حضرت حسین بن عقیل فرماتے ہیں کہ حضرت ضحاک نے مجھے حج کے مناسک کی املاء کروائی۔ [مصنف ابن ابي شيبه/ كتاب الأدب/حدیث: 28124]

حضرت بشیر بن نھیک فرماتے ہیں کہ میں حضرت ابوہریرہ سے جو بھی حدیث سنتا تھا اسے لکھ لیا کرتا تھا۔ جب میں نے ان سے جدا ہونے کا ارادہ کیا تو میں اپنی لکھی ہوئی کا پی لایا اور میں نے عرض کیا: یہ وہ روایات ہیں جو میں نے آپ سے سنی ہیں؟ آپ نے فرمایا: جی ہاں!۔ [مصنف ابن ابي شيبه/ كتاب الأدب/حدیث: 28125]

حضرت یحییٰ بن عتیق فرماتے ہیں کہ حضرت ابن سیرین نے ارشاد فرمایا: میں اطراف (احادیث کے ابتدائی حصے) لے کر عبیدہ سے ملتا اور ان سے پوچھتا تھا۔ [مصنف ابن ابي شيبه/ كتاب الأدب/حدیث: 28126]

حضرت سعید بن جبیر فرماتے ہیں کہ میں حضرت ابن عباس رضی اللہ عنہما کے ساتھ تھا، میں ان سے جو حدیث بھی سنتا اس کو پالان کے اگلے حصہ میں لکھ لیتا، جب میں اترا تو میں نے اسے کاپی میں نقل کرلیا۔ [مصنف ابن ابي شيبه/ كتاب الأدب/حدیث: 28127]

حضرت ایوب فرماتے ہیں کہ حضرت ابو قلابہ نے ارشاد فرمایا: کہ لکھنا میرے نزدیک بھولنے سے زیادہ پسندیدہ ہے۔ [مصنف ابن ابي شيبه/ كتاب الأدب/حدیث: 28128]

حضرت ایوب فرماتے ہیں کہ حضرت ابو الملیح نے ارشاد فرمایا کہ لوگ ہمارے لکھنے پر عیب لگاتے ہیں حالانکہ اللہ رب العزت نے ارشاد فرمایا: ترجمہ: اس کا علم میرے رب کے پاس کتاب میں ہے۔ [مصنف ابن ابي شيبه/ كتاب الأدب/حدیث: 28129]

امام شعبی فرماتے ہیں کہ حضرت عبد الرحمن بن عبد اللہ جب بھی کوئی حدیث سنتے تو اسے لکھ لیتے۔ [مصنف ابن ابي شيبه/ كتاب الأدب/حدیث: 28130]

حضرت عبد اللہ بن حنش فرماتے ہیں کہ میں نے لوگوں کو حضرت براء رضی اللہ عنہ کے پاس دیکھا کہ وہ اپنے ہاتھوں پر قلموں کے ساتھ لکھ رہے تھے۔ [مصنف ابن ابي شيبه/ كتاب الأدب/حدیث: 28131]

حضرت عبد اللہ بن یسار فرماتے ہیں کہ میں نے حضرت علی رضی اللہ عنہ کو خطبہ دیتے ہوئے سنا آپ نے ارشاد فرمایا: میں ہر اس شخص کو تاکیداً کہتا ہوں جس کے پاس کوئی لکھی ہوئی کتاب ہو کہ وہ لوٹ کر اسے مٹا دے۔ اس لیے کہ پہلے لوگ ہلاک ہوئے اس وجہ سے کہ انہوں نے اپنے علماء کی باتوں کو تو تلاش کیا اور اپنے رب کی کتاب کو چھوڑ دیا۔ [مصنف ابن ابي شيبه/ كتاب الأدب/حدیث: 28132]

حضرت ابو نضرہ فرماتے ہیں کہ ہم نے حضرت ابو سعیدخدری کی خدمت میں عرض کیا: اگر آپ اجازت دیں تو ہم حدیث لکھ لیا کریں۔ آپ نے فرمایا؛ ہم تمہیں نہیں لکھوائیں گے، تم ہم سے حدیث حاصل کرو، جیسے ہم نے نبی کریم صلی اللہ علیہ وآلہ وسلم سے حدیث حاصل کی تھی۔ [مصنف ابن ابي شيبه/ كتاب الأدب/حدیث: 28133]