جس چودھری کی حضرت علی رضی اللہ عنہ سے سفارش فرمائی تھی اس نے آپ رضی اللہ عنہ کے لئے بھیجا ہے، آپ رضی اللہ عنہ نے فرمایا: واپس اس کو بھیج دو، ہم اہل بیت نیکی فروخت نہیں کیا کرتے۔ [مصنف ابن ابي شيبه/كتاب البيوع والأقضية/حدیث: 22138]

حضرت طارق بن عبد الرحمن رحمہ اللہ فرماتے ہیں کہ میں حضرت شریح رحمہ اللہ کے پاس حاضر تھا کہ ایک شخص آیا اور عرض کیا کہ میں نے اس آدمی پر اور اس کے ساتھ دو اور آدمیوں پر یہ لکھوایا تھا کہ ان میں سے جس سے چاہوں اپنا حق وصول کروں گا۔ اس آدمی نے کہا کہ میرے دونوں ساتھی بازار میں ہیں، آپ رحمہ اللہ نے فرمایا جس مرضی سے تو چاہے اپنا حق وصول کرلے۔ [مصنف ابن ابي شيبه/كتاب البيوع والأقضية/حدیث: 22139]

حضرت ابن جریج رحمہ اللہ فرماتے ہیں کہ میں نے حضرت عطاء رحمہ اللہ سے عرض کیا کہ میں نے ایک بیع میں دو آدمیوں پر یہ لکھوایا کہ تم میں سے زندہ مرنے والے کا اور مالدار تنگدست کا ذمہ دار ہوگا۔ آپ رحمہ اللہ نے فرمایا کہ یہ جائز ہے۔ [مصنف ابن ابي شيبه/كتاب البيوع والأقضية/حدیث: 22140]

اور حضرت عمرو بن دینار رحمہ اللہ اور حضرت سلیمان بن موسیٰ رحمہ اللہ نے بھی یہی فرمایا۔ [مصنف ابن ابي شيبه/كتاب البيوع والأقضية/حدیث: 22141]

ابراہیم رحمہ اللہ سے دریافت کیا گیا کہ کچھ آدمیوں پر اقرار نامہ لکھا گیا ہے کہ ان میں سے جس سے چاہے اپنا مکمل حق وصول کرے گا؟ فرمایا کہ وہ تو شرط پر ہے (جو طے ہوا تھا) جس سے چاہے اپنا پورا حق وصول کرلے۔ اور ابراہیم رحمہ اللہ اس بات کو پسند کرتے تھے کہ ان میں سے ہر شخص سے اس کے حصہ کے بقدر وصول کیا جائے، اور فرماتے تھے کہ یہ طریقہ انصاف کے زیادہ قریب ہے۔ [مصنف ابن ابي شيبه/كتاب البيوع والأقضية/حدیث: 22142]

حضرت حکم رحمہ اللہ اس شخص کے متعلق فرماتے ہیں کہ جس کا ایک قوم پر حق ہو اور وہ کہے کہ جس سے چاہوں پورا حق وصول کروں گا، فرماتے ہیں کہ یہ بمنزلہ کفیل کے ہے۔ [مصنف ابن ابي شيبه/كتاب البيوع والأقضية/حدیث: 22143]

حضرت ابو جہم رحمہ اللہ فرماتے ہیں کہ کچھ لوگوں پر اپنا حق لکھا تھا کہ ان میں سے جس سے چاہوں اپنا مکمل حق وصول کروں گا، پس میں ان کو حضرت شریح کے پاس لے گیا، آپ رحمہ اللہ نے فرمایا جس سے چاہو وصول کرلو۔ [مصنف ابن ابي شيبه/كتاب البيوع والأقضية/حدیث: 22144]

حضرت ابراہیم رحمہ اللہ عبد مأذون کے متعلق فرماتے ہیں کہ اگر اس کے ذمہ قرض ہو اور اس کا آقا اس کو آزاد کر دے، تو غلام قرض خواہوں کے قرض ادا کرنے کی کوشش کرے گا، آزادی نے اس کی صلاحیت کے علاوہ کسی چیز میں اضافہ نہیں کیا۔ [مصنف ابن ابي شيبه/كتاب البيوع والأقضية/حدیث: 22145]