حضرت سفیان عطار فرماتے ہیں کہ امام شعبی فرمایا کرتے تھے کہ سواری کا مالک آگے بیٹھنے کا زیادہ حقدار ہے۔ [مصنف ابن ابي شيبه/ كتاب الأدب/حدیث: 28064]

حضرت خالد فرماتے ہیں کہ حضرت محمد بن سیرین ایک سواری پر تین آدمیوں کے سوار ہونے کو مکروہ سمجھتے تھے۔ [مصنف ابن ابي شيبه/ كتاب الأدب/حدیث: 28065]

حضرت اجلح فرماتے ہیں کہ امام شعبی نے فرمایا کہ جو کوئی بھی تین آدمی ایک سواری پر سوار ہوئے تو ان میں سے ایک ملعون ہوگا۔ [مصنف ابن ابي شيبه/ كتاب الأدب/حدیث: 28066]

حضرت ابن بریدہ فرماتے ہیں کہ میرے والد نے مجھے دیکھا کہ میں سوار کے پیچھے تیسرا سوار تھا تو آپ نے فرمایا: ملعون شخص۔ [مصنف ابن ابي شيبه/ كتاب الأدب/حدیث: 28067]

حضرت جابر فرماتے ہیں کہ حضرت عامر نے ارشاد فرمایا: کہ میں حیرہ مقام کی طرف نکلا تاکہ میں ہاتھی دیکھوں، پس میں نے حضرت حارث اعور کو سوار دیکھا اس حالت میں کہ ان کے پیچھے کوئی سوار تھا۔ آپ نے فرمایا: اگر تین آدمیوں کا سوار ہونا درست ہوتا تو ہم آپ کو بھی سوار کرلیتے۔ [مصنف ابن ابي شيبه/ كتاب الأدب/حدیث: 28068]

حسن فرماتے ہیں کہ ہم لوگ حضرت مہاجر بن قنفذ رضی اللہ عنہ کے ساتھ گفتگو کر رہے تھے کہ اتنے میں ایک گدھے پر سوار تین لوگ گزرے۔ حضرت مہاجر نے ان میں سے آخری شخص کو کہا: اتر جا اللہ تجھ پر لعنت کرے، ان سے کہا گیا کہ کیا آپ اس انسان پر لعنت کرتے ہیں؟ انہوں نے جواب دیا کہ ہمیں اس بات سے منع کیا گیا ہے کہ ایک جانور پر تین لوگ سوار ہوں۔ [مصنف ابن ابي شيبه/ كتاب الأدب/حدیث: 28069]

حضرت ابو العنبس فرماتے ہیں کہ حضرت زاذان نے ایک خچر پر تین لوگوں کو سوار دیکھا آپ نے فرمایا: کہ چاہیے کہ تم میں سے ایک اتر جائے، اس لیے کہ رسول اللہ صلی اللہ علیہ وآلہ وسلم نے تیسرے سوار پر لعنت فرمائی ہے۔ [مصنف ابن ابي شيبه/ كتاب الأدب/حدیث: 28070]

حضرت طارق بن شھاب فرماتے ہیں کہ حضرت عبد اللہ بن مسعود رضی اللہ عنہ جب فجر کی نماز پڑھ لیتے تو اپنے گھر میں کسی چھوٹے اور بڑے کو سونے کے لیے نہیں چھوڑتے تھے یہاں تک کہ سورج طلوع ہوجاتا۔ [مصنف ابن ابي شيبه/ كتاب الأدب/حدیث: 28071]

حضرت مہاجر بن شماس کے چچا فرماتے ہیں کہ میں ان کھلے میدانوں میں سے ایک میدان کی طرف اپنا پھندا لگانے نکلا کرتا تھا۔ میں تین دن صبح کو نکلا تو فجر کے بعد ایک جگہ ایک آدمی کو بیٹھا دیکھتا رہا۔ میں نے اس سے پوچھا کہ اے اللہ کے بندے تم کون ہو؟ انہوں نے کہا میں حذیفہ رضی اللہ عنہ بن یمان ہوں۔ میں نے کہا کہ تم یہاں کیا کر رہے ہو؟ انہوں نے کہا کہ مں دیکھ رہا ہوں کہ سورج کہاں سے طلوع ہوتا ہے؟ [مصنف ابن ابي شيبه/ كتاب الأدب/حدیث: 28072]

حضرت مدرک بن عوف فرماتے ہیں کہ میرا گزر حضرت بلال پر ہوا اس حال میں کہ وہ شام میں تھے اور صبح کے وقت بیٹھے ہوئے تھے۔ میں نے پوچھا: اے ابو عبد اللہ! کس چیز نے آپ کو یہاں بٹھایا ہوا ہے؟ آپ نے فرمایا: میں سورج کے طلوع ہونے کا انتظار کررہا ہوں۔ [مصنف ابن ابي شيبه/ كتاب الأدب/حدیث: 28073]