حضرت ابن سالم فرماتے ہیں کہ حضرت شعبی نے ارشاد فرمایا: قصاص اور حد میں گواہی پر گواہی جائز نہیں۔ [مصنف ابن ابي شيبه/كتاب الحدود/حدیث: 30840]

حضرت حماد فرماتے ہیں کہ ابراہیم نے ارشاد فرمایا: حدود میں آدمی کا آدمی (کی گواہی) پر گواہی دینا جائز نہیں۔ [مصنف ابن ابي شيبه/كتاب الحدود/حدیث: 30841]

حضرت لیث فرماتے ہیں کہ حضرت طاؤس اور حضرت عطاء نے ارشاد فرمایا: حد میں گواہی پر گواہی جائز نہیں۔ [مصنف ابن ابي شيبه/كتاب الحدود/حدیث: 30842]

حضرت عامر فرماتے ہیں کہ حضرت شریح اور حضرت مسروق نے ارشاد فرمایا: حد میں گواہی پر گواہی جائز نہیں اور وہ دونوں حد میں کفیل نہیں ہوں گے۔ [مصنف ابن ابي شيبه/كتاب الحدود/حدیث: 30843]

حضرت مطرف فرماتے ہیں کہ حضرت عامر نے ارشاد فرمایا: جب وہ حرم کی طرف بھاگ گیا تو تحقیق وہ امن میں ہوگیا، پس اگر اس نے حرم میں کوئی قابل سزا کام کیا تو حرم میں اس پر حد قائم کی جائے گی۔ [مصنف ابن ابي شيبه/كتاب الحدود/حدیث: 30844]

حضرت عطاء فرماتے ہیں کہ حضرت ولید نے حرم میں ایک آدمی پر حد قائم کرنے کا ارادہ کیا تو حضرت عبید بن عمیر نے ان سے فرمایا: تم اس پر حد قائم مت کرو مگر جبکہ اس نے حرم میں ہی قابل سزا کام کیا ہو۔ [مصنف ابن ابي شيبه/كتاب الحدود/حدیث: 30845]

حضرت ہشام فرماتے ہیں کہ حضرت حسن بصری اور حضرت عطاء نے ارشاد فرمایا: جب کسی پر حرم کے علاوہ میں حد لازم ہوئی پھر اس نے حرم میں پناہ لے لی تو اس کو حرم سے نکالا جائے گا یہاں تک کہ اس پر حد قائم کردی جائے۔ [مصنف ابن ابي شيبه/كتاب الحدود/حدیث: 30846]

حضرت خصیف فرماتے ہیں کہ حضرت مجاہد نے ارشاد فرمایا: جب آدمی پر غیر حرم میں حد لازم ہوجائے پھر وہ حرم میں آجائے تو اسے حرم سے نکالا جائے گا پھر اس پر حد قائم کی جائے گی اور جب حرم میں ہی اس پر حد لازم ہوگئی تو حرم میں ہی اس پر حد قائم کی جائے گی۔ [مصنف ابن ابي شيبه/كتاب الحدود/حدیث: 30847]

حضرت خصیف فرماتے ہیں کہ حضرت مجاہد سے مروی ہے کہ ایک آدمی نے کسی آدمی کو قتل کردیا پھر وہ حرم میں داخل ہوگیا۔ آپ نے فرمایا: اس کو پکڑا جائے گا اور حرم سے باہر نکالا جائے گا پھر اس پر حد قائم کردی جائے گی آپ نے فرمایا: وہ قتل ہوگا۔ [مصنف ابن ابي شيبه/كتاب الحدود/حدیث: 30848]

حضرت حضرت سعید اور حضرت عطاء سے اس شخص کے بارے میں مروی ہے جو قتل کر دے پھر حرم میں داخل ہوجائے، فرمایا: مکہ والے اس سے خریدو فروخت نہیں کریں گے اور نہ اسے پلائیں گے اور نہ کھلائیں گے اور نہ اس کو پناہ دیں گے اور نہ اس سے نکاح کریں گے۔ یہاں تک کہ وہ نکل جائے پس اس کو پکڑ لیا جائے گا۔ [مصنف ابن ابي شيبه/كتاب الحدود/حدیث: 30849]