حضرت ابن ابی ذئب فرماتے ہیں کہ امام زہری نے ارشاد فرمایا: جب ماں کے پیٹ سے ساقط ہونے والا بچہ چلایا پھر وہ مرگیا تو اس میں دیت لازم ہوگی۔ [مصنف ابن ابي شيبه/كتاب الديات/حدیث: 29331]

ابراہیم نے فرمایا: کسی عورت نے بچہ جنا پس عورتوں نے گوا ہی دی کہ بیشک وہ پھڑکا تھا اور زندہ پیدا ہوا تھا اور انہوں نے اس بچہ کے چلانے پر گواہی نہیں دی اس پر حضرت شریح نے فرمایا: وہ زندہ شمار ہوگا میت کا وارث بنے گا پھر آپ نے اس کی وراثت کو باطل قرار دے دیا اس لیے کہ ان عورتوں نے اس کے رونے اور چلانے پر گواہی نہیں دی۔ [مصنف ابن ابي شيبه/كتاب الديات/حدیث: 29332]

حضرت اسلم جو کہ حضرت عمر کے آزاد کردہ غلام ہیں وہ فرماتے ہیں کہ حضرت عمر نے بچے کے دانت میں ایک اونٹ کا فیصلہ فرمایا جب کہ وہ بچے کے دودھ کے دانت گرنے سے پہلے ہی گر جائے۔ [مصنف ابن ابي شيبه/كتاب الديات/حدیث: 29333]

حضرت جابر فرماتے ہیں کہ حضرت عامر شعبی نے ارشاد فرمایا: بچہ کے دانت میں جب کہ اس کے دودھ کے دانت ابھی نہ گرے ہوں درد کے سوا کچھ لازم نہیں۔ [مصنف ابن ابي شيبه/كتاب الديات/حدیث: 29334]

حضرت ابن سالم فرماتے ہیں کہ حضرت شعبی نے ارشاد فرمایا: جب بچہ کا دانت توڑ دیا جائے اس حال میں کہ اس کے دودھ کے دانت ابھی نہیں گرے تھے تو اس میں قاضی کا فیصلہ ہوگا۔ [مصنف ابن ابي شيبه/كتاب الديات/حدیث: 29335]

حضرت ابن جریج فرماتے ہیں کہ حضرت ابن شہاب نے ایسے چھوٹے بچہ کے بارے میں جس کے دودھ کے دانت ابھی نہ گرے ہوں اور اس نے کسی دوسرے بچہ کا دانت توڑ دیا۔ آپ نے یوں ارشاد فرمایا: اس پر تاوان لازم ہوگا جو فیصلہ کنندہ مناسب سمجھے۔ [مصنف ابن ابي شيبه/كتاب الديات/حدیث: 29336]

حضرت عمرو فرماتے ہیں کہ حسن بصری نے بچہ کے دانت کے بارے میں جبکہ اس کے دودھ کے دانت ابھی نہ گرے ہوں یوں ارشاد فرمایا: اس بارے میں دو عادل دیکھیں گے اگر دانت نکل آیا تو اس کے لیے کوئی چیز مقرر کردیں گے اور اگر دانت نہ نکلا تو وہ آدمی کے دانت کی مانند ہوگا۔ [مصنف ابن ابي شيبه/كتاب الديات/حدیث: 29337]

حضرت اشعث فرماتے ہیں کہ امام شعبی نے ارشاد فرمایا: مجنون جو جنایت جنون کی حالت میں کرے تو اس کا تاوان اس کے خاندان والوں پر لازم ہوگا اور جو جنایت اس نے افاقہ کی حالت میں کی تو اس سے قصاص لیا جائے گا۔ [مصنف ابن ابي شيبه/كتاب الديات/حدیث: 29338]

حضرت ہشام فرماتے ہیں کہ حسن بصری نے مجنون، مغلوب العقل، ناسمجھ اور وہ شخص جس کو مہینہ میں ایک دو مرتبہ دورہ پڑتا ہو یوں ارشاد فرمایا: جب اس سے وہ حالت دور ہوجائے پھر وہ روزہ رکھے نماز پڑھے، بات کو سمجھے اور کسی کو نقصان پہنچائے تو اس کا تاوان اسی پر لازم ہوگا۔ [مصنف ابن ابي شيبه/كتاب الديات/حدیث: 29339]

حضرت یحییٰ بن سعید فرماتے ہیں کہ حضرت عمر بن عبدالعزیز نے مجنون کی جنایت اس کے خاندان والوں پر ڈالی۔ [مصنف ابن ابي شيبه/كتاب الديات/حدیث: 29340]