حضرت حسن رحمہ اللہ اور محمد رحمہ اللہ فرماتے ہیں اگر باندی کا آقا سے بچہ ضائع ہوجائے تو وہ آزاد ہے۔ [مصنف ابن ابي شيبه/كتاب البيوع والأقضية/حدیث: 22826]

حضرت زہری رحمہ اللہ فرماتے ہیں کہ ام ولد آزاد ہوگی جب اس کا ناتمام بچہ ضائع ہوجائے جبکہ معلوم بھی ہو کہ وہ ناتمام ضائع ہوا ہے۔ [مصنف ابن ابي شيبه/كتاب البيوع والأقضية/حدیث: 22827]

حضرت حماد ام ولد کے متعلق فرماتے ہیں کہ جب وہ ناتمام بچہ گوشت کے لوتھڑے کی صورت میں جن دے تو باندی آزاد شمار ہوگی۔ [مصنف ابن ابي شيبه/كتاب البيوع والأقضية/حدیث: 22828]

راوی کہتے ہیں کہ میں نے حضرت عطا رحمہ اللہ سے دریافت کیا کہ ہم لوگوں کا سامان تجارت ان کے لئے لے کر جاتے ہیں، پھر راستے میں ہمیں اس کی ضرورت پڑجاتی ہے تو ہمارے لیے کیا حکم ہے؟ آیا ہم اسے لے سکتے ہیں؟ آپ نے فرمایا: جب تم منزل مقصود پر پہنچو گے تو کیا سامان والوں کے لئے ان کی ضرورت کی چیزیں خرید لو گے اور اسے روک کر نہیں رکھو گے؟ میں نے عرض کیا کیوں نہیں، آپ نے فرمایا پھر کوئی حرج نہیں۔ یہ سامان والے کے لئے زیادہ بہتر ہے۔ [مصنف ابن ابي شيبه/كتاب البيوع والأقضية/حدیث: 22829]

حضرت حسن رحمہ اللہ سے دریافت کیا گیا کہ ایک شخص کو کچھ دراہم دئیے گئے تاکہ وہ ان سے کوئی چیز خریدے، اس نے وہ دراہم اپنی ضرورت میں خرچ کر دئیے، پھر ان کو واپس کردیا اور اس کے ساتھ وہی چیز خریدی جس کا اس کو کہا گیا تھا، آپ رحمہ اللہ نے فرمایا جب تک وہ مالک کے سپرد نہ کر دے وہ ضامن ہوگا۔ [مصنف ابن ابي شيبه/كتاب البيوع والأقضية/حدیث: 22830]

حضرت ابن مسعود رضی اللہ عنہ ایک شخص کے پاس سے گزرے جو برادہ تول رہا تھا اور اس نے ترازو کو جھکا دیا تھا۔ حضرت ابن مسعود نے فرمایا: ترازو کی زبان کو برابر کرو، جب وہ برابر ہوجائے تو اپنے مال میں سے جو چاہو اضافہ کردو۔ [مصنف ابن ابي شيبه/كتاب البيوع والأقضية/حدیث: 22831]

حضرت ابو الہذیل فرماتے ہیں کہ میں نے حضرت عمار بن یاسر رضی اللہ عنہ کو چارہ (قَت) خریدتے ہوئے دیکھا، آپ رضی اللہ عنہ اس سے ایک ڈوری زیادہ مانگ رہے تھے اس نے زیادہ دینے سے انکار کردیا، میں نے حضرت عمار رضی اللہ عنہ کو دیکھا آپ رضی اللہ عنہ اس سے جھگڑا کر رہے تھے، پھر مجھے نہیں معلوم اس جھگڑے میں کون غالب آیا۔ [مصنف ابن ابي شيبه/كتاب البيوع والأقضية/حدیث: 22832]

حضرت ابن ابو ھذیل رحمہ اللہ سے اسی بھی طرح مروی ہے۔ [مصنف ابن ابي شيبه/كتاب البيوع والأقضية/حدیث: 22833]

حضرت علی رضی اللہ عنہ ایک باندی کے پا س سے گذرے جو گوشت خرید رہی تھی، اور باندی دو کان دار سے کہہ رہی تھی کہ کچھ زیادہ ڈال۔ حضرت علی رضی اللہ عنہ نے دو کاندار سے فرمایا: اس کو کچھ زیادہ ڈال کردو، بیشک یہ بیع میں برکت کے لئے بہت بڑا سبب ہے۔ [مصنف ابن ابي شيبه/كتاب البيوع والأقضية/حدیث: 22834]

حضرت ابراہیم رحمہ اللہ فرماتے ہیں کہ بیع میں کچھ زیادہ طلب کرنے میں کوئی حرج نہیں ہے۔ [مصنف ابن ابي شيبه/كتاب البيوع والأقضية/حدیث: 22835]