حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: گھوڑے کی پیشانی میں قیامت تک خیر رکھ دی گئی ہے۔ [مصنف ابن ابي شيبه/كتاب السير/حدیث: 35741]

حضرت ابو بشیر انصاری رضی اللہ عنہ فرماتے ہیں کہ ہم نبی اکرم صلی اللہ علیہ وسلم کے ساتھ ایک سفر میں تھے آپ صلی اللہ علیہ وسلم نے ایک قاصد بھیج کر اعلان کروایا کہ: کسی اونٹ کی گردن میں کمان کی تانت کا قلادہ باقی نہ رہے مگر یہ کہ اسے کاٹ دیا جائے۔ [مصنف ابن ابي شيبه/كتاب السير/حدیث: 35742]

حضرت مکحول رحمہ اللہ سے مروی ہے کہ نبی کریم صلی اللہ علیہ وسلم نے ارشاد فرمایا: گھوڑوں کو قلادہ باندھو، لیکن گھوڑوں کو کمان کی تانت کے ساتھ مت باندھو۔ [مصنف ابن ابي شيبه/كتاب السير/حدیث: 35743]

حضرت ابو امامہ رضی اللہ عنہ فرماتے ہیں کہ گھوڑوں کو قلادہ باندھو، لیکن ان کو کمان کی تانت کے ساتھ مت باندھو۔ [مصنف ابن ابي شيبه/كتاب السير/حدیث: 35744]

حضرت مکحول رحمہ اللہ سے مروی ہے کہ نبی کریم صلی اللہ علیہ وسلم نے ارشاد فرمایا: گھوڑوں کو قلادہ باندھو، لیکن کمان کی تانت سے مت باندھو۔ [مصنف ابن ابي شيبه/كتاب السير/حدیث: 35745]

حضرت ربیعہ بن عبد اللہ رحمہ اللہ سے مروی ہے کہ حضرت عمر رضی اللہ عنہ جب کسی کو گھوڑے یا اونٹ پر سوار کرتے جہاد کیلئے تو اس کو فرماتے کہ جب تم وادی قریٰ یا مصر کے راستے میں اس کے مثل مقام سے گزر جاؤ تو پھر اس کے ساتھ جو چاہو کرو۔ [مصنف ابن ابي شيبه/كتاب السير/حدیث: 35746]

حضرت نافع رحمہ اللہ سے مروی ہے کہ حضرت ابن عمر رضی اللہ عنہما جب کسی کو جہاد کیلئے اونٹ پر سوار کرتے تو اس پر یہ شرط لگاتے کہ وادی قریٰ یا مصر کے راستے میں اس کے برابر پہنچنے سے قبل اس کو ہلاک نہ کرے، جب اس جگہ کو پیچھے چھوڑ دے تو وہ اس کے اپنے مال کی طرح ہے جو چاہے اس کے ساتھ کرے۔ [مصنف ابن ابي شيبه/كتاب السير/حدیث: 35747]

حضرت سعید بن المسیب سے دریافت کیا گیا کہ کسی شخص کو جہاد کیلئے کچھ دیا جائے تو جو اس کے پاس باقی بچ جائے اس کے ساتھ کیا کرے؟ فرمایا جب وہ جہاد کی جگہ پر پہنچ جائے تو وہ اس کے مال کی طرح ہے اس کے ساتھ وہی کرے جو اپنے مال کے ساتھ کرتا ہے۔ [مصنف ابن ابي شيبه/كتاب السير/حدیث: 35748]

حضرت عمرو جو غفرہ کے آزاد کردہ غلام ہیں وہ کہتے ہیں کہ میں جہاد پر جانے لگا تو جو کچھ میرے پاس تھا اس کے ساتھ شادی کرلی، ایک شخص نے جہاد کیلئے مجھے ساٹھ دینار ارسال کئے، فرماتے ہیں کہ میں حضرت سعید بن المسیب کے پاس آیا اور ان سے یہ معاملہ ذکر کر کے عرض کیا کہ جتنا میں نے خرچ کیا ہے اس کی بقدر اس میں سے گھر والوں کیلئے چھوڑ جاؤں؟ آپ نے فرمایا نہیں لیکن جب میدان جہاد پر پہنچ جاؤ تو پھر یہ تمہارے اپنے مال کی طرح ہے، پھر میں قاسم بن محمد کے پاس آیا اور ان سے یہ معاملہ ذکر کیا اور اس کے متعلق دریافت کیا، انہوں نے بھی حضرت سعید بن المسیب کی طرح ہی مجھ سے فرمایا۔ [مصنف ابن ابي شيبه/كتاب السير/حدیث: 35749]

حضرت سعید بن المسیب فرماتے ہیں کہ کسی شخص کو جہاد کیلئے کچھ دیا جائے پھر اس کے پاس کچھ بچ جائے تو جو کچھ بچ جائے وہ اسی کا ہے۔ [مصنف ابن ابي شيبه/كتاب السير/حدیث: 35799]