حضرت عبد اللہ ایک واعظ کے پاس سے گزرے جو جہنم کو یاد کر رہا تھا حضرت عبد اللہ نے فرمایا اے یاد کرنے والے لوگوں کو ناامید مت کر اللہ کا ارشاد ہے { یَا عِبَادِی الَّذِینَ أَسْرَفُوا عَلَی أَنْفُسِہِمْ لاَ تَقْنَطُوا مِنْ رَحْمَۃِ اللہِ }۔ [مصنف ابن ابي شيبه/كتاب الجنة/حدیث: 36928]

حضرت کعب سے مروی ہے کہ جب ملائکہ نے انسانوں کے گناہوں کو دیکھا تو عرض کیا اے اللہ! وہ گناہ کرتے ہیں اللہ تعالیٰ نے فرمایا: اگر تم ان کی طرح ہوتے تو وہی کرتے جو وہ کر رہے ہیں پس تم اپنے درمیان میں سے دو فرشتوں کو منتخب کرلو، انہوں نے ہاروت اور ماروت کو منتخب کرلیا اللہ تعالیٰ نے ان دو نوں فرشتوں سے فرمایا: میرے اور لوگوں کے درمیان تو پیغامبر ہے، میرے اور تمہارے درمیان کوئی نہیں ہے میرے ساتھ کسی کو شریک مت کرنا، چوری مت کرنا، زنا مت کرنا حضرت عبد اللہ نے فرمایا: حضرت کعب نے ارشاد فرمایا پس انہوں نے وہ دن پورا نہیں کیا تھا یہاں تک کہ جو ان پر حرام کیا گیا تھا اس میں پڑگئے۔ [مصنف ابن ابي شيبه/كتاب الجنة/حدیث: 36929]

حضرت ابن مسعود کے پاس ایک شخص اپنے گناہوں کی شکایت لے کر حاضر ہوا اور ان سے اس کے متعلق دریافت کیا حضرت ابن مسعود نے اس کی طرف توجہ نہ فرمائی اور لوگوں کی طرف متوجہ ہو کر ان سے گفتگو فرمانے لگے حضرت عبداللہ رضی اللہ عنہ کی نظر اس پر پڑی تو وہ رو رہا تھا۔ حضرت عبداللہ رضی اللہ عنہ نے اس سے فرمایا کہ جس مقصد کے لیے تو آیا تھا اب اس کا وقت آگیا ہے۔ جنت کے سات دروازے ہیں جن میں ہر ایک دروازہ بند ہوتا اور کھلتا ہے، سوائے توبہ کے دروازے کے۔ اس پر ایک فرشتہ مقرر ہے۔ تو عمل کرتا رہ اور مایوس نہ ہو۔ [مصنف ابن ابي شيبه/كتاب الجنة/حدیث: 36930]

حضرت انس سے مروی ہے کہ نبی کریم صلی اللہ علیہ وسلم نے ارشاد فرمایا سب انسان گنہگار ہیں اور بہترین گنہگار توبہ کرنے والے ہیں۔ [مصنف ابن ابي شيبه/كتاب الجنة/حدیث: 36931]

حضرت ابو قلابہ سے مروی ہے کہ جب اللہ نے ابلیس کو مردود فرمایا اس نے اللہ سے مہلت مانگی تو اللہ تعالیٰ نے قیامت تک اس کو مہلت عطا فرما دی، شیطان نے کہا اے اللہ مجھے تیری عزت کی قسم جب تک ابن آدم میں روح ہے میں اس کے پیٹ یا دل سے نہیں نکلوں گا اللہ تعالیٰ نے فرمایا مجھے میری عزت کی قسم جب تک اس میں روح ہے میں توبہ کو اس سے نہیں روکوں گا۔ [مصنف ابن ابي شيبه/كتاب الجنة/حدیث: 36932]

حضرت مالک سے مروی ہے کہ زبور میں لکھا تھا کہ: میں اللہ ہوں، میرے سوا کوئی معبود نہیں، تمام بادشاہوں کا بادشاہ ہوں تمام بادشاہوں کا دل میرے قبضہ میں ہے پس جو قوم نیک کام کرتی ہے میں ان پر مہربان بادشاہ مقرر کرتا ہوں اور جو قوم میری نافرمانی کرتی ہے میں بادشاہوں کو ان پر سزا بنا دیتا ہوں اپنے آپ کو بادشاہوں کو برا بھلا کہنے میں مشغول مت رکھو، ان کی طرف رجوع مت کرو میری طرف رجوع اور توبہ کرو میں ان کو تم پر مہربان کر دوں گا۔ [مصنف ابن ابي شيبه/كتاب الجنة/حدیث: 36933]

حضرت عبد اللہ سے مروی ہے کہ تم سے پہلی امت میں ایک شخص کفار کی قوم میں تھا، اور ان میں کچھ نیک لوگ بھی تھے اس شخص نے کہا: میں طویل عرصہ اپنے اس کفر میں رہا، میں ضرور اس نیک بستی میں آؤں گا تاکہ میں بھی نیکوں کاروں میں سے ہوجاؤں وہ اس بستی میں جانے کیلئے چلا تو اس کو موت آگئی، اس کے متعلق فرشتہ اور شیطان کا جھگڑا ہوگیا ایک کہنے لگا میں اس کا زیادہ مستحق ہوں اور دوسرا کہنے لگا کہ میں زیادہ مستحق ہوں اللہ تعالیٰ نے ان کے درمیان اپنے بعض لشکر کے ذریعہ فیصلہ فرمایا اس نے ان سے کہا کہ دونوں بستیوں کا فاصلہ ماپ لو جس بستی کے قریب ہوگا اسی میں سے شمار ہوگا انہوں نے اس کا درمیانی فاصلہ ناپا تو اس کو نیکو کاروں کی بستی کے قریب پایا پس وہ انہی میں سے ہوگیا۔ [مصنف ابن ابي شيبه/كتاب الجنة/حدیث: 36934]

حضرت ابو سعید الخدری رضی اللہ عنہ فرماتے ہیں کہ میں تمہیں وہی بتاتا ہوں جو میں نے رسول اکرم صلی اللہ علیہ وسلم کے دہن مبارک سے سنا، میرے کانوں نے سنا اور میرے دل نے محفوظ کیا، آپ صلی اللہ علیہ وسلم نے ارشاد فرمایا: ایک شخص نے ایک کم سو بندوں کو قتل کیا پھر اس کو توبہ کا خیال آیا اس نے روئے زمین کے سب سے بڑے عالم کے متعلق دریافت کیا تو اس کو ایک عالم کے بارے میں خبر دی گئی تو وہ اس عالم کے پاس آیا اور کہا میں نے ننانوے قتل کیے ہیں کیا میں توبہ کرسکتا ہوں؟ عالم نے کہا ننانوے قتلوں کے بعد بھی توبہ؟ اس شخص نے اپنی تلوار نکال کر اس کو بھی قتل کر کے سو کی تعداد مکمل کردی۔ پھر اس کو توبہ کا خیال آیا اس نے روئے زمین کے سب سے بڑے عالم کے متعلق دریافت کیا اس کو ایک عالم کا بتایا گیا تو وہ اس عالم کی خدمت میں حاضر ہوا اور عرض کیا کہ میں نے سو قتل کیے ہیں کیا میں توبہ کرسکتا ہوں؟ عالم نے اس سے کہا کہ تیرے اور توبہ کے درمیان کون حائل ہوسکتا ہے؟ اس خبیث بستی سے نکل جا جس میں تو ہے اور کسی نیکو کاروں کی بستی میں چلا جا، فلاں بستی میں چلا جا اور اپنے رب کی عبادت کر وہاں جا کر وہ شخص اس بستی میں جانے کیلئے نکلا، راستے میں اس کی موت کا وقت آگیا اس کے متعلق رحمت کے فرشتوں اور عذاب کے فرشتوں کا مخاصمہ ہوگیا، ابلیس نے کہا کہ میں اس کا زیادہ حقدار ہوں کیوں کہ اس نے کبھی ایک لمحہ بھی میری نافرمانی نہیں کی، رحمت کے فرشتوں نے کہا: یہ توبہ کے ارادہ سے نکلا تھا۔ [مصنف ابن ابي شيبه/كتاب الجنة/حدیث: 36935]

حضرت ابو رافع فرماتے ہیں کہ اللہ تعالیٰ نے ان کی طرف ایک فرشتہ بھیجا تو وہ اپنا جھگڑا اس کے پاس لے گئے۔ پھر راوی نے حضرت قتادہ کی حدیث کی طرف رجوع کیا اور کہا کہ دیکھو دونوں بستیوں میں سے کونسی بستی اس کے زیادہ قریب تھی، اس کو اسی کے ساتھ ملا دو۔ [مصنف ابن ابي شيبه/كتاب الجنة/حدیث: 36936]

راوی کہتے ہیں کہ مجھ سے حسن رحمہ اللہ نے بیان کیا، وہ فرماتے ہیں کہ جب اس شخص کو اپنی موت کا علم ہوا تو اس نے اپنے آپ کو آگے گھسیٹا، پس اللہ تعالیٰ نے نیکو کاروں کی بستی کو اس کے قریب کردیا اور بری بستی کو اس سے دور کردیا اور اس کو نیکو کاروں کی بستی والوں کے ساتھ ملا دیا۔ [مصنف ابن ابي شيبه/كتاب الجنة/حدیث: 36937]