حضرت صفوان فرماتے ہیں کہ میں نے حضرت ابن عمر رضی اللہ عنہما کا ہاتھ پکڑا ہوا تھا ان کے پاس ایک شخص آیا اور دریافت کیا کہ آپ رضی اللہ عنہ نے رسول اکرم صلی اللہ علیہ وسلم سے النجویٰ کے متعلق کیا سنا ہے؟ حضرت ابن عمر رضی اللہ عنہما نے فرمایا کہ میں نے رسول اکرم صلی اللہ علیہ وسلم سے سنا ہے کہ: اللہ تعالیٰ قیامت کے دن مومن کو قریب کریں گے یہاں تک کہ اس پر اپنا پردہ ڈال دیں گے اس کو لوگوں سے چھپا دیں گے پھر اللہ تعالیٰ فرمائیں گے اے بندے! تو فلاں فلاں گناہوں کو جانتا ہے؟ وہ عرض کرے گا جی ہاں میرے رب پھر اللہ تعالیٰ وہی فرمائیں گے اور بندہ اقرار کرے گا یہاں تک کہ جب وہ گناہوں کا اقرار کرے گا اور اس کو یقین ہوجائے گا کہ اب وہ ہلاک ہوگیا تو اللہ تعالیٰ فرمائیں گے میں نے تجھ پر دنیا میں پردہ ڈال رکھا تھا اور آج ان کو معاف کرچکا ہوں پھر اس کو حسنات کا اعمال نامہ دیا جائے گا بہر حال کفار اور منافقین پس گواہ اس کے متعلق کہیں گے کہ { ہَؤُلاَئِ الَّذِینَ کَذَبُوا عَلَی رَبِّہِمْ، أَلاَ لَعَنَۃُ اللہِ عَلَی الظَّالِمِینَ }۔ [مصنف ابن ابي شيبه/كتاب الجنة/حدیث: 36938]

حضرت عون فرماتے ہیں کہ اللہ اس کو گناہ سے پہلے ہی معافی کی خبر دیتا ہے { عَفَا اللہُ عَنْکَ لِمَ أَذِنْتَ لَہُمْ }۔ [مصنف ابن ابي شيبه/كتاب الجنة/حدیث: 36939]

حضرت ابوہریرہ رضی اللہ عنہ سے مروی ہے کہ رسول اکرم صلی اللہ علیہ وسلم نے ارشاد فرمایا: ایک شخص اپنی بستی سے دوسری بستی میں اپنے بھائی کی زیارت کی نیت سے نکلا اللہ نے اس کیلئے ایک فرشتہ راستہ میں بٹھا دیا، فرشتہ نے اس سے پوچھا کہ کہاں کا ارادہ ہے؟ اس شخص نے کہا کہ میرا ایک بھائی ہے اللہ کیلئے اس سے ملنے کیلئے اس بستی میں جا رہا ہوں فرشتہ نے کہا کہ کیا اس کا تجھ پر کوئی احسان ہے جس کی تو پرورش کر رہا ہو؟ اس شخص نے عرض کیا کہ نہیں بلکہ مجھے اس سے اللہ تعالیٰ کیلئے محبت ہے، فرشتہ نے کہا تو سن میں اللہ کا فرشتہ اور قاصد ہوں تیرے پاس آیا ہوں بیشک اللہ پاک آپ سے محبت فرماتے ہیں اس محبت کی وجہ سے جو تم اپنے بھائی سے اس کیلئے کرتے ہو۔ [مصنف ابن ابي شيبه/كتاب الجنة/حدیث: 36940]

حضرت عروہ بن عاصم سے مروی ہے کہ ایک شخص پر اس کے گناہوں کو پیش کیا جائے گا وہ ایک گناہ کے پاس سے گزرے گا تو کہے گا کہ میں تجھ سے ڈرتا رہا تھا پھر اللہ اس کے گناہوں کو معاف فرما دیں گے۔ [مصنف ابن ابي شيبه/كتاب الجنة/حدیث: 36941]

حضرت عطاء بن یسار فرماتے ہیں کہ قیامت کے دن لوگوں کو ناامید کرنے والوں کو روک لیا جائے گا، لوگ ان کی گردنوں کو روندتے ہوئے گزریں گے۔ [مصنف ابن ابي شيبه/كتاب الجنة/حدیث: 36942]

حضرت عبد اللہ رضی اللہ عنہ قرآن مجید کی آیت { فَطَلِّقُوہُنَّ لِعِدَّتِہِنَّ } کی تفسیر میں فرماتے ہیں کہ انہیں اس حال میں طلاق دو کہ وہ پاک ہوں اور اس طہر میں ان سے جماع نہ کیا ہو۔ [مصنف ابن ابي شيبه/كتاب الجنة/حدیث: 36943]