حضرت ابن عون فرماتے ہیں کہ حضرت قاسم حدیث نہیں لکھتے تھے۔ [مصنف ابن ابي شيبه/ كتاب الأدب/حدیث: 28144]

حضرت ایوب فرماتے ہیں کہ میں نے حضرت سعید بن جبیر کو یوں فرماتے ہوئے سنا کہ ہم لوگ کچھ مسائل میں اختلاف کر رہے تھے، تو میں نے ان کو ایک کاپی میں لکھ لیا۔ پھر میں اس کو حضرت ابن عمر رضی اللہ عنہما کے پاس لے آیا۔ ان سے ان مسائل کے بارے میں سوال کیا اس تحریر کر چھپاتے ہوئے کہ اگر انہیں اس بارے میں پتہ چل جاتا تو یہ میرے اور ان کے درمیان جدائی کا سبب بن جاتا۔ [مصنف ابن ابي شيبه/ كتاب الأدب/حدیث: 28145]

ابراہیم فرماتے ہیں کہ حضرت عبیدہ نے ارشاد فرمایا: کہ میری طرف سے کوئی تحریر ہرگز محفوظ نہ رکھنا۔ [مصنف ابن ابي شيبه/ كتاب الأدب/حدیث: 28146]

حضرت عنترہ فرماتے ہیں کہ حضرت عبد اللہ بن عباس رضی اللہ عنہما نے مجھے لکھنے کی رخصت دی اور ایسا کم ہی کرتے تھے۔ [مصنف ابن ابي شيبه/ كتاب الأدب/حدیث: 28147]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: جس کسی آدمی نے علم کو محفوظ کیا، پھر اس بارے میں اس سے پوچھا گیا اور اس نے علم کو چھپالیا تو قیامت کے دن اس شخص کو اس حال میں لایا جائے گا کہ اسے آگ کی لگام ڈالی ہوئی ہوگی۔ [مصنف ابن ابي شيبه/ كتاب الأدب/حدیث: 28148]

حضرت عطاء فرماتے ہیں کہ حضرت ابوہریرہ نے ارشاد فرمایا: جو شخص اپنے علم کو چھپائے گا تو اللہ تعالیٰ قیامت کے دن اس شخص کو آگ کی لگام پہنائیں گے۔ [مصنف ابن ابي شيبه/ كتاب الأدب/حدیث: 28149]

حضرت ابن عون فرماتے ہیں کہ حضرت محمد بن سیرین، حضرت قاسم بن محمد اور حضرت رجاء بن حیوہ ان لوگوں میں سے تھے جو اس بات کی کوشش کرتے تھے کہ وہ حدیث کو ویسے ہی بیان کریں جیسے انہوں نے سنی۔ اور حسن بصری، ابراہیم اور حضرت شعبی ان لوگوں میں سے تھے جو اس بات کی کوشش نہیں کرتے تھے۔ [مصنف ابن ابي شيبه/ كتاب الأدب/حدیث: 28150]

حضرت ابن عون فرماتے ہیں کہ میں نے امام محمد سے عرض کیا: بیشک فلاں شخص اس بات کی کوشش نہیں کرتا کہ وہ حدیث کو ویسے ہی بیان کرے جیسے اس نے سنی۔ آپ نے فرمایا: اگر وہ ایسا کرلے تو یہ اس کے لیے بہتر ہوگا۔ [مصنف ابن ابي شيبه/ كتاب الأدب/حدیث: 28151]

حضرت عمارہ فرماتے ہیں کہ حضرت ابو معمر حدیث میں (عربی کی) غلطی کی بھی پیروی کرتے تھے تاکہ ویسے ہی بیان کرسکیں جیسے انہوں نے سنی۔ [مصنف ابن ابي شيبه/ كتاب الأدب/حدیث: 28152]

حضرت اشعث فرماتے ہیں کہ حضرت حسن بصری اور حضرت شعبی یہ دونوں حضرات حدیث کو مقدم اور مؤخر کردینے میں کوئی حرج نہیں سمجھتے تھے۔ اور حضرت ابن سیرین اس بات میں تکلیف کرتے تھے کہ حدیث کو جیسے سنا ویسے بیان کریں۔ [مصنف ابن ابي شيبه/ كتاب الأدب/حدیث: 28153]