حضرت ابو جعفر رحمہ اللہ فرماتے ہیں کہ کوئی حرج نہیں کہ آدمی پچھنے لگوائے اور حجام کے ساتھ شرط نہ لگائے۔ [مصنف ابن ابي شيبه/كتاب البيوع والأقضية/حدیث: 22276]

حضرت ابوہریرہ رضی اللہ عنہارشاد فرماتے ہیں حجام کی کمائی سُحت (حرام کمائی) ہے۔ [مصنف ابن ابي شيبه/كتاب البيوع والأقضية/حدیث: 22277]

ابراہیم رحمہ اللہ فرماتے ہیں کہ وہ حضرات حجام کی کمائی کو ناپسند فرماتے تھے۔ [مصنف ابن ابي شيبه/كتاب البيوع والأقضية/حدیث: 22278]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے حجام کی کمائی سے منع فرمایا ہے۔ [مصنف ابن ابي شيبه/كتاب البيوع والأقضية/حدیث: 22279]

حضرت ابو جحیفہ رضی اللہ عنہ نے ایک غلام خریدا جو حجام تھا، آپ رضی اللہ عنہ نے اس کے اوزار توڑ ڈالے اور فرمایا: آپ صلی اللہ علیہ وسلم نے خون کی کمائی سے منع فرمایا ہے۔ [مصنف ابن ابي شيبه/كتاب البيوع والأقضية/حدیث: 22280]

حضرت عروہ رحمہ اللہ سے مروی ہے کہ انصار کے نوجوانوں کے لئے ایک غلام حجام تھا، نبی کریم صلی اللہ علیہ وسلم نے ان کو حکم فرمایا کہ اس کی کمائی اونٹوں کے چارے میں استعمال کرو۔ [مصنف ابن ابي شيبه/كتاب البيوع والأقضية/حدیث: 22281]

حضرت رافع بن خدیج رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: حجامت کی کمائی خبیث ہے، زانیہ کے مہر کی کمائی خبیث ہے اور کتے کی قیمت خبیث ہے۔ [مصنف ابن ابي شيبه/كتاب البيوع والأقضية/حدیث: 22282]

حضرت ابراہیم رحمہ اللہ حجام کی کمائی کو ناپسند فرماتے تھے۔ [مصنف ابن ابي شيبه/كتاب البيوع والأقضية/حدیث: 22283]

حضرت ابن بریدہ رحمہ اللہ اپنے والد سے روایت کرتے ہیں کہ ایک خاتون نبی کریم صلی اللہ علیہ وسلم کی خدمت میں حاضر ہوئی اور عرض کیا: میں نے اپنی والدہ پر ایک باندی صدقہ کی تھی، میری والدہ کا انتقال ہوگیا اور باندی میرے پاس رہ گئی، آپ صلی اللہ علیہ وسلم نے ارشاد فرمایا: تیرا اجر پورا ہوگیا اور وہ باندی وراثت میں تیری طرف لوٹ آئی۔ [مصنف ابن ابي شيبه/كتاب البيوع والأقضية/حدیث: 22284]

حضرت حمید بن ھلال رحمہ اللہ سے مروی ہے کہ ایک شخص نے اپنی والدہ کو باندی صدقہ کی، اس کی والدہ نے اس باندی کو مکاتبہ بنا لیا، پھر اس کا انتقال ہوگیا تو باندی وراثت میں دوبارہ اسی کو مل گئی، اس شخص نے حضرت عمران بن حصین رضی اللہ عنہ سے اس کے متعلق دریافت کیا؟ آپ رضی اللہ عنہ نے فرمایا کہ تو اپنی والدہ کے ترکہ کا وارث بنے گا، اور اگر تو اس کے ساتھ وہی معاملہ کرنا چاہے جو پہلے کرتا تھا تو کرسکتا ہے۔ حضرت حمیدّ فرماتے ہیں کہ میں نے اس کو دیکھا ہے، اس کا نام لبیبہ تھا۔ [مصنف ابن ابي شيبه/كتاب البيوع والأقضية/حدیث: 22285]