حضرت عبد الکریم فرماتے ہیں کہ میرے ماموں کی بیوی فوت ہوگئی، اور ماموں مالدار تھے، اس نے ایک خادمہ اور چھوٹے بچے چھوڑے، حضرت سعید بن جبیر رحمہ اللہ نے فرمایا: اس میں کوئی حرج نہیں کہ باپ اس خادمہ میں بچوں کے حصوں کی قیمت لگا لے اور پھر اس خادمہ سے ہمبستری کرے۔ [مصنف ابن ابي شيبه/كتاب البيوع والأقضية/حدیث: 23846]

حضرت سفیان فرماتے ہیں کہ میں نے حضرت طاوس اور حسن سے اس کے متعلق دریافت کیا؟ آپ دونوں نے فرمایا: اس سے ہمبستری کرنے میں کوئی حرج نہیں ہے۔ [مصنف ابن ابي شيبه/كتاب البيوع والأقضية/حدیث: 23847]

حضرت موسیٰ فرماتے ہیں کہ ان کی دادی کا حضرت ابو بردہ رحمہ اللہ کے پاس انتقال ہوا، حضرت ابو بردہ نے ان کی کچھ لونڈیوں کو اپنے لئے خاص کرلیا، میں نے ان سے عرض کیا، آپ کو ابن عون نے محمد سے روایت کی ہے کہ اگر کوئی شخص چھوٹے بچے کی باندی لینے کا ارادہ رکھتا ہو تو اس کو اس پر ان کی قیمت لگائے، اور ان کے لئے ان کے ثمن کا گواہ بنا لے؟ آپ نے فرمایا: ہاں میں نے سنا ہوا ہے۔ [مصنف ابن ابي شيبه/كتاب البيوع والأقضية/حدیث: 23848]

حضرت اسماعیل سے مروی ہے کہ ایک خاتون کا انتقال ہوا اس نے ایک چھوٹا بچہ اور باندی چھوڑی، اس کے والد نے باندی کو خریدنے کا ارادہ کیا، حضرت سعید نے فرمایا: بازار میں جا کر اس کی قیمت لگاؤ، پھر اس کے ثمن پر گواہ بناؤ، پھر اس کے بعد جو تمہارا دل چاہے اس کے ساتھ کرو۔ [مصنف ابن ابي شيبه/كتاب البيوع والأقضية/حدیث: 23849]

حضرت عمر بن عبد العزیز نے تحریر فرمایا: بازار والوں سے کرایہ وصول نہ کیا جائے۔ [مصنف ابن ابي شيبه/كتاب البيوع والأقضية/حدیث: 23850]

حضرت الاصبغ فرماتے ہیں کہ علی رضی اللہ عنہ کے زمانہ میں ہمارا یہ دستور تھا کہ جو شخص بازار میں کسی جگہ کو پہلے حاصل کرلیتا وہی رات تک اس جگہ کا زیادہ حق دار ہوتا۔ [مصنف ابن ابي شيبه/كتاب البيوع والأقضية/حدیث: 23851]

حضرت حسن سے بازار کی دکانوں اور چبوتروں کے متعلق دریافت کیا گیا؟ انہوں نے اس کی بیع و شراء اور کرایہ پر دینے کو ناپسند فرمایا۔ [مصنف ابن ابي شيبه/كتاب البيوع والأقضية/حدیث: 23852]

حضرت عمر رضی اللہ عنہ سوار ہو کر بازار میں تشریف لائے، آپ رضی اللہ عنہ نے بازار میں ایک نئی دکان دیکھی تو اس کو گرا دیا۔ [مصنف ابن ابي شيبه/كتاب البيوع والأقضية/حدیث: 23853]

حضرت مجالد فرماتے ہیں کہ سب سے پہلے زیاد نے بازار والوں سے کرایہ وصول کیا۔ [مصنف ابن ابي شيبه/كتاب البيوع والأقضية/حدیث: 23854]

نبی کریم صلی اللہ علیہ وسلم نے ارشاد فرمایا: مالدار کا ٹال مٹول کرنا اس سے قرض کا مطالبہ کرنے اور اس کو سزا دینے کو حلال کر دیتا ہے۔ [مصنف ابن ابي شيبه/كتاب البيوع والأقضية/حدیث: 23855]