حضرت اسماعیل بن امیہ فرماتے ہیں کہ ہم حضرت نافع کو حدیث میں (عربی کی) غلطی درست کرنے پر آمادہ کرنا چاہتے تھے تو آپ انکار کردیتے تھے۔ [مصنف ابن ابي شيبه/ كتاب الأدب/حدیث: 28154]

حضرت اعمش فرماتے ہیں کہ میں نے حضرت ابو الضحی سے پوچھا: المصورین الفاظ ہیں؟ آپ نے فرمایا: المصورین ہیں۔ [مصنف ابن ابي شيبه/ كتاب الأدب/حدیث: 28155]

حضرت جابر فرماتے ہیں کہ میں نے حضرت عامر سے پوچھا: میں حدیث میں غلطی کو سنوں تو کیا کروں؟ آپ نے فرمایا: اس کو درست کرو۔ [مصنف ابن ابي شيبه/ كتاب الأدب/حدیث: 28156]

حضرت اشعث فرماتے ہیں کہ حضرت حسن بصری اس میں کوئی حرج نہیں سمجھتے تھے کہ آدمی اپنے ہاتھ میں دھاگہ باندھے تاکہ اس کے ذریعے آدمی کسی کام کی یاد دہانی کرے۔ [مصنف ابن ابي شيبه/ كتاب الأدب/حدیث: 28157]

حضرت مغیرہ فرماتے ہیں کہ حضرت ابراہیم نے انگوٹھی میں دھاگہ باندھنے کو مکروہ سمجھا کہ اس کے ذریعہ کسی کام کی یاد دہانی ہوجائے۔ [مصنف ابن ابي شيبه/ كتاب الأدب/حدیث: 28158]

حضرت مغراء عبدی فرماتے ہیں کہ حضرت شریح نے دف کی آواز سنی تو فرمایا: بیشک ملائکہ اس گھر میں داخل نہیں ہوتے جس میں دف ہو۔ [مصنف ابن ابي شيبه/ كتاب الأدب/حدیث: 28159]

حضرت عمران بن مسلم فرماتے ہیں کہ حضرت خیثمہ نے مجھ سے فرمایا: کیا تم نے حضرت سوید کو یہ فرماتے ہوئے نہیں سنا کہ: ملائکہ اس گھر میں داخل نہیں ہوتے جس میں دف ہو؟! [مصنف ابن ابي شيبه/ كتاب الأدب/حدیث: 28160]

حضرت ابراہیم فرماتے ہیں کہ حضرت عبد اللہ بن مسعود رضی اللہ عنہ کے اصحاب گلیوں میں ان بچیوں کے پاس آتے تھے جن کے پاس دف ہوتی تھی اور یہ اس کو توڑ دیتے تھے۔ [مصنف ابن ابي شيبه/ كتاب الأدب/حدیث: 28161]

حضرت ابوہریرہ فرماتے ہیں کہ حضرت ابراہیم نے قدوم مقام پر ایک سو بیس سال کی عمر میں ختنہ کیا، پھر آپ اس کے بعد اسّی سال تک زندہ رہے۔ [مصنف ابن ابي شيبه/ كتاب الأدب/حدیث: 28162]

حضرت سعید بن مسیب فرماتے ہیں کہ حضرت ابراہیم سب سے پہلے شخص تھے جنہوں نے مہمان کی ضیافت کی اور سب سے پہلے شخص تھے جنہوں نے مونچھ کاٹی، اور اپنے ناخنوں کو کاٹا، اور شرمگاہ کے بال صاف کیے، اور پہلے شخص تھے جنہوں نے ختنہ کیا، اور پہلے شخص تھے جنہوں نے سفید بال دیکھے۔ تو کہنے لگے: اے میرے پروردگار! یہ کیا چیز ہے؟ اللہ رب العزت نے ارشاد فرمایا: یہ عزت و وقار ہے۔ آپ نے عرض کیا! پروردگار! میرے وقار میں اضافہ فرما۔ [مصنف ابن ابي شيبه/ كتاب الأدب/حدیث: 28163]