حضرت سعیدنے قرآن پاک کی آیت فَرھَانٌ مقبوضۃٌ کی تلاوت فرمائی اور فرمایا: جب تک وصول نہ ہوجائے رہن شمار نہ ہوگا۔ [مصنف ابن ابي شيبه/كتاب البيوع والأقضية/حدیث: 22816]

حضرت ابراہیم رحمہ اللہ اس کو ناپسند سمجھتے تھے کہ کوئی شخص کسی کو اس شرط پر مال مضاربت دے کہ وہ اس کو کوئی سامان دے دے۔ [مصنف ابن ابي شيبه/كتاب البيوع والأقضية/حدیث: 22817]

حضرت طاؤس رحمہ اللہ بھی اس کو مکروہ سمجھتے تھے۔ [مصنف ابن ابي شيبه/كتاب البيوع والأقضية/حدیث: 22818]

حسن رحمہ اللہ سے دریافت کیا گیا کہ کسی شخص کو اس شرط پر مال مضاربت دینا کہ وہ سامان دے دے؟ آپ رحمہ اللہ نے اس کو ناپسند سمجھا۔ [مصنف ابن ابي شيبه/كتاب البيوع والأقضية/حدیث: 22819]

حضرت ابن سیرین رحمہ اللہ اس میں کوئی حرج نہ سمجھتے تھے۔ [مصنف ابن ابي شيبه/كتاب البيوع والأقضية/حدیث: 22820]

حضرت محمد بن سیرین رحمہ اللہ فرماتے ہیں کہ کوئی شخص کسی کو مال مضاربت دے اور اس پر سامان کی یا کام کرنے کی شرط لگائے تو اس میں کوئی حرج نہیں ہے۔ [مصنف ابن ابي شيبه/كتاب البيوع والأقضية/حدیث: 22821]

حضرت عمر رضی اللہ عنہام ولد کے متعلق فرماتے ہیں کہ اس کا بچہ اس کو آزاد کرا دے گا اگرچہ وہ ناتمام بچہ ہی کیوں نہ ہو۔ [مصنف ابن ابي شيبه/كتاب البيوع والأقضية/حدیث: 22822]

حضرت محمد بن عبد اللہ بن قارب ثقفی رحمہ اللہ اپنے والد سے روایت کرتے ہیں کہ انہوں نے ایک شخص سے چار ہزار درہم میں باندی خریدی، اس باندی کا اپنے آقا سے ایک (ناتمام) بچہ ضائع ہوچکا تھا۔ جب حضرت عمر رضی اللہ عنہ کو اس کی خبر پہنچی تو تشریف لائے اور انہیں اپنے دُرّے سے مارا اور فرمایا: تمہارا گوشت اس کے گوشت کے ساتھ ملنے کے بعد، اور تمہارا خون اس کے خون کے ساتھ ملنے کے بعد تم اس کو فروخت کرتے ہو؟ اللہ کی لعنت ہو یہودیوں پر کہ ان پر چربی حرام کی گئی تو انہوں نے چربی فروخت کر کے اس کی قیمت کو کھالیا۔ [مصنف ابن ابي شيبه/كتاب البيوع والأقضية/حدیث: 22823]

حضرت حسن رحمہ اللہ فرماتے ہیں جب باندی آقا سے حاملہ ہوجائے، پھر اس کا بچہ ضائع ہوجائے اگر تو اس بچے کی خلقت ظاہر ہو تو پھر وہ ام ولد ہے اس باندی کو فروخت کرنے کا کوئی راستہ نہیں ہے۔ [مصنف ابن ابي شيبه/كتاب البيوع والأقضية/حدیث: 22824]

حضرت شعبی رحمہ اللہ فرماتے ہیں کہ جب بچہ خلقت کے چوتھے مرحلے میں ضائع ہوجائے اور اس کی خلقت ظاہر ہوچکی ہو تو اس کی وجہ سے باندی آزاد شمار کی جائے گی۔ [مصنف ابن ابي شيبه/كتاب البيوع والأقضية/حدیث: 22825]