حضرت سلیمان بن اسود محاربی فرماتے ہیں کہ حضرت ابن مسعود علم کے لکھنے کو مکروہ سمجھتے تھے۔ [مصنف ابن ابي شيبه/ كتاب الأدب/حدیث: 28134]

حضرت مغیرہ فرماتے ہیں کہ حضرت عمر اپنے گورنروں کو خط لکھتے تھے کہ میری طرف سے کوئی تحریر ہرگز محفوظ نہ رکھنا۔ [مصنف ابن ابي شيبه/ كتاب الأدب/حدیث: 28135]

ابراہیم فرماتے ہیں کہ حضرت عبیدہ نے مجھے ارشاد فرمایا: کہ میری طرف سے کوئی تحریر ہرگز محفوظ نہ رکھنا۔ [مصنف ابن ابي شيبه/ كتاب الأدب/حدیث: 28136]

حضرت ابو بردہ فرماتے ہیں کہ میں نے اپنے والد سے بہت بڑی کتاب لکھی۔ انہوں نے فرمایا: اپنی کتابیں میرے پاس لاؤ۔ میں ان کے پاس لے آیا تو انہوں نے ان کو دھو دیا۔ [مصنف ابن ابي شيبه/ كتاب الأدب/حدیث: 28137]

حضرت حکم بن عطیہ فرماتے ہیں کہ حضرت ابن سیرین نے ارشاد فرمایا: کہ بنو اسرائیل ان کتابوں کی وجہ سے گمراہ ہوئے جو انہیں اپنے آباؤ اجداد سے ورثہ میں ملی تھیں۔ [مصنف ابن ابي شيبه/ كتاب الأدب/حدیث: 28138]

امام شعبی فرماتے ہیں کہ مروان نے حضرت زید بن ثابت کو بلایا اس حال میں کہ لوگ لکھ رہے تھے اور آپ نہیں جانتے تھے۔ پس لوگوں نے آپ کو بتلایا تو آپ نے فرمایا: شاید کہ وہ حدیثیں جو میں نے تمہیں بیان کیں وہ ایسی نہ ہوں جیسے میں نے تمہیں بیان کی ہیں۔ [مصنف ابن ابي شيبه/ كتاب الأدب/حدیث: 28139]

حضرت اسود بن ہلال فرماتے ہیں کہ حضرت عبداللہ کے پاس ایک صحیفہ لایا گیا جس میں حدیث لکھی ہوئی تھی۔ انہوں نے پانی منگوا کر اسے مٹایا، پھر اسے دھویا، پھر جلانے کا حکم دیا تو اسے جلا دیا گیا۔ پھر فرمایا: میں اللہ کا واسطہ دے کر کہتا ہوں کہ جس شخص کو علم ہو کہ یہ کسی کے پاس ہے تو وہ مجھے ضرور بتائے۔ خدا کی قسم! اگر مجھے پتہ چلے کہ یہ دیرہند میں ہے تو میں اس تک پہنچوں گا۔ تم سے پہلے اہل کتاب اسی وجہ سے ہلاک ہوئے یہاں تک کہ انہوں نے اللہ کی کتاب کو پس پشت ڈال دیا گویا کہ وہ جانتے ہی نہیں۔ [مصنف ابن ابي شيبه/ كتاب الأدب/حدیث: 28140]

حضرت عبد اللہ بن مسلم فرماتے ہیں کہ ان کے والد حضرت مسلم نے ارشاد فرمایا: میں ہر طرح کے لکھنے کو مکروہ سمجھتا ہوں۔ [مصنف ابن ابي شيبه/ كتاب الأدب/حدیث: 28141]

راوی کہتے ہیں کہ میرا گمان ہے کہ ان کی مراد وہ تحریر ہے جس میں اللہ کا ذکر ہو۔ [مصنف ابن ابي شيبه/ كتاب الأدب/حدیث: 28142]

امام ابوبکر فرماتے ہیں کہ میں نے حضرت معتمر سے پوچھا: کیا اس سے مراد مہر ہے؟ انہوں نے کہا: جی ہاں! [مصنف ابن ابي شيبه/ كتاب الأدب/حدیث: 28143]