حضرت سعید بن زید رضی اللہ عنہ فرماتے ہیں کہ میں نے رسول اکرم صلی اللہ علیہ وسلم کو فرماتے ہوئے سنا: کوئی شخص زمین کی ایک بالشت ناحق لے لے، اس کو قیامت کے دن سات زمینوں کا اس کے گلے میں طوق ڈالا جائے گا۔ [مصنف ابن ابي شيبه/كتاب البيوع والأقضية/حدیث: 23416]

حضرت ابو عمرو الشیبانی رحمہ اللہ فرماتے ہیں کہ مجھے خبر دی گئی کہ جو شخص کوئی زمین چرائے اس کے لئے کوئی توبہ نہیں ہوگی جب تک وہ کوئی ایسی زمین پاتا رہے جسے وہ کھودے۔ [مصنف ابن ابي شيبه/كتاب البيوع والأقضية/حدیث: 23417]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: جو شخص ناحق زمین کی ایک بالشت لے لے تو قیامت کے دن سات زمینوں کا اس کے گلے میں طوق ڈالا جائے گا۔ [مصنف ابن ابي شيبه/كتاب البيوع والأقضية/حدیث: 23418]

حضرت ابو طفیل فرماتے ہیں کہ میں حضرت علی رضی اللہ عنہ کی خدمت میں حاضر تھا، آپ کے پاس ایک شخص آیا اور عرض کیا، کیا آنحضرت صلی اللہ علیہ وسلم نے آپ کو کچھ راز کی باتیں بتائی ہیں؟ حضرت علی رضی اللہ عنہ غصہ میں آگئے اور فرمایا کہ آنحضرت صلی اللہ علیہ وسلم نے مجھ سے ایسی کوئی سرگوشی نہیں فرمائی جس کو لوگوں سے چھپایا ہو، سوائے اس کے کہ مجھے چار کلمات سکھلائے ہیں، اس نے عرض کی کیا وہ کون سے کلمات ہیں؟ آپ رضی اللہ عنہ نے فرمایا: اس پر اللہ کی لعنت جو والدین پر لعنت کرے، اور اس پر اللہ کی لعنت جو غیر اللہ کے نام پر ذ بح کرے، اس پر اللہ کی لعنت جو فسادی کو ٹھکانہ دے، اور اس پر اللہ کی لعنت جو زمین کی حد بندی کے نشانات کو تبدیل کر دے۔ [مصنف ابن ابي شيبه/كتاب البيوع والأقضية/حدیث: 23419]

حضرت ابو مالک اشعری رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا؛ اللہ کے نزدیک قیامت کے دن سب سے بڑا دھوکہ یہ ہوگا کہ کسی شخص کی ایک ہاتھ زمین دوسرا چرا لے، اور دو پڑوسیوں کے درمیان زمین مشترک ہو اور ان میں سے ایک ساتھی کی زمین پر قبضہ کرلے، پس ایسے شخص کے گلے میں سات زمینوں کا طوق ڈالا جائے گا۔ [مصنف ابن ابي شيبه/كتاب البيوع والأقضية/حدیث: 23420]

حضرت ابن سابط فرماتے ہیں کہ آنحضرت صلی اللہ علیہ وسلم نے چار آدمیوں پر لعنت فرمائی، جو غیر اللہ کے نام پر قربانی کرے، جو فسادی کو ٹھکانہ دے، جو والدین کی نافرمانی کرے، اور جو منار کو چوری کرے، راوی کہتے ہیں کہ میں نے پوچھا کہ منار سے کیا مراد ہے؟ جو اپنے بھائی کی زمین لے کر اپنی زمین میں شامل کرلے۔ [مصنف ابن ابي شيبه/كتاب البيوع والأقضية/حدیث: 23421]

حضرت مسروق فرماتے ہیں کہ جو شخص ناحق زمین کی ایک بالشت پر قبضہ کرلے تو قیامت کے دن زمین کے طبقات اس کے گلے کا طوق بنیں گے، اور وہ اس کو اٹھا نہ سکیں گے۔ [مصنف ابن ابي شيبه/كتاب البيوع والأقضية/حدیث: 23422]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وسلم نے ارشاد فرمایا: اس پر لعنت ہے جو بغیر حق کے زمین کی حدود میں سے کچھ کمی کر دے۔ [مصنف ابن ابي شيبه/كتاب البيوع والأقضية/حدیث: 23423]

حضرت عطاء فرماتے ہیں کہ ہمیں یہ بات پہنچی ہے کہ نبی کریم صلی اللہ علیہ وسلم نے ارشاد فرمایا: مؤمن اپنی شروط کے مطابق معاملہ کریں گے۔ [مصنف ابن ابي شيبه/كتاب البيوع والأقضية/حدیث: 23424]

حضرت عمر رضی اللہ عنہارشاد فرماتے ہیں کہ مسلمان اپنی شرط کے موافق معاملہ کرے گا۔ [مصنف ابن ابي شيبه/كتاب البيوع والأقضية/حدیث: 23425]