اہل واسط کے ایک شیخ سے روایت ہے، کہتے ہیں کہ میں نے حضرت ابو عیاض سے جانور کے زخم پر خنزیر کا بال رکھنے کے بارے میں سوال کیا؟ تو انہوں نے اس کو ناپسند کیا۔ [مصنف ابن ابي شيبه/ كتاب الطب/حدیث: 25248]

حسن اور محمد کے بارے میں روایت ہے کہ یہ دونوں اس بات کو ناپسند کرتے تھے کہ بچہ کا سر، عقیقہ کے خون سے مالش کیا جائے۔ [مصنف ابن ابي شيبه/ كتاب الطب/حدیث: 25249]

اور حسن کہتے ہیں کہ یہ ناپاک چیز ہے۔ [مصنف ابن ابي شيبه/ كتاب الطب/حدیث: 25250]

حضرت سعید بن جبیر کے بارے میں روایت ہے کہ وہ بھیڑیے کے پتے (کے استعمال) کو مکروہ سمجھتے تھے۔ [مصنف ابن ابي شيبه/ كتاب الطب/حدیث: 25251]

حضرت بشیر بن عقبہ ناجی سے روایت ہے۔ کہتے ہیں کہ میں نے حضرت محمد سے بواسیر کاٹنے کے بارے میں سوال کیا؟ تو انہوں نے اس کو ناپسند کیا۔ اور فرمایا: بلکہ اس پر تم سرکہ کا تیل ڈالو۔ [مصنف ابن ابي شيبه/ كتاب الطب/حدیث: 25252]

حضرت ابن عون سے روایت ہے، کہتے ہیں کہ میں نے محمد سے کہا۔ ایک آدمی (علاج کے لئے) اونٹنی کے پیٹ میں ہاتھ ڈالتا ہے؟ انہوں نے جواب دیا۔ میں تو اس کو فساد کا ذریعہ دیکھتا ہوں۔ [مصنف ابن ابي شيبه/ كتاب الطب/حدیث: 25253]

حضرت حسن سے روایت ہے کہ وہ اس عمل کو مکروہ سمجھتے تھے۔ [مصنف ابن ابي شيبه/ كتاب الطب/حدیث: 25254]

حضرت حارث سے روایت ہے۔ کہتے ہیں کہ جب جند باد ستر ذبح شدہ (جانور سے) ہو تو اس کے (استعمال میں) کوئی حرج نہیں ہے۔ [مصنف ابن ابي شيبه/ كتاب الطب/حدیث: 25255]

محمد کے بارے میں روایت ہے کہ ان سے جند باد ستر کے بارے میں پوچھا گیا؟ تو انہوں نے کہا۔ جب یہ ذبح شدہ (جانور سے) ہو تو اس کے استعمال میں کوئی حرج نہیں ہے لیکن وہ غیر ذبح شدہ کے بارے میں کراہت کے قائل تھے۔ [مصنف ابن ابي شيبه/ كتاب الطب/حدیث: 25256]

حضرت داؤد سے روایت ہے، کہتے ہیں کہ حضرت شعبی سے سوال کیا گیا کہ ایک شخص کتے کے گوشت کے ذریعہ علاج کرتا ہے؟ تو حضرت شعبی نے جواب دیا۔ یہ آدمی اگر کتے کے گوشت سے علاج کرتا ہے تو اللہ تعالیٰ اس کو شفاء ہی نہ دے۔ [مصنف ابن ابي شيبه/ كتاب الطب/حدیث: 25257]