حضرت حسن سے بھی منقول ہے کہ ان دونوں حضرات نے خنزیر کے بالوں سے سلائی کرنے کی اجازت دی ہے۔ [مصنف ابن ابي شيبه/كتاب اللباس/حدیث: 26920]

حضرت ابن سیرین ایسا موزہ استعمال نہیں کرتے تھے جس میں خنزیر کا بال لگایا گیا ہو۔ [مصنف ابن ابي شيبه/كتاب اللباس/حدیث: 26921]

واسط کے ایک بزرگ کہتے ہیں کہ میں نے ابو عیاض سے سوال کیا کہ کیا خنزیز کے بال کو جانور کے زخم پر رکھ سکتے ہیں انہوں نے اسے مکروہ قرار دیا۔ [مصنف ابن ابي شيبه/كتاب اللباس/حدیث: 26922]

حضرت علی رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ہمیں تشہد کی انگلی میں یا درمیانی انگلی میں انگوٹھی پہننے سے منع فرمایا ہے۔ [مصنف ابن ابي شيبه/كتاب اللباس/حدیث: 26923]

حضرت ابراہیم نے اسے مکروہ قرار دیا ہے۔ [مصنف ابن ابي شيبه/كتاب اللباس/حدیث: 26924]

حضرت عائشہ رضی اللہ عنہا فرماتی ہیں کہ میں نے گھر میں تصویروں والے پردے لگائے، جب رسول اللہ صلی اللہ علیہ وآلہ وسلم گھر تشریف لائے تو آپ نے وہ پردے اتار دئیے۔ میں نے ان کے تکیے بنا لیے تو میں نے دیکھا کہ نبی کریم صلی اللہ علیہ وآلہ وسلم نے ان تکیوں میں سے ایک سے ٹیک لگا رکھی تھی۔ [مصنف ابن ابي شيبه/كتاب اللباس/حدیث: 26925]

حضرت بنت سعد فرماتی ہیں کہ میرے والد فارس سے کچھ تکیے لائے جن پر تصویریں تھیں ہم ان تکیوں کو بچھایا کرتے تھے۔ [مصنف ابن ابي شيبه/كتاب اللباس/حدیث: 26926]

حضرت لیث فرماتے ہیں کہ میں نے حضرت سالم بن عبد اللہ کو دیکھا کہ انہوں نے سرخ تکیے پر ٹیک لگا رکھی تھی جس میں تصاویر تھیں۔ میں نے ان سے اس بارے میں سوال کیا تو انہوں نے فرمایا کہ تصویریں اس شخص کے لئے مکروہ ہیں جو انہیں آویزاں کرے اور بنائے۔ [مصنف ابن ابي شيبه/كتاب اللباس/حدیث: 26927]

حضرت ہشام بن عروہ فرماتے ہیں کہ ان کے والد ایسے تکیوں پر ٹیک لگایا کرتے تھے جن پر پرندوں اور آدمیوں کی تصویریں ہوتی تھیں۔ [مصنف ابن ابي شيبه/كتاب اللباس/حدیث: 26928]

حضرت حطان بن عبد اللہ فرماتے ہیں کہ میرے پاس ایک دوست آیا اور اس نے مجھے آواز دی، میں نے جھانک کر اسے دیکھا تو اس نے کہا کہ ہمارے سامنے امیر المؤمنین کا ایک خط پڑھا گیا ہے جس میں لکھا تھا کہ جن گھروں میں ایسے پردے ہیں جن پر تصویریں ہیں ان پر لازم ہے کہ ان پردوں کو اتار دیں۔ پس میں نے رات کو گناہ گار ہونے کی حالت میں گزارنا مناسب نہ سمجھا اور ان پردوں کو اتار دیا۔ [مصنف ابن ابي شيبه/كتاب اللباس/حدیث: 26929]