حضرت ابو جعفر الخطمی فرماتے ہیں کہ ان کے دادا حضرت عمیر بن حبیب نے اپنے بیٹوں کو وصیت فرمائی: کہ اے میرے بیٹو! تم بیوقوفوں کی صحبت اختیار کرنے سے بچو پس بیشک ان کی صحبت تو بیماری ہے، اور جو شخص بیوقوف سے درگزر کرتا ہے تو اس کی درگزر کی وجہ سے اس کو خوشی ملتی ہے اور جو بیوقوف کو جواب دیتا ہے تو وہ شرمندہ ہوتا ہے، اور جو شخص بیوقوف کی تھوڑی بات کو برداشت نہیں کرتا تو اسے زیادہ برداشت کرنا پڑتا ہے، اور تم میں کوئی ارادہ کرے نیکی کے حکم کرنے کا اور برائی سے روکنے کا تو اس کو چاہیے کہ وہ اپنے نفس کو تکلیف پر صبر کرنے کا عادی بنادے۔ اس لیے کہ جو شخص صبر کرتا ہے تو اس کو تکلیف محسوس نہیں ہوتی۔ [مصنف ابن ابي شيبه/ كتاب الأدب/حدیث: 27244]

حضرت ابو قلابہ فرماتے ہیں کہ حضرت ابو الدرداء نے ارشاد فرمایا: بیشک آدمی کا چلنا اور اس کی مجلس کا تعلق اس کی سمجھ داری سے ہے۔ [مصنف ابن ابي شيبه/ كتاب الأدب/حدیث: 27245]

حضرت ابو قلابہ نے ارشاد فرمایا: اللہ شاعر کو ہلاک کرے کہ اس نے یوں کہا: آدمی کے بارے میں کسی سے مت پوچھ بلکہ اس کے ساتھی کو دیکھ، ہر ساتھی اپنے ساتھی کے ذریعہ ہی ہدایت یافتہ ہوتا ہے۔ [مصنف ابن ابي شيبه/ كتاب الأدب/حدیث: 27246]

حضرت مرہ یا حضرت ھبیرہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: لوگوں کے دوستوں کے ذریعے ان کا اعتبار کرو۔ [مصنف ابن ابي شيبه/ كتاب الأدب/حدیث: 27247]

حضرت ابو منصور میمون الجھنی فرماتے ہیں کہ میں نے حضرت ابراہیم کو یوں فرماتے ہوئے سنا کہ جب تم میں سے کوئی کسی کے گھر میں داخل ہو تو وہ لوگ جہاں اس کو بٹھائیں تو اس کو چاہیے کہ وہ بیٹھ جائے اس لیے کہ وہ لوگ اپنے گھر کے پردہ کے متعلق زیادہ جانتے ہں۔ [مصنف ابن ابي شيبه/ كتاب الأدب/حدیث: 27248]

حضرت اسماعیل بن ابی خالد فرماتے ہیں کہ میں نے حضرت شریح کو دیکھا کہ وہ اپنی کوکھ پر ہاتھ رکھ کر چل رہے تھے۔ [مصنف ابن ابي شيبه/ كتاب الأدب/حدیث: 27249]

حضرت خالد حذائ فرماتے ہیں کہ حضرت حمید بن ھلال نے ارشاد فرمایا: کہ نماز میں ہی کوکھ پر ہاتھ رکھنا مکروہ ہے۔ اس لیے کہ ابلیس کو زمین پر اتارا گیا تھا اس حال میں کہ اس نے اپنی کوکھ پر ہاتھ رکھا ہوا تھا۔ [مصنف ابن ابي شيبه/ كتاب الأدب/حدیث: 27250]

حضرت حکم بن عطیہ فرماتے ہیں کہ میں نے حضرت حسن کو یوں فرماتے ہوئے سنا کہ جب کوئی آدمی دوسرے آدمی کو کوئی بات بیان کرکے یوں کہے کہ میری بات کو چھپانا تو یہ بات امانت ہوگی۔ [مصنف ابن ابي شيبه/ كتاب الأدب/حدیث: 27251]

امام شعبی سے مذکورہ ارشاد اس سند سے بھی منقول ہے۔ [مصنف ابن ابي شيبه/ كتاب الأدب/حدیث: 27252]

حضرت جابر بن عبد اللہ رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: جب کوئی آدمی دوسرے آدمی کو کوئی بات بیان کرے پھر وہ ادھر ادھر دیکھے تو یہ امانت ہوگی۔ [مصنف ابن ابي شيبه/ كتاب الأدب/حدیث: 27253]