حضرت طاوس فرماتے ہیں کہ مومن کے دین کو اس کی قبر ہی بچا سکتی ہے۔ [مصنف ابن ابي شيبه/كتاب الزهد/حدیث: 38074]

حضرت طاوس فرماتے ہیں کہ میں نے اپنے نفس پر مطمئن ہوجانے والے شخص جیسا کوئی نہیں دیکھا۔ میں نے ایک ایسا آدمی دیکھا کہ اگر مجھ سے پوچھا جاتا کہ جن لوگوں کو تم جانتے ہو ان میں سب سے افضل کون ہے؟ تو میں اس آدمی کے بارے میں کہتا: فلاں۔ وہ اسی حال پر رہا، پھر اس کے پیٹ میں درد اٹھا اور اس سے اسے کچھ تکلیف پہنچی۔
گذارش: حضرت طاوس کے اس اثر کا باقی حصہ واضح نہیں ہوسکا۔ مصنف ابن ابی شیبہ کے محقق محمد عوامہ اس اثر کے حاشیے میں فرماتے ہیں کہ اس خبر کے باقی حصے کا مطلب مجھ پر واضح نہیں ہوا۔ [مصنف ابن ابي شيبه/كتاب الزهد/حدیث: 38075]

حضرت ابو ہاشم فرماتے ہیں کہ حضرت طاوس کی قمیص ازار سے اوپر اور ان کی چادر قمیص سے اوپر ہوتی تھی۔ [مصنف ابن ابي شيبه/كتاب الزهد/حدیث: 38076]

حضرت طاوس فرماتے ہیں کہ جو شخص رات کو نماز میں دس آیات کی تلاوت کرے تو صبح میں اس کے لئے سو یا اس سے زیادہ نیکیاں لکھی جاتی ہیں۔ [مصنف ابن ابي شيبه/كتاب الزهد/حدیث: 38077]

حضرت سعید بن جبیر رحمہ اللہ فرماتے ہیں کہ اللہ پر توکل کرنا ایمان کی بنیاد ہے۔ [مصنف ابن ابي شيبه/كتاب الزهد/حدیث: 38078]

حضرت سعید بن جبیر رحمہ اللہ فرماتے تھے کہ اے اللہ! میں تجھ سے تجھ پر سچے بھروسے کی صفت کا سوال کرتا ہوں اور تیرے ساتھ اچھا گمان کرنے کا سوال کرتا ہوں۔ [مصنف ابن ابي شيبه/كتاب الزهد/حدیث: 38079]

حضرت بکیر بن عتیق فرماتے ہیں کہ میں نے حضرت سعید بن جبیر کو ایک پیالے میں شہد کا ایک گھونٹ پلایا تو انہوں نے مجھ سے فرمایا کہ خدا کی قسم! مجھ سے اس کے بارے میں بھی سوال کیا جائے گا۔ میں نے کہا وہ کیوں؟ انہوں نے فرمایا کہ میں نے اس کو پیا ہے اور اس سے لذت اٹھائی ہے۔ [مصنف ابن ابي شيبه/كتاب الزهد/حدیث: 38080]

حضرت عمر بن ذر کہتے ہیں کہ میں نے حضرت سعید بن جبیر کا وہ خط پڑھا جو انہوں نے میرے والد کی طرف لکھا، اس میں مکتوب تھا کہ ہر وہ دن جس میں مسلمان زندہ رہے وہ اس کے لئے غنیمت ہے۔ [مصنف ابن ابي شيبه/كتاب الزهد/حدیث: 38081]

حضرت سعید بن جبیر قرآن مجید کی آیت { بَلْ مَکْرُ اللَّیْلِ وَالنَّہَارِ } کی تفسیر میں فرماتے ہیں کہ اس سے مراد دن اور رات کا گذرنا ہے۔ [مصنف ابن ابي شيبه/كتاب الزهد/حدیث: 38082]

حضرت سعید بن جبیر فرماتے ہیں کہ غفلت والوں میں اللہ کا ذکر کرنے والا ایسے ہے جیسے ثواب کی امید رکھنے والوں کی حفاظت کرنے والا۔ [مصنف ابن ابي شيبه/كتاب الزهد/حدیث: 38083]