حضرت ابن عون فرماتے ہیں کہ حضر ت محمد نے ارشاد فرمایا: وہ لوگ روزانہ کنگھی کرنے کو مکروہ سمجھتے تھے۔ [مصنف ابن ابي شيبه/ كتاب الأدب/حدیث: 27214]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جب تین افراد ہوں تو ان میں دو تیسرے کے علاوہ سرگوشی ہرگز مت کریں اور حضرت ابن نمیر نے یتناج کا لفظ نقل فرمایا بمعنی سرگوشی کرنا۔ [مصنف ابن ابي شيبه/ كتاب الأدب/حدیث: 27215]

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے منع فرمایا کہ جب تین افراد ہوں تو ان میں سے دو تیسرے کے علاوہ سرگوشی نہ کریں اس وجہ سے وہ اس کو غمگین کریں گے یہاں تک کہ وہ لوگوں میں مل جائے۔ [مصنف ابن ابي شيبه/ كتاب الأدب/حدیث: 27216]

حضرت ابو الاحوص فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا جب تین افراد کا گروہ ہو تو دو شخص تیسرے کو چھوڑ کر سرگوشی نہ کریں، پس بیشک یہ بات اس کو تکلیف میں مبتلا کر دے گی۔ [مصنف ابن ابي شيبه/ كتاب الأدب/حدیث: 27217]

حضرت سعید بن ابی سعید فرماتے ہیں کہ میں نے حضرت ابن عمر رضی اللہ عنہما کو دیکھا کہ وہ کسی آدمی سے سرگوشی کر رہے تھے میں نے بھی اپنا سر ان دونوں کے درمیان داخل کردیا تو حضرت ابن عمر رضی اللہ عنہما نے میرے سینہ پر مارا اور فرمایا: جب تم دو آدمیوں کو سرگوشی کرتے ہوئے دیکھو تو ان دونوں کے درمیان مت گھسو مگر ان کی اجازت سے۔ [مصنف ابن ابي شيبه/ كتاب الأدب/حدیث: 27218]

حضرت ابو صالح فرماتے ہیں کہ حضرت ابن عمر رضی اللہ عنہما نے ارشاد فرمایا: جب چار افراد ہوں تو کوئی حرج نہیں ہے کہ دو افراد اپنے ساتھیوں کو چھوڑ کر سرگوشی کریں۔ [مصنف ابن ابي شيبه/ كتاب الأدب/حدیث: 27219]

حضرت جابر فرماتے ہیں کہ ایک آدمی مسجد میں تیر لے کر گزرا، تو رسول اللہ صلی اللہ علیہ وآلہ وسلم نے اس سے فرمایا: اس کے پھل کو اپنے سے چمٹا لو۔ [مصنف ابن ابي شيبه/ كتاب الأدب/حدیث: 27220]

حضرت ابو بردہ فرماتے ہیں کہ ان کے والد نے ارشاد فرمایا: جب تم میں کوئی مسجد میں تیر لے کر گزرے تو اس کو چاہیے کہ اس کے پھل کو اپنے سے چمٹا لے۔ [مصنف ابن ابي شيبه/ كتاب الأدب/حدیث: 27221]

حسن فرماتے ہیں کہ رسول اللہ صلی اللہ علیہ وآلہ وسلم نے چند لوگوں کو دیکھا کہ وہ سونتی ہوئی تلوار لے رہے ہیں تو آپ صلی اللہ علیہ وآلہ وسلم نے فرمایا: ان پر اللہ لعنت کرے۔ راوی کہتے ہیں! میں نے حسن سے پوچھا: کیا وہ مسجد میں تھے؟ آپ نے فرمایا: نہیں، بلکہ مسجد کے صحنوں میں سے ایک صحن میں تھے۔ [مصنف ابن ابي شيبه/ كتاب الأدب/حدیث: 27222]

حضرت لیث فرماتے ہیں کہ حضرت مجاہد نے ارشاد فرمایا: ملعون ہے وہ شخص جو مسجد میں اپنے بھائی کو سونتی ہوئی تلوار پکڑائے۔ [مصنف ابن ابي شيبه/ كتاب الأدب/حدیث: 27223]