حضرت طاؤس اس بات پر قسم اٹھاتے تھے کہ خیار رضا مندی کے بعد ہے۔ [مصنف ابن ابي شيبه/كتاب البيوع والأقضية/حدیث: 23876]

نبی کریم صلی اللہ علیہ وسلم نے ارشاد فرمایا: بیع رضا مندی کے ساتھ ہے، اور خیار بیع مکمل ہونے کے بعد ہے، اور کسی مسلمان کے لئے حلال نہیں کہ وہ کسی دوسرے مسلمان کو دھوکا دے۔ [مصنف ابن ابي شيبه/كتاب البيوع والأقضية/حدیث: 23877]

حضرت حسن بن علی رضی اللہ عنہ نے اپنی بیوی سے اس کی میراث کا حصہ خریدا، پھر فرمایا: جب میں مر جاؤں تو پھر اس کو اختیار دیا جائے۔ [مصنف ابن ابي شيبه/كتاب البيوع والأقضية/حدیث: 23878]

حضرت شریح سے دریافت کیا گیا کہ ایک شخص نے کچھ وقت کے لئے کرایہ پر مکان لیا ہے، پھر وہ اس میں رہا اب وہ نکلنا چاہتا ہے؟ آپ نے فرمایا: جب وہ مکان کی چابیاں لے کر آجائے تو وہ اس سے بری ہے، اور جتنا عرصہ وہ رہا ہے اس کا کرایہ اس پر ہے۔ [مصنف ابن ابي شيبه/كتاب البيوع والأقضية/حدیث: 23879]

حضرت شریح سے اسی طرح مروی ہے۔ [مصنف ابن ابي شيبه/كتاب البيوع والأقضية/حدیث: 23880]

حضرت شریح فرماتے ہیں جتنا وہ اس میں رہا ہے اس پر اس کا کرایہ لازم ہے۔ [مصنف ابن ابي شيبه/كتاب البيوع والأقضية/حدیث: 23881]

حضرت سلم فرماتے ہیں کہ میں نے حضرت محمد بن سیرین سے دریافت کیا کہ ایک شخص نے دو مہینے کے لئے ایک شخص کو سامان فروخت کیا، اور مشتری پر یہ شرط لگا دی کہ اگر اس کو دو ماہ سے قبل فروخت کیا تو ثمن نقد دینا ہوگا؟ آپ نے فرمایا میں تو اس میں کوئی حرج نہیں سمجھتا۔ [مصنف ابن ابي شيبه/كتاب البيوع والأقضية/حدیث: 23882]

ابراہیم فرماتے ہیں کہ آدمی گھر خریدے پھر مشتری بائع سے یوں کہے کہ جب بھی تو اس کے پیسے لے کر میرے پاس آیا تو وہ تجھ پر رَد ہوگا، تو یہ شرط باطل ہوگی اور بیع لازم ہوجائے گی۔ [مصنف ابن ابي شيبه/كتاب البيوع والأقضية/حدیث: 23883]

ابراہیم فرماتے ہیں کہ بیع میں جو بھی شرط لگائی جائے تو بیع اس شرط کو منہدم کردیتی ہے۔ [مصنف ابن ابي شيبه/كتاب البيوع والأقضية/حدیث: 23884]

نبی کریم صلی اللہ علیہ وسلم نے ارشاد فرمایا: بیشک زمین کی کاشت صرف تین طرح سے ہے، ایک وہ شخص جس کو زمین دی جائے تو وہ اس میں کاشت کرے، دوسرا وہ شخص جس کی اپنی زمین ہے اور اس کو کاشت کرتا ہے اور تیسرا وہ شخص جو زمین کو سونے اور چاندی کے بدلے کرایہ پر لے۔ [مصنف ابن ابي شيبه/كتاب البيوع والأقضية/حدیث: 23885]