حضرت وکیع رحمہ اللہ فرماتے ہیں کہ حضرت ابن ابی لیلی رحمہ اللہ کے پاس محلّے کے کچھ بچوں نے گواہی دی جو نابالغ تھے، آپ رحمہ اللہ نے فرمایا: فلاں، فلاں کی گواہی لکھ لو اور یہ کہ وہ چھوٹے ہیں اور بالغ نہیں ہوئے، جب بالغ ہوجائیں تو دیکھنا کہ اگر اس پر ثابت اور برقرار ہیں تو گواہی معتبر ہے اور اگر رجوع کرلیں تو وہ گواہی کالعدم ہوگی۔ [مصنف ابن ابي شيبه/كتاب البيوع والأقضية/حدیث: 22336]

حضرت شعبی رحمہ اللہ بچوں کی گواہی معتبر سمجھتے تھے اور انہیں بلوا کر ان سے اس کے متعلق سوال کرتے تھے۔ [مصنف ابن ابي شيبه/كتاب البيوع والأقضية/حدیث: 22337]

حضرت شریح رحمہ اللہ نے آمہ (سر کے اس زخم جو دماغ کی جھلی تک پہنچ جائے) کے معاملہ میں بچوں کی گواہی کو قبول کیا اور چار ہزار دراہم کا فیصلہ سنایا۔ [مصنف ابن ابي شيبه/كتاب البيوع والأقضية/حدیث: 22338]

حضرت علی رضی اللہ عنہ بچوں کی گواہی بچوں کے بارے میں جائز سمجھتے تھے۔ [مصنف ابن ابي شيبه/كتاب البيوع والأقضية/حدیث: 22339]

حضرت علی رضی اللہ عنہ نے بڑھئی کو ضامن بنایا۔ [مصنف ابن ابي شيبه/كتاب البيوع والأقضية/حدیث: 22340]

حضرت عمربن خطاب رضی اللہ عنہ نے ان کاریگروں کو جو لوگوں کے کام کے لیے (اپنے پیشوں میں) بیٹھے ہوئے تھے، ان کے ہاتھوں ضائع ہونے والی چیزوں کا ضامن قرار دیا ہے۔ [مصنف ابن ابي شيبه/كتاب البيوع والأقضية/حدیث: 22341]

حضرت علی رضی اللہ عنہ نے دھوبی اور سنار کو ضامن بنایا اور فرمایا: لوگوں کے لیے اسی میں بہتری ہے۔ [مصنف ابن ابي شيبه/كتاب البيوع والأقضية/حدیث: 22342]

حضرت قاضی شریح رحمہ اللہ نے دھوبی کو ضامن بنایا اور فرمایا: نقصان کی صورت میں وہی کپڑا دے یا اس جیسا کپڑا دے۔ [مصنف ابن ابي شيبه/كتاب البيوع والأقضية/حدیث: 22343]

حضرت مسروق رحمہ اللہ اور حضرت شریح رحمہ اللہ دھوبی کو اس دن کے اعتبار سے، جس دن اس نے کپڑا لیا تھا، اس جیسے کپڑے کا ضامن قرار دیتے تھے۔ [مصنف ابن ابي شيبه/كتاب البيوع والأقضية/حدیث: 22344]

حضرت مسروق رحمہ اللہ اور حضرت شریح رحمہ اللہ فرماتے ہیں کہ دھوبی اگر کپڑا پھاڑ دے تو وہ اس کی قیمت کا ضامن ہوگا۔ اور وہ کپڑا اپنے پاس لے لے گا۔ [مصنف ابن ابي شيبه/كتاب البيوع والأقضية/حدیث: 22345]