حضرت حسن کے بارے میں روایت ہے کہ وہ ایسی دواء کو ناپسند کرتے تھے جس میں پیشاب ڈالا جائے اور اس سے منع کرتے تھے۔ [مصنف ابن ابي شيبه/ كتاب الطب/حدیث: 25278]

حضرت عطاء سے اس عورت کے بارے میں جس کی ہڈی ٹوٹ جائے، مروی ہے، کہتے ہیں کہ اس بات میں کوئی حرج نہیں ہے کہ آدمی اس کی ہڈی جوڑے۔ [مصنف ابن ابي شيبه/ كتاب الطب/حدیث: 25279]

حضرت عبد اللہ بن معقل کے بارے میں روایت ہے کہ انہوں نے اس عورت کے بارے میں جس کو زخم لگا ہوا ہو۔ فرمایا: ایک چمڑا لے کر اس کو سوراخ کرلیا جائے اور پھر آدمی اس عورت کا علاج کرے۔ [مصنف ابن ابي شيبه/ كتاب الطب/حدیث: 25280]

حضرت قتادہ سے روایت ہے، کہتے ہیں کہ میں نے حضرت جابر بن زید سے پوچھا کہ ایک عورت کی ران یا بازو ٹوٹ جاتی ہے تو کیا میں اس کو جوڑ سکتا ہوں؟ انہوں نے فرمایا: ہاں۔ [مصنف ابن ابي شيبه/ كتاب الطب/حدیث: 25281]

حضرت سلمہ بن وہرام سے روایت ہے، کہتے ہیں کہ میں نے حضرت طاؤس سے زخمی عورت کے بارے میں سوال کیا کہ طبیب اس کا علاج کیسے کرے گا؟ انہوں نے جواب دیا کہ وہ زخم کے مقام پر کپڑے کو شگاف دے دے اور پھر عورت کا علاج کرے۔ [مصنف ابن ابي شيبه/ كتاب الطب/حدیث: 25282]

حضرت شعبی سے روایت ہے کہ ان سے زخمی عورت کے بارے میں سوال کیا گیا؟ انہوں نے فرمایا: زخم کے مقام پر (کپڑے کو) شگاف دے کر مرد طبیب اس کا علاج کرے گا۔ [مصنف ابن ابي شيبه/ كتاب الطب/حدیث: 25283]

حضرت عامر سے ایسی عورت کے بارے میں جس کی ہڈی ٹوٹ جائے روایت ہے کہ اس میں کوئی حرج نہیں کہ اس کو مرد پٹی کرے۔ [مصنف ابن ابي شيبه/ كتاب الطب/حدیث: 25284]

حضرت حسین بن علی (جعفی) رحمہ اللہ سے روایت ہے، کہتے ہیں کہ میں ابن ابجر کو کہتے سُنا کہ تم رات کو کھانا چھوڑ دو الا یہ کہ تم دن کو روزے سے ہو۔ [مصنف ابن ابي شيبه/ كتاب الطب/حدیث: 25285]

حضرت حسین بن علی (جعفی) رحمہ اللہ کہتے ہیں کہ میں نے ابن ابجر کو کہتے سُنا کہ سارے گوشت گرم ہیں۔ [مصنف ابن ابي شيبه/ كتاب الطب/حدیث: 25286]

حضرت مطر الوراق بیان کرتے ہیں کہ سابقہ انبیاء میں سے کسی نبی نے اللہ تعالیٰ سے ضعف کی شکایت کی تو اللہ تعالیٰ نے ان کو حکم دیا کہ وہ گوشت کو دودھ کے ساتھ پکائیں کیونکہ ان دونوں میں طاقت ہے۔ [مصنف ابن ابي شيبه/ كتاب الطب/حدیث: 25287]