حضرت عطاء فرماتے ہیں کہ مسافر کو اجازت دی گئی جبکہ اس کو کوڑا، عصا اور جوتے اگر ملیں تو استعمال کرلے۔ [مصنف ابن ابي شيبه/كتاب البيوع والأقضية/حدیث: 23026]

حضرت عبد اللہ بن بدر فرماتے ہیں کہ مجھے حضرت عمر رضی اللہ عنہ کے زمانہ خلافت میں اسّی دینار ملے، میں حضرت عمر رضی اللہ عنہ کی خدمت میں لے کر حاضر ہوا آپ رضی اللہ عنہ نے فرمایا ایک سال تک تشہیر کرو، میں نے عرض کیا اگر پھر بھی مالک نہ ملے؟ آپ رضی اللہ عنہ نے فرمایا پھر نفع اٹھا لو۔ [مصنف ابن ابي شيبه/كتاب البيوع والأقضية/حدیث: 23027]

حضرت ابن عباس رضی اللہ عنہما ارشاد فرماتے ہیں کہ لقطہ کو زمین سے مت اٹھاؤ کیوں کہ تیرا اس سے کوئی تعلق نہیں ہے۔ [مصنف ابن ابي شيبه/كتاب البيوع والأقضية/حدیث: 23028]

حضرت مجاہد رحمہ اللہ اور حضرت ابن عمر رضی اللہ عنہما بیت اللہ کا طواف کر رہے تھے، اُن دونوں نے ایک برتن پایا جس میں جواہرات تھے۔ اُن دونوں حضرات نے اس کی طرف توجہ نہ دی۔ [مصنف ابن ابي شيبه/كتاب البيوع والأقضية/حدیث: 23029]

حضرت ربیع رحمہ اللہ لقطہ اٹھانے کو ناپسند کرتے تھے۔ [مصنف ابن ابي شيبه/كتاب البيوع والأقضية/حدیث: 23030]

حضرت جابر بن زید رحمہ اللہ سے لقطہ کے متعلق دریافت کیا گیا کہ راستہ سے اٹھا سکتے ہیں؟ انہوں نے اس کو ناپسند فرمایا۔ [مصنف ابن ابي شيبه/كتاب البيوع والأقضية/حدیث: 23031]

حضرت شریح رحمہ اللہ راہ چلتے ہوئے دینار کے قریب سے گزرتے تھے لیکن اس کی طرف توجہ ہی نہ فرماتے تھے۔ [مصنف ابن ابي شيبه/كتاب البيوع والأقضية/حدیث: 23032]

حضرت ابوہریرہ رضی اللہ عنہ نے گِرا ہوا ایک دینار دیکھا تو اس کو اپنے پاؤں سے لڑھکا دیا یہاں تک کہ وہ امام کی جگہ کے قریب آگیا تو پھر آپ نے اس کو وہیں چھوڑ دیا۔ [مصنف ابن ابي شيبه/كتاب البيوع والأقضية/حدیث: 23033]

حضرت عطاء بن ابی رباح سے ایک شخص نے دریافت کیا کہ لقطہ کا اٹھانا بہتر ہے یا چھوڑ دینا؟ آپ رحمہ اللہ نے فرمایا چھوڑ دینا بہتر ہے۔ [مصنف ابن ابي شيبه/كتاب البيوع والأقضية/حدیث: 23034]

حضرت عبد اللہ بن دینار فرماتے ہیں کہ میں نے حضرت ابن عمر رضی اللہ عنہما سے عرض کیا کہ مجھے لقطہ ملا ہے، آپ نے فرمایا اس کو کیوں اٹھایا ہے؟ [مصنف ابن ابي شيبه/كتاب البيوع والأقضية/حدیث: 23035]