حضرت عمر رضی اللہ عنہ فرماتے ہیں کہ آنحضرت صلی اللہ علیہ وسلم نے میرے لئے کچھ مال بھیجا جو میں نے واپس کردیا۔ پھر جب میں آپ صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے دریافت فرمایا: جو مال میں نے تمہارے طرف بھیجا تھا اس کو واپس کرنے پر کس چیز نے تمہیں ابھارا؟ میں نے عرض کیا کہ اے اللہ کے رسول صلی اللہ علیہ وسلم ! آپ صلی اللہ علیہ وسلم نے مجھ سے فرمایا تھا: تمہارے لئے یہی بہتر ہے کہ تم لوگوں سے کچھ مت لینا۔ آپ صلی اللہ علیہ وسلم نے ارشاد فرمایا: یہ اس وقت ہے جب تم خود لوگوں سے سوال کرو۔ جو تمہارے پاس بغیر سوال کے آئے وہ اللہ کا عطاء کردہ رزق ہے جو اللہ تمہیں عطا فرما رہا ہے۔ [مصنف ابن ابي شيبه/كتاب البيوع والأقضية/حدیث: 23376]

حضرت اسود رحمہ اللہ نے حضرت شریح رحمہ اللہ کو ایک اونٹنی ہدیہ دی جو انہوں نے قبول فرما لی۔ [مصنف ابن ابي شيبه/كتاب البيوع والأقضية/حدیث: 23377]

ابراہیم رحمہ اللہ فرماتے ہیں کہ حضرت شریح رحمہ اللہ نے حضرت اسود رحمہ اللہ کو اونٹنی ہدیہ دی۔ انہوں نے حضرت علقمہ رحمہ اللہ سے اس کے متعلق دریافت فرمایا کہ آپ کی کیا رائے ہے؟ حضرت علقمہ رحمہ اللہ نے فرمایا تمہارے بھائی نے تمہارا اکرام کیا ہے میرے خیال میں تم قبول کرلو۔ حضرت اسود نے وہ قبول فرما لیا۔ [مصنف ابن ابي شيبه/كتاب البيوع والأقضية/حدیث: 23378]

حضرت اعمش فرماتے ہیں کہ بعض اوقات ابن الہیثم حضرت ابراہیم کو کانے/بانس کی لکڑی کا گٹھہ ہدیہ میں دیتے جن کو وہ قبول فرما لیتے۔ [مصنف ابن ابي شيبه/كتاب البيوع والأقضية/حدیث: 23379]

حضرت اعمش فرماتے ہیں کہ حضرت ابراہیم کو ایک شیرہ ہدیہ دیا گیا جو کہ میٹھا تھا۔ آپ رحمہ اللہ نے اس کو پھینک (گرا) دیا۔ [مصنف ابن ابي شيبه/كتاب البيوع والأقضية/حدیث: 23380]

حضرت عمر بن عبد العزیز سے مروی ہے کہ آنحضرت صلی اللہ علیہ وسلم نے ارشاد فرمایا: ہدیہ دیا کرو اس سے حسد ختم ہوجاتا ہے۔ اور آپس میں مصافحہ کیا کرو اس سے کینہ اور بغض ختم ہوتا ہے۔ [مصنف ابن ابي شيبه/كتاب البيوع والأقضية/حدیث: 23381]

حضرت قیس بن یسیر بن عمرو اپنے والد سے روایت کرتے ہیں کہ حضرت اویس قرنی بےلباس تھے، میرے والد نے ان کو کپڑے ہدیہ دئیے۔ انہوں نے قبول فرما لیے۔ [مصنف ابن ابي شيبه/كتاب البيوع والأقضية/حدیث: 23382]

حضرت محمد بن واسع الازدی رحمہ اللہ فرماتے ہیں چار صورتوں کے علاوہ مال حلال نہیں ہے۔ مسلمانوں کے مال فئے کا حصہ یا حلال تجارت ہو، یا کوئی مسلمان بھائی ہدیہ دے، یا اللہ کی کتاب کے مطابق میراث کا حصہ ہو۔ [مصنف ابن ابي شيبه/كتاب البيوع والأقضية/حدیث: 23383]

حضرت مجاہد سے دریافت کیا گیا کہ ایک شخص کو دو آدمی مال دینا چاہتے ہیں۔ ان میں سے ایک مسلمان بھائی ہے اور دوسرا بادشاہ کا رشتہ دار، وہ کس کا قبول کرے؟ آپ رحمہ اللہ نے فرمایا: رشتہ دار سے۔ [مصنف ابن ابي شيبه/كتاب البيوع والأقضية/حدیث: 23384]

حضرت ابو الدرداء رضی اللہ عنہارشاد فرماتے ہیں جب تم میں سے کسی کو تمہارا کوئی بھائی ہدیہ دے تو اس کے ہدیہ کو قبول کرلو۔ پھر اگر وہ محتاج ہو تو اس کو خرچ کرے۔ اور اگر وہ مستغنی ہے (مال دار ہے) تو کسی ضرورت مند کو دے دے۔ (اس پر خرچ کر دے) [مصنف ابن ابي شيبه/كتاب البيوع والأقضية/حدیث: 23385]