حضرت اسماعیل فرماتے ہیں کہ حضرت حسن بصری نے ارشاد فرمایا: زانی کو شرابی سے زیادہ سخت کوڑے مارے جائیں گے اور شرابی کو تہمت لگانے والے سے زیادہ سخت کوڑے مارے جائیں گے۔ [مصنف ابن ابي شيبه/كتاب الحدود/حدیث: 30590]

حضرت حنظلہ سدوسی فرماتے ہیں کہ میں نے حضرت انس بن مالک رضی اللہ عنہ کو یوں فرماتے ہوئے سنا: کوڑے کے بارے میں حکم دیا جاتا تھا کہ اس کا نچلا کنارہ کاٹ دیا جائے پھر اس کو دو پتھروں کے درمیان رکھ کر باریک کرلیا جائے پھر اس سے مارا جائے۔ میں نے حضرت انس سے پوچھا: یہ کس کے زمانے میں ہوتا تھا؟ آپ نے فرمایا: حضرت عمر بن خطاب کے زمانے میں۔ [مصنف ابن ابي شيبه/كتاب الحدود/حدیث: 30591]

حضرت ابو ماجد فرماتے ہیں کہ حضرت عبداللہ بن مسعود نے کوڑا منگوایا اور اس کے نچلے کنارے کو باریک کیا یہاں تک کہ وہ کوڑا باریک ہوگیا آپ نے جلاد کو بلایا اور فرمایا! کوڑے مارو۔ [مصنف ابن ابي شيبه/كتاب الحدود/حدیث: 30592]

حضرت زید بن اسلم فرماتے ہیں کہ نبی کریم صلی اللہ علیہ وآلہ وسلم کے پاس ایک آدمی لایا گیا جس نے حد والے جرم کا ارتکاب کیا تھا، تو ایک نیا سخت قسم کا کوڑا لایا گیا آپ صلی اللہ علیہ وآلہ وسلم نے ارشاد فرمایا: اس سے کم لاؤ تو ٹوٹا ہوا اور درمیان سے چیرا ہوا ایک کوڑا لایا گیا آپ نے فرمایا: اس سے اوپر والا لاؤ پھر ایک کوڑا لایا گیا جس کو نرم بنایا گیا تھا آپ صلی اللہ علیہ وآلہ وسلم نے فرمایا: ہاں یہ ٹھیک ہے۔ [مصنف ابن ابي شيبه/كتاب الحدود/حدیث: 30593]

حضرت مثنی فرماتے ہیں کہ حضرت عمرو بن شعیب نے ارشاد فرمایا: جب خیانت کا مال آدمی کے پاس پایا جائے تو اسے پکڑ لیا جائے اور سو کوڑے مارے جائیں اور اس کا سر اور اس کی ڈاڑھی منڈوا دی جائے اور اس کے کجاوے میں جو کچھ ہو وہ لے لیا جائے سوائے جانور کے اور اس کا کجاوہ جلاد یا جائے اور وہ کبھی بھی مسلمانوں میں حصہ نہیں لے گا آپ نے فرمایا: مجھے خبر پہنچی ہے کہ حضرت ابوبکر صدیق اور حضرت عمر یہ دونوں حضرات یہ عمل کرتے تھے۔ [مصنف ابن ابي شيبه/كتاب الحدود/حدیث: 30594]

حضرت عمرو بن شعیب نے فرمایا: مجھے خبر پہنچی ہے کہ حضرت ابوبکر صدیق اور حضرت عمر رضی اللہ عنہما یہ عمل کرتے تھے۔ [مصنف ابن ابي شيبه/كتاب الحدود/حدیث: 30595]

حضرت جابر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: خیانت میں ہاتھ کاٹنے کی سزا نہیں ہوگی۔ [مصنف ابن ابي شيبه/كتاب الحدود/حدیث: 30596]

حضرت ابو الزبیر فرماتے ہیں کہ حضرت جابر نے ارشاد فرمایا: خیانت میں ہاتھ کاٹنے کی سزا نہیں ہوگی۔ [مصنف ابن ابي شيبه/كتاب الحدود/حدیث: 30597]

حضرت یونس فرماتے ہیں کہ حضرت حسن بصری سے خیانت کے مال کے بارے میں مروی ہے جب وہ کسی آدمی کے پاس پا یا جائے آپ نے فرمایا: اس کا کجاوہ جلا دیا جائے۔ [مصنف ابن ابي شيبه/كتاب الحدود/حدیث: 30598]

حضرت عمر بن خطاب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: تم جس شخص کو پاؤ کہ اس نے مال غنیمت میں خیانت کی ہے تو تم اس کا سامان جلا دو۔ [مصنف ابن ابي شيبه/كتاب الحدود/حدیث: 30599]