حضرت حرام بن سعد بن محیّصۃ رحمہ اللہ کے والد نے نبی کریم صلی اللہ علیہ وسلم سے حجام کی کمائی کے متعلق دریافت کیا؟ آپ صلی اللہ علیہ وسلم نے اس سے منع فرمایا، وہ مسلسل آپ صلی اللہ علیہ وسلم سے کلام کرتے رہے یہاں تک کہ آپ صلی اللہ علیہ وسلم نے ارشاد فرمایا: اُن پیسوں سے اونٹ کو چارہ ڈال دو یا غلام کو کھلا دو۔ [مصنف ابن ابي شيبه/كتاب البيوع والأقضية/حدیث: 22266]

حضرت انس رضی اللہ عنہ سے مروی ہے کہ نبی کریم صلی اللہ علیہ وسلم نے ابو طیبہ حجام سے پچھنے لگوائے اور اس کو دو صاع کھانا عطاء فرمایا اور اس کے گھر والوں سے بات فرمائی انہوں نے اس کے خراج (مالکوں کو دی جانے والی مقررہ رقم) میں تخفیف کردی۔ [مصنف ابن ابي شيبه/كتاب البيوع والأقضية/حدیث: 22267]

حضرت ابن عمر رضی اللہ عنہما سے مروی ہے کہ ابو طیبہ نامی حجام سے آپ صلی اللہ علیہ وسلم نے پچھنے لگوائے اور اس سے پوچھا تیرا خراج (مالکوں کو دی جانے والی مقررہ رقم) کتنا ہے؟ اس نے عرض کیا تین صاع۔ آپ صلی اللہ علیہ وسلم نے اس کے خراج میں سے ایک صاع کم کروا دیا اور اس کو اس کی اجرت عطا فرمائی۔ [مصنف ابن ابي شيبه/كتاب البيوع والأقضية/حدیث: 22268]

حضرت عطاء رحمہ اللہ فرماتے ہیں کہ حجام کی کمائی میں کوئی حرج نہیں ہے جو وہ قینچی کے ساتھ کمائے۔ [مصنف ابن ابي شيبه/كتاب البيوع والأقضية/حدیث: 22269]

حضرت ابن عباس رضی اللہ عنہما ارشاد فرماتے ہیں کہ نبی کریم صلی اللہ علیہ وسلم نے پچھنے لگوائے اور حجام کو اجرت دی، اگر حجام کی کمائی حرام ہوتی تو آپ صلی اللہ علیہ وسلم اس کو عطا نہ فرماتے۔ [مصنف ابن ابي شيبه/كتاب البيوع والأقضية/حدیث: 22270]

حضرت عطاء رحمہ اللہ فرماتے ہیں کہ میں حضرت ابن عباس رضی اللہ عنہما کی خدمت میں حاضر ہوا ان کا غلام ان کی حجامت کر رہا تھا۔ میں نے سوال کیا کہ اے ابو عباس! آپ اس کے خراج کا کیا کرتے ہیں؟ انہوں نے جواب دیا کہ میں اس کو خود بھی کھاتا ہوں اور دوسروں کو بھی کھلاتا ہوں۔ انہوں نے اپنے ہاتھ سے اپنے منہ کی طرف اشارہ کیا۔ [مصنف ابن ابي شيبه/كتاب البيوع والأقضية/حدیث: 22271]

حضرت علی رضی اللہ عنہ سے مروی ہے کہ نبی کریم صلی اللہ علیہ وسلم نے پچھنے لگوائے پھر حجام سے دریافت کیا کہ تیرا خراج (مالکوں کو دی جانے والی مقررہ رقم) کتنا ہے؟ اس نے عرض کیا کہ دو صاع۔ آپ صلی اللہ علیہ وسلم نے اس کے خراج میں سے ایک صاع کم کروا دیا۔ حضور صلی اللہ علیہ وسلم نے مجھے حکم دیا اور میں نے اس کو ایک صاع دے دیا۔ [مصنف ابن ابي شيبه/كتاب البيوع والأقضية/حدیث: 22272]

حضرت ابن عباس رضی اللہ عنہما ارشاد فرماتے ہیں کہ نبی کریم صلی اللہ علیہ وسلم نے پچھنے لگوائے اور اس کو اجرت دی اور اگر ا س کمائی میں کوئی حرج ہوتا تو آپ صلی اللہ علیہ وسلم اس کو عطا نہ فرماتے۔ [مصنف ابن ابي شيبه/كتاب البيوع والأقضية/حدیث: 22273]

حضرت ابن عباس رضی اللہ عنہما کی خدمت میں ایک خاتون حاضر ہوئی اور عرض کیا میں عراق سے ہوں، میرا ایک غلام ہے جو حجامت کرتا ہے، عراق کے لوگوں کا خیال ہے کہ میں خون کی کمائی کھاتی ہوں، آپ رضی اللہ عنہ نے فرمایا: وہ کچھ بھی گمان نہیں کرتے، تو اپنے غلام کی کمائی کھاتی ہے، خون کی کمائی نہیں کھاتی۔ [مصنف ابن ابي شيبه/كتاب البيوع والأقضية/حدیث: 22274]

حضرت عکرمہ رحمہ اللہ فرماتے ہیں کہ نبی کریم صلی اللہ علیہ وسلم نے پچھنے لگوائے اور حجام کو مزدوری میں ایک دینار عطا فرمایا۔ [مصنف ابن ابي شيبه/كتاب البيوع والأقضية/حدیث: 22275]