حضرت عبد الرحمن بن ابی لیلی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جب تم میں سے کوئی ایک نیا کپڑا پہنے تو اسے چاہیے کہ یوں دعا کرے: شکر ہے اللہ کا جس نے مجھے وہ کپڑے پہنائے جن کو پہن کر میں اپنا ستر ڈھانپتا ہوں اور لوگوں میں اس سے زینت حاصل کرتا ہوں۔ [مصنف ابن ابي شيبه/كتاب الدعاء/حدیث: 31738]

قبیلہ مزینہ کے ایک آدمی نقل کرتے ہیں رسول اللہ صلی اللہ علیہ وآلہ وسلم نے حضرت عمر کو دھلا ہوا کپڑا پہنے ہوئے دیکھا، تو ارشاد فرمایا: کیا تمہارے یہ کپڑے نئے ہیں؟ حضرت عمر نے فرمایا: اے اللہ کے رسول (صلی اللہ علیہ وآلہ وسلم) دھلے ہوئے ہیں۔ پس رسول اللہ صلی اللہ علیہ وآلہ وسلم نے فرمایا: تم نیا کپڑا پہنو، اور قابل تعریف زندگی گزارو، اور شہید ہو کر وفات پاؤ، اللہ تمہیں دنیا اور آخرت میں آنکھ کی ٹھنڈک نصیب کرے۔ [مصنف ابن ابي شيبه/كتاب الدعاء/حدیث: 31739]

حضرت منصور فرماتے ہیں کہ حضرت سالم بن ابی الجعد نے ارشاد فرمایا: جب کوئی شخص نیا کپڑا پہن کر یوں دعا پڑھے: اے اللہ! تو ان کپڑوں کو بابرکت بنا دے۔ جن کو پہن کر میں تیری نعمتوں کا شکر ادا کروں۔ جن میں میں اچھی طرح تیری عبادت کروں۔ میں جن کو پہن کر تیری فرمانبرداری میں عمل کروں۔ یہ دعا ابھی اس کے حلق میں بھی نہیں پہنچتی کہ اللہ تعالیٰ اس کی مغفرت فرما دیتے ہیں۔ [مصنف ابن ابي شيبه/كتاب الدعاء/حدیث: 31740]

حضرت مسعر فرماتے ہیں کہ حضرت عون بن عبد اللہ نے ارشاد فرمایا: ایک آدمی نے نیا کپڑا پہن کر اللہ کا شکر ادا کیا تو اسے جنت میں داخل کردیا گیا یا یوں فرمایا: اس کی مغفرت کردی گئی، تو ایک آدمی نے ان کو کہا: میں اپنے گھر والوں کی طرف نہیں لوٹوں گا یہاں تک کہ میں نیا کپڑا پہنوں گا اور اس پر اللہ کا شکر ادا کروں گا۔ [مصنف ابن ابي شيبه/كتاب الدعاء/حدیث: 31741]

حضرت ابو نضرہ فرماتے ہیں کہ! نبی کریم صلی اللہ علیہ وآلہ وسلم کے صحابہ جب کسی کو نیا کپڑا پہنا ہوا دیکھتے تو یوں دعا دیتے، پہنو اور پھاڑو، خدا تمہیں اور دے۔ [مصنف ابن ابي شيبه/كتاب الدعاء/حدیث: 31742]

حضرت ابونضرہ فرماتے ہیں کہ رسول اللہ صلی اللہ علیہ وآلہ وسلم جب نیا کپڑا پہنتے تو اس کا نام لیتے اگر قمیص ہو یا تہبند ہو یا عمامہ ہو تو یوں دعا پڑھتے: اے اللہ! تیرے لیے ہی شکر ہے کہ تو نے مجھے یہ کپڑاپہنایا میں تجھ سے اس کی خیر کا اور جس کے لیے بنایا گیا ہے اس کی خیر کا سوال کرتا ہوں۔ میں تیری پناہ لیتا ہوں اس کے شر سے اور جس کے لیے اسے بنایا گیا ہے اس کے شر سے۔ [مصنف ابن ابي شيبه/كتاب الدعاء/حدیث: 31743]

حضرت عروہ فرماتے ہیں کہ حضرت عائشہ رضی اللہ عنہا نے اللہ کے قول اور نہ بلند آواز سے پڑھو تم اپنی نماز اور نہ بہت پست کرو تم اپنی آواز، کے بارے میں فرمایا: اس میں دعا مراد ہے۔ [مصنف ابن ابي شيبه/كتاب الدعاء/حدیث: 31744]

حضرت ابراہیم سے بھی اسی طرح منقول ہے۔ [مصنف ابن ابي شيبه/كتاب الدعاء/حدیث: 31745]

حضرت سماک بن عبید فرماتے ہیں کہ حضرت عطاء نے فرمایا: دعا مراد ہے۔ [مصنف ابن ابي شيبه/كتاب الدعاء/حدیث: 31746]

حضرت ہجری فرماتے ہیں کہ حضرت ابو عیاض نے فرمایا: دعا مراد ہے۔ [مصنف ابن ابي شيبه/كتاب الدعاء/حدیث: 31747]