حضرت شعبی رحمہ اللہ اس شخص کے متعلق فرماتے ہیں جو صدقہ کرے پھر وہی چیز اس کو میراث میں مل جائے تو میراث میں اس کا حصہ اس میں حلّت کے علاوہ کسی چیز کا اضافہ نہیں کرے گا۔ [مصنف ابن ابي شيبه/كتاب البيوع والأقضية/حدیث: 22296]

حضرت عطاء رحمہ اللہ فرماتے ہیں کہ اگر کوئی شخص صدقہ کرے پھر وہی چیز وراثت میں اس کو واپس مل رہی ہو تو اس کو کسی دوسرے وارث کے حصہ میں ڈال دے۔ [مصنف ابن ابي شيبه/كتاب البيوع والأقضية/حدیث: 22297]

حضرت مُزرّع رحمہ اللہ فرماتے ہیں کہ میں نے حضرت شعبی رحمہ اللہ سے اس کے متعلق دریافت کیا؟ آپ رحمہ اللہ نے فرمایا اگر تو اپنے حصہ میں لے لے تو کوئی حرج نہیں، اور اگر چھوڑ دے تو یہ افضل ہے۔ [مصنف ابن ابي شيبه/كتاب البيوع والأقضية/حدیث: 22298]

حضرت ابراہیم رحمہ اللہ فرماتے ہیں کہ اسی کے مثل میں اس کو رکھے گا (دوبارہ صدقہ کر دے گا)۔ [مصنف ابن ابي شيبه/كتاب البيوع والأقضية/حدیث: 22299]

حضرت عمر رضی اللہ عنہارشاد فرماتے ہیں کہ سائبہ (وہ غلام جسے ولاء کے حق کے بغیر آزاد کیا گیا ہو) اور صدقہ اسی دن کے لئے ہیں۔ (قیامت کے دن کے لئے)۔ [مصنف ابن ابي شيبه/كتاب البيوع والأقضية/حدیث: 22300]

حضرت ابن عمر رضی اللہ عنہما سے اس شخص کے بارے میں مروی ہے جو کسی آدمی کو دراہم قرض دے، پھر ان کی قیمت کے بدلے غلہ لے لے، کہ آپ رضی اللہ عنہ نے اسے ناپسند فرمایا۔ [مصنف ابن ابي شيبه/كتاب البيوع والأقضية/حدیث: 22301]

حضرت سعید بن جبیر رحمہ اللہ، حضرت حماد اور حضرت عکرمہ رحمہ اللہ اس طرح کرنے میں کوئی حرج نہیں سمجھتے تھے۔ [مصنف ابن ابي شيبه/كتاب البيوع والأقضية/حدیث: 22302]

حضرت طاؤس فرماتے ہیں کہ جب اصل حق دین ہو (یعنی مدت متعین ہو) تو جس چیز کے بدلے فروخت کیا ہے وہی وصول کر، اور اگر قرض ہو (مدت متعین نہ ہو) تو جو قرض دیا ہے اس کے غیر جنس لینے میں بھی کوئی حرج نہیں ہے۔ [مصنف ابن ابي شيبه/كتاب البيوع والأقضية/حدیث: 22303]

حضرت ابراہیم رحمہ اللہ فرماتے ہیں کہ آدمی کے کسی شخص پر کچھ دراہم قرض ہوں، اور وہ اس کے پاس آ کر قرض کا مطالبہ کرے اور مقروض کہے کہ اس کے بدلے جو، گندم، کھجور یا سونے کے علاوہ کوئی چیز رکھ لے تو کوئی حرج نہیں، جب اس کے درہم دوسرے پر قرض ہوں تو وہ اس کے بدلے اس سے جو چاہے وصول کرسکتا ہے۔ [مصنف ابن ابي شيبه/كتاب البيوع والأقضية/حدیث: 22304]

حضرت ابن حرملۃ رحمہ اللہ فرماتے ہیں کہ میں نے اونٹنی اس بات پر فروخت کی کہ کٹائی کے دن مجھے درہم بدلے میں چاہئیں۔ جب سپردگی کا وقت آیا تو انہوں نے مجھے گندم، جو اور سلت (بے چھلکا جو) ادا کیے تو میں نے حضرت سعید بن المسیب رحمہ اللہ سے دریافت کیا؟ آپ رحمہ اللہ نے فرمایا کہ یہ درست نہیں ہے، دراہم کے علاوہ کوئی چیز وصول نہ کرنا۔ [مصنف ابن ابي شيبه/كتاب البيوع والأقضية/حدیث: 22305]