حضرت عبد الملک بن عمیر سے روایت ہے۔ کہتے ہیں کہ حارث بن کلدہ جو کہ پر عرب کے طبیب تھے۔ کہتے ہیں۔ میں سورج کو تین وجہ سے ناپسند کرتا ہوں۔ بو کو خراب کردیتا ہے۔ کپڑے کو پرانا کردیتا ہے۔ اور دبی ہوئی بیماری کو باہر نکال دیتا ہے۔ [مصنف ابن ابي شيبه/ كتاب الطب/حدیث: 25268]

حضرت محفوظ بن علقمہ سے روایت ہے کہ نبی کریم صلی اللہ علیہ وآلہ وسلم نے ایک آدمی کو دھوپ میں (کھڑے) دیکھا تو آپ صلی اللہ علیہ وآلہ وسلم نے فرمایا: ”تم سایہ کی طرف چلے جاؤ۔ پس بلاشبہ وہ بابرکت چیز ہے۔“ [مصنف ابن ابي شيبه/ كتاب الطب/حدیث: 25269]

حضرت قیس سے روایت ہے، کہتے ہیں کہ میرے والد اس حالت میں تشریف لائے جبکہ آپ صلی اللہ علیہ وآلہ وسلم خطبہ ارشاد فرما رہے تھے۔ اور (آ کر) آپ صلی اللہ علیہ وآلہ وسلم کے سامنے دھوپ میں کھڑے ہوگئے تو آپ صلی اللہ علیہ وآلہ وسلم نے انہیں حکم دیا تو وہ سایہ کی طرف چل دئیے۔ [مصنف ابن ابي شيبه/ كتاب الطب/حدیث: 25270]

حضرت شمر سے روایت ہے، کہتے ہیں کہ حضرت عمر نے ارشاد فرمایا: ”دھوپ کی طرف اپنی پیشانیوں کو کرو۔ کیونکہ یہ عرب کا حمام ہے۔ [مصنف ابن ابي شيبه/ كتاب الطب/حدیث: 25271]

حضرت مجاہد سے روایت ہے، کہتے ہیں کہ آب زم زم، ہر اس چیز کے لئے شفاء ہے جس کے لئے اس کو پیا جائے۔ [مصنف ابن ابي شيبه/ كتاب الطب/حدیث: 25272]

حضرت عطاء سے آب زم زم کو حرم سے باہر لے جانے کے بارے میں سوال کیا گیا تو انہوں نے فرمایا: کعب بارہ عدد راویۃً کو شام کی طرف لے گئے اور وہ اس کے ذریعہ شفاء حاصل کرتے ہیں۔ [مصنف ابن ابي شيبه/ كتاب الطب/حدیث: 25273]

حضرت جابر سے روایت ہے، کہتے ہیں کہ جناب نبی کریم صلی اللہ علیہ وآلہ وسلم کا ارشاد ہے کہ ”آب زم زم ہر اس مقصد کو پورا کرتا ہے۔ جس کے لیے اس کو پیا جائے۔“ [مصنف ابن ابي شيبه/ كتاب الطب/حدیث: 25274]

حضرت ابو عثمان نہدی سے روایت ہے، کہتے ہیں کہ رسول اللہ صلی اللہ علیہ وآلہ وسلم نے اپنے صحابہ کے ہمراہ ایک غزوہ کا سفر کیا۔ اس دوران کچھ لوگ بھوک کی حالت میں ایک سرسبز درخت کے پاس سے گزرے تو انہوں نے اس درخت کو کھانا شروع کیا۔ پس یوں محسوس ہوا کہ ان پر کوئی ہوا آئی اور انہیں بجھا ہوا کرگئی ہے۔ اس پر جناب نبی کریم صلی اللہ علیہ وآلہ وسلم نے ارشاد فرمایا: ”چھوٹے مشکیزے میں پانی کو ٹھنڈا کرو اور پھر صبح کی دو اذانوں کے درمیان تم اس پانی کو اپنے اوپر بہا ڈالو اور پانی کو تیزی سے بہاؤ اور اس پر اللہ کا نام یاد کرو۔ ‘ ‘ چناچہ صحابہ کرام (رضی اللہ عنہم) نے یہ عمل کیا تو (اس کا اثر یہ ہوا کہ) گویا وہ لوگ بندھن سے کھول دئیے گئے ہیں۔ [مصنف ابن ابي شيبه/ كتاب الطب/حدیث: 25275]

حضرت عاصم احول بیان کرتے ہیں کہ حضرت ابن سیرین نے ایک دن کھانا کھایا اور پھر دائیں کروٹ پر تکیہ لگا لیا۔ عاصم کہتے ہیں۔ میں نے ان سے کہا۔ اطباء اس بات کو ناپسند کرتے ہیں کہ آدمی کھانا کھائے اور دائیں کروٹ پر تکیہ لگائے۔ تو حضرت ابن سیرین نے فرمایا۔ حضرت کعب اس کو مکروہ نہیں سمجھتے تھے۔ وہ کہا کرتے تھے۔ تم اپنے دائیں پہلو پر تکیہ لگاؤ پھر قبلہ رُخ ہو جاؤ، کیونکہ یہی اس کی تکمیل ہے۔ [مصنف ابن ابي شيبه/ كتاب الطب/حدیث: 25276]

حضرت قیس بن ابی حازم سے روایت ہے، کہتے ہیں کہ مقام مدائن میں ایک آدمی بیمار ہوگیا۔ راوی کہتے ہیں: میرے خیال میں وہ منافق تھا تو حضرت حذیفہ رضی اللہ عنہ نے فرمایا: اس آدمی کو فرات کے پانی میں لے جاؤ۔ کیونکہ فرات کا پانی دجلہ کے پانی سے ہلکا ہے۔ راوی کہتے ہیں۔ پس اس آدمی کو لے جایا گیا تو وہ مرگیا۔ [مصنف ابن ابي شيبه/ كتاب الطب/حدیث: 25277]