حضرت جندب البجلی رضی اللہ عنہ فرماتے ہیں کہ ہم ایک عجمی کافر کو پکڑ لیتے پھر وہ ایک بستی سے دوسری بستی تک ہماری رہنمائی کرتا۔ [مصنف ابن ابي شيبه/كتاب السير/حدیث: 35760]

حضرت حسن رحمہ اللہ سے دریافت کیا گیا کہ ایک آدمی کی بیوی کو قید کرلیا گیا تو اس کے خاوند نے فدیہ دے کر دشمن سے آزاد کر والیا تو کیا وہ اس کی باندی شمار ہوگی؟ فرمایا کہ نہیں۔ [مصنف ابن ابي شيبه/كتاب السير/حدیث: 35761]

حضرت ابن جریج رحمہ اللہ فرماتے ہیں کہ میں نے حضرت عطاء رحمہ اللہ سے دریافت کیا کہ کچھ آزاد عورتوں کو اگر دشمن قید کرے پھر ان کو کوئی شخص ان سے خرید لے، تو کیا وہ ان کے ساتھ جماع کرسکتا ہے؟ فرمایا کہ نہیں اور وہ باندی بھی نہیں بنیں گی بلکہ جتنا مال دے کر ان کو خریدا گیا ہے وہ وصول کرے گا ان سے اور اس رقم پر زیادتی نہیں کرے گا۔ [مصنف ابن ابي شيبه/كتاب السير/حدیث: 35762]

حضرت مساور الوراق رحمہ اللہ فرماتے ہیں کہ میں نے حضرت شعبی رحمہ اللہ سے دریافت کیا کہ ذمیوں کی ایک خاتون کو دشمنوں نے قید کرلیا پھر ان پر مسلمان غالب آگئے اور وہ ایک مسلمان مرد کے حصہ میں آئی تو اس کا کیا حکم ہے؟ حضرت شعبی نے فرمایا: جن سے عہد ہے ان کو واپس کردی جائے گی۔ [مصنف ابن ابي شيبه/كتاب السير/حدیث: 35763]

حضرت ابراہیم رحمہ اللہ فرماتے ہیں کہ ذمیوں کو اگر دشمن قید کرلیں پھر مسلمان ان پر غالب آجائیں تو وہ قیدی غلام شمار نہ ہوں گے۔ [مصنف ابن ابي شيبه/كتاب السير/حدیث: 35764]

حضرت عامر رحمہ اللہ فرماتے ہیں کہ ذمیوں کو نہیں فروخت کیا جائے گا۔ [مصنف ابن ابي شيبه/كتاب السير/حدیث: 35765]

حضرت عامر رحمہ اللہ فرماتے ہیں کہ آزاد اشخاص جو قید ہوگئے ہوں ان کو فروخت نہیں کیا جائے گا۔ [مصنف ابن ابي شيبه/كتاب السير/حدیث: 35766]

حضرت غاضرۃ العنبری رحمہ اللہ فرماتے ہیں کہ ہم لوگ حضرت عمر رضی اللہ عنہ کے پاس آئے، حضرت ابن عون رحمہ اللہ نے ارشاد فرمایا: یا تو خواتین کے متعلق فرمایا، یا لونڈیوں کے متعلق جن کے ساتھ زمانہ جاہلیت میں زنا کیا جاتا، حضرت عمر رضی اللہ عنہ نے ان کی اولاد کے بارے میں حکم دیا کہ ان کی قیمت ان کے باپوں پر لگائی جائے، اور ان کو غلام نہ بنایا جائے۔ [مصنف ابن ابي شيبه/كتاب السير/حدیث: 35767]

ابراہیم رحمہ اللہ فرماتے ہیں کہ مسلمانوں میں سے کسی شخص کو اگر دشمن قید کرلے پھر اس کو کوئی تاجر خرید لے تو وہ شخص تاجر کو وہ قیمت ادا کرنے کی کوشش کرے گا جو ادا کر کے اس نے اس کو خریدا ہے، اور اگر وہ مسلمانوں کے غلاموں کو قید کرلیں پھر ان کو کوئی تاجر خرید لے، پھر ان کو ان کا آقا پالے تو وہ قیمت دے کرلینے میں زیادہ حقدار ہے، اور اگر وہ کسی ذمی کو خرید لیں پھر وہ تاجر کو قیمت دے کر آزاد ہونے کی کوشش کرے گا۔ [مصنف ابن ابي شيبه/كتاب السير/حدیث: 35768]

حضرت عطاء رحمہ اللہ اس آزاد شخص کے متعلق جس کو دشمن قید کرلے پھر اس کو کوئی مسلمان خرید لے تو جو عورتوں کے متعلق ارشاد فرمایا تھا اسی کے مثل فرماتے ہیں اور حضرت عمرو بن دینار بھی اسی طرح فرماتے ہیں یعنی کہ جو قیمت دے کر خریدا گیا ہے وہ قیمت ان کو ادا کرے گا۔ [مصنف ابن ابي شيبه/كتاب السير/حدیث: 35769]