حضرت صلہ رحمہ اللہ فرماتے ہیں کہ حضرت عمار رضی اللہ عنہ نے ارشاد فرمایا: تین چیزیں ایسی ہیں جس نے ان کو جمع کیا اس نے ایمان کو جمع کرلیا! اپنے نفس سے انصاف کرنا، اور تنگدستی کے باوجود خرچ کرنا، اور سب لوگوں کو سلام کرنا۔ [مصنف ابن ابي شيبه/كتاب الإيمان/حدیث: 32461]

حضرت صلہ رحمہ اللہ فرماتے ہیں کہ حضرت عمار رضی اللہ عنہ نے اللہ تعالیٰ کے اس فرمان { إِنَّہُمْ لاَ أَیْمَانَ لَہُمْ } [التوبۃ: 12] (ان کی قسموں کا کوئی اعتبار نہیں) کے بارے میں فرمایا: ان کا کوئی عہد نہیں۔ [مصنف ابن ابي شيبه/كتاب الإيمان/حدیث: 32462]

حضرت منصور رحمہ اللہ فرماتے ہیں کہ حضرت ابراہیم رحمہ اللہ نے ارشاد فرمایا: یوں کہا جاتا ہے! وہ انسان جہنم میں داخل نہیں ہوگا جس کے دل میں رائی کے دانے کے برابر ایمان ہو۔ [مصنف ابن ابي شيبه/كتاب الإيمان/حدیث: 32463]

حضرت ابن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ایمان کی مضبوط بنیاد، کسی سے اللہ کی خوشنودی میں محبت کرنا، اور اللہ ہی کی خوشنودی میں بغض رکھنا ہے۔ [مصنف ابن ابي شيبه/كتاب الإيمان/حدیث: 32464]

حضرت عدی بن عدی رحمہ اللہ فرماتے ہیں کہ حضرت عمر بن عبد العزیز رحمہ اللہ نے مجھے لکھا اور فرمایا: حمدو صلوۃ کے بعد، یقینا ایمان کے کچھ فرائض و احکام اور حدود اور ضابطے ہیں۔ پس جس نے ان کو پورا کرلیا اس کا ایمان مکمل ہوگیا، اور جس شخص نے ان کو پورا نہ کیا اس کا ایمان بھی مکمل نہ ہوا۔ پس اگر میں زندہ رہا تو عنقریب میں ان کو تمہارے سامنے بیان کروں گا تاکہ تم ان پر عمل کرنے لگو، اور اگر میں یہ بتانے سے پہلے ہی مر جاؤں تو میں تمہاری صحبت پر زیادہ حریص نہیں ہوں۔ [مصنف ابن ابي شيبه/كتاب الإيمان/حدیث: 32465]

حضرت ہشام بن سعد رحمہ اللہ فرماتے ہیں کہ حضرت زید بن اسلم رحمہ اللہ نے ارشاد فرمایا: دین والوں کے لیے چار باتیں لازمی ہیں، اسلام کی دعوت میں داخل ہونا، اور ایمان لانا ضروری ہے، اور تصدیق کرنا اللہ کی، اور اس کے پہلے اور آخری رسولوں کی، اور جنت، جہنم کی، اور موت کے بعد دوبارہ اٹھنے کی، اور ضروری ہے کہ ایسا عمل کریں جو ان کے ایمان کے سچّا ہونے کی تصدیق کرے، اور ضروری ہے کہ وہ اتنا علم سیکھیں جس کے ذریعہ ان کا عمل اچھا ہوجائے۔ پھر آپ رحمہ اللہ نے یہ آیت تلاوت فرمائی، اور بیشک میں غفار ہوں اس شخص کے حق میں جس نے توبہ کی اور ایمان لایا اور اچھے کام کیے پھر سیدھی راہ پر چلتا رہا۔ [مصنف ابن ابي شيبه/كتاب الإيمان/حدیث: 32466]

حضرت جریری رحمہ اللہ فرماتے ہیں کہ حضرت عبد اللہ بن شقیق رحمہ اللہ نے ارشاد فرمایا: صحابہ رضی اللہ عنہ م کسی عمل کے بھی چھوڑنے کی وجہ سے آدمی کو کافر نہیں گردانتے تھے سوائے نماز کے، راوی کہتے ہیں: وہ لوگ فرمایا کرتے تھے نماز کا چھوڑنا کفر ہے۔ [مصنف ابن ابي شيبه/كتاب الإيمان/حدیث: 32467]

حضرت عاصم رحمہ اللہ فرماتے ہیں کہ حضرت ابو وائل رحمہ اللہ سے کہا گیا: بیشک بعض لوگ یہ کہتے ہیں کہ مومنین جہنم میں داخل ہوں گے، آپ رحمہ اللہ نے فرمایا: اللہ کی قسم! جہنم کی بھرتی مومنین کے علاوہ لوگوں سے ہوگی۔ [مصنف ابن ابي شيبه/كتاب الإيمان/حدیث: 32468]

حضرت مغیرہ رحمہ اللہ فرماتے ہیں کہ ایک آدمی نے حضرت شقیق رحمہ اللہ سے پوچھا: کیا آپ رحمہ اللہ نے حضرت ابن مسعود رضی اللہ عنہ کو یوں فرماتے سنا ہے: بلاشبہ جو شخص اس بات کی گواہی دے کہ وہ مومن ہے پس اسے چاہیے کہ وہ اس بات کی گواہی بھی دے کہ یقینا وہ جنت میں ہوگا؟ حضرت شقیق رحمہ اللہ نے فرمایا: جی ہاں! میں نے یہ سنا ہے۔ تم کتاب الإیمان والحمد للہ رب العالمین، والصلاۃ علی محمد صَلَّی اللَّہُ عَلَیْہِ وَسَلَّمَ۔ (ایمان کا بیان مکمل ہوا۔) [مصنف ابن ابي شيبه/كتاب الإيمان/حدیث: 32469]