حضرت نافع رحمہ اللہ سے مروی ہے کہ حضرت ابن عمر رضی اللہ عنہما کی ایک قوم نے مہمان نوازی کی جب تین دن گزر گئے تو فرمایا اے نافع! ہم پر خرچ کر، ہمیں کوئی ضرورت نہیں ہے کہ ہم پر صدقہ کیا جائے۔ [مصنف ابن ابي شيبه/كتاب السير/حدیث: 35721]

حضرت عبدالواحد بن ایمن فرماتے ہیں کہ حضرت حسن بن محمد بن علی رحمہ اللہ ہمارے پاس تشریف لاتے، جب ہم تین دن تک ان کی خوب مہمان نوازی کرتے تو اس کے بعد ہم سے کچھ قبول کرنے سے انکار کرتے۔ [مصنف ابن ابي شيبه/كتاب السير/حدیث: 35722]

حضرت عبد اللہ رضی اللہ عنہ فرماتے ہیں کہ مسافر کیلئے تین دن کی اجازت ہے جس پر وہ گزرے، جب تین دن سے تجاوز کرے تو وہ صدقہ ہے، اور ہر نیکی صدقہ ہے۔ [مصنف ابن ابي شيبه/كتاب السير/حدیث: 35723]

حضرت ابو مجلز رحمہ اللہ فرماتے ہیں کہ مہمان کا حق تین دن ہے، جو اس سے تجاوز کرے وہ صدقہ ہے۔ [مصنف ابن ابي شيبه/كتاب السير/حدیث: 35724]

حضرت جندب البجلی رضی اللہ عنہ فرماتے ہیں کہ ہم ان کے گھروں میں ان کے ساتھ شریک ہوئے بغیر ان کے کھانے میں سے لے لیا کرتے تھے، اور ہم عجمی کافر کو پکڑ لیتے تو وہ ایک بستی سے دوسری بستی کی طرف ہماری رہنمائی کرتا تھا۔ [مصنف ابن ابي شيبه/كتاب السير/حدیث: 35725]

حضرت ابو ظبیان رحمہ اللہ فرماتے ہیں کہ ہم ایک غزوہ میں حضرت سلمان فارسی رضی اللہ عنہ کے ساتھ تھے یا تو جنگ جلولاء تھی یا پھر جنگ نھاوند۔ فرماتے ہیں کہ ہمارے پاس سے ایک شخص گزرا جس نے پھل توڑے ہوئے تھے، اس نے ساتھیوں کے درمیان ان کو تقسیم کرنا شروع کردیا، حضرت سلمان وہاں سے گزرے تو آپ نے اس کو برا بھلا کہا، اس نے بھی حضرت سلمان کو برا کہا نہ پہچاننے کی وجہ سے، اس کو بتایا گیا کہ یہ حضرت سلمان ہیں تو وہ حضرت سلمان کے پاس معذرت کے لیے گیا، پھر اس شخص نے ان سے پوچھا کہ! اے ابو عبد اللہ! ذمیوں کیلئے کیا چیز حلال ہے؟ حضرت سلمان نے فرمایا تین چیزیں۔ تمہاری گمراہی سے ہدایت یافتہ ہونے تک تمہارے فقر سے مالداری تک، جب ان میں سے کوئی تمہارے ساتھ ہو تو تم اس کے کھانے میں سے استعمال کرلو اور وہ تمہارے کھانے میں سے، اور تم اس کی سواری پر سوار ہوجاؤ، اور وہ جس طرف جانا چاہتا ہو اس سے اس کو مت پھیرو۔ [مصنف ابن ابي شيبه/كتاب السير/حدیث: 35726]

حضرت ابن عمر رضی اللہ عنہما سے مروی ہے کہ آنحضرت صلی اللہ علیہ وسلم نے ارشاد فرمایا: گھوڑے کی پیشانی پر قیامت تک خیر باندھ دی گئی، (رکھ دی گئی ہے) [مصنف ابن ابي شيبه/كتاب السير/حدیث: 35727]

حضرت عروہ البارقی رضی اللہ عنہ سے مروی ہے کہ آنحضرت صلی اللہ علیہ وسلم نے ارشاد فرمایا: گھوڑے کی پیشانی پر قیامت تک خیر رکھ دی گئی ہے اجر اور غنیمت بھی۔ [مصنف ابن ابي شيبه/كتاب السير/حدیث: 35728]

حضرت ابن ادریس اس حدیث میں اضافہ فرماتے ہیں کہ: اور اونٹ میں اس کے مالک کیلئے عزت ہے، اور بکری بھی باعث برکت ہے۔ [مصنف ابن ابي شيبه/كتاب السير/حدیث: 35729]

حضرت عروہ البارقی سے اسی طرح مروی ہے۔ [مصنف ابن ابي شيبه/كتاب السير/حدیث: 35730]