حضرت عطاء فرماتے ہیں کہ حضرت ابن عمر رضی اللہ عنہما اور حضرت ابن عباس رضی اللہ عنہما نے ارشاد فرمایا: اگر ہم اپنے آباؤاجداد کے قاتل کو بھی حرم میں پالیں تو ہم اس کو قتل نہیں کریں گے۔ [مصنف ابن ابي شيبه/كتاب الحدود/حدیث: 30850]

حضرت شعبہ فرماتے ہیں کہ میں نے حضرت حکم اور حضرت حماد سے اس آدمی کے متعلق دریافت کیا جو قتل کر دے پھر حرم میں داخل ہوجائے اس کا کیا حکم ہے؟ حضرت حماد نے فرمایا: اس کو نکالا جائے گا پھر اس پر حد قائم کی جائے گی۔ [مصنف ابن ابي شيبه/كتاب الحدود/حدیث: 30851]

اور حضرت حکم نے فرمایا: اس سے خریدو فروخت نہیں کی جائے گی اور اس کے ساتھ کھانا نہیں کھایا جائے گا۔ [مصنف ابن ابي شيبه/كتاب الحدود/حدیث: 30852]

حضرت خالد بن معبد فرماتے ہیں کہ حضرت سعید بن مسیب اور حضرت عبیداللہ بن عبداللہ بن عتبہ ان دونوں حضرات سے اس چور کے متعلق سوال کیا گیا جو چوری کر کے چوری شدہ مال گھر سے باہر پھینک دے اور وہ اس گھر میں پایا جائے جس میں اس نے سامان چوری کیا تھا، تو کیا اس پر ہاتھ کاٹنے کی سزا لاگو ہوگی؟ ان دونوں حضرات نے فرمایا: اس پر ہاتھ کاٹنے کی سزا لاگو ہوگی۔ [مصنف ابن ابي شيبه/كتاب الحدود/حدیث: 30853]

حضرت معمر فرماتے ہیں کہ حضرت خصیف نے ارشاد فرمایا: کچھ لوگوں نے اپنا کچھ سامان گھر سے گم پایا انہوں نے گھر میں نقب لگی دیکھی، تو وہ دیکھنے کے لیے نکلے، دو آدمیوں کو دوڑتے ہوئے دیکھا، انہوں نے ان میں سے ایک کو پکڑ لیا جس کے پاس سامان تھا اور دوسرا ان سے جان چھڑا کر بھاگ گیا۔ وہ لوگ اسے لے آئے، وہ کہنے لگا: میں نے کوئی چیز چوری نہیں کی، مجھے تو اس شخص نے اجرت پر رکھا تھا جو بھاگ گیا اور اس نے یہ سامان میرے حوالہ کیا تھا تاکہ میں اس کو اٹھا لوں۔ میں نہیں جانتا کہ وہ کہاں سے لایا تھا؟ حضرت خصیف نے فرمایا: اس بارے میں حضرت عمر بن عبدالعزیز کو خط لکھا گیا: آپ نے جواب لکھا: اس کو سخت سزا دی جائے گی اور اس کو ہمیشہ کے لیے جیل میں ڈال دیا جائے گا اور اس کا ہاتھ نہیں کٹے گا۔ [مصنف ابن ابي شيبه/كتاب الحدود/حدیث: 30854]

حضرت اسماعیل بن ابی خالد فرماتے ہیں کہ حضرت عامر سے ایک آدمی کے بارے میں مروی ہے جس نے کسی آدمی سے کپڑا لیا، پس وہ کہنے لگا: تو نے یہ چوری کیا ہے، اس نے کہا: بیشک میں نے یہ کپڑا لیا ہے اپنے اس حق کے عوض جو اس پر لازم تھا، تو اس کا کیا حکم ہے؟ حضرت شعبی نے فرمایا: اس پر حد جاری نہں ا ہوگی۔ [مصنف ابن ابي شيبه/كتاب الحدود/حدیث: 30855]

حضرت ابن جریج فرماتے ہیں کہ حضرت عطاء نے ارشاد فرمایا: اگر چوری شدہ مال ایسے برے آدمی کے پاس پایا گیا جو تہمت یافتہ تھا اور وہ یوں کہے: میں نے اسے خریدا ہے اور وہ معین نہیں کر رہا ہے کہ اس شخص کو جس سے اس نے خریدا ہے، یا وہ یوں کہے: مجھے یہ ملا ہے تو اس کا ہاتھ نہیں کٹے گا اور نہ اسے سزا دی جائے گی۔ [مصنف ابن ابي شيبه/كتاب الحدود/حدیث: 30856]

حضرت ابن جریج فرماتے ہیں کہ حضرت عمر بن عبدالعزیز نے ایک خط لکھا تھا میں نے اسے پڑھا: جب سامان تہمت زدہ آدمی کے پاس پایا جائے اور وہ کہے: میں نے اسے خریدا ہے، لیکن اسے ثابت نہ کرسکے تو اسے قید خانے میں مضبوطی سے باندھ دو اور کسی سے بات کرنے کے لیے اس کو تنہا نہ چھوڑو۔ یہاں تک کہ اس کے بارے میں اللہ کا حکم آجائے۔ [مصنف ابن ابي شيبه/كتاب الحدود/حدیث: 30857]

راوی فرماتے ہیں: میں نے اس بات کا ذکر حضرت عطاء سے کیا تو انہوں نے اس کا انکار کیا۔ [مصنف ابن ابي شيبه/كتاب الحدود/حدیث: 30858]

حضرت طاؤس فرماتے ہیں کہ میں نے حضرت عبداللہ بن زبیر رضی اللہ عنہ کو یوں فرماتے ہوئے سنا: جو اسلحہ اٹھائے پھر اسے رکھ دے تو اس کا خون رائیگاں و باطل ہے۔ [مصنف ابن ابي شيبه/كتاب الحدود/حدیث: 30859]