سیدنا علی رضی اللہ عنہ ارشاد فرماتے ہیں: ”جب نفاس والی عورت طہر دیکھ لے تو اب اس کے لیے نماز کو ترک کرنا جائز نہیں ہو گا۔“ [سنن الدارقطني/ كتاب الحيض/حدیث: 867]

عبدالرحمن بن غنم بیان کرتے ہیں: میں نے سیدنا معاذ بن جبل رضی اللہ عنہ سے ایسی حائضہ عورت کے بارے میں دریافت کیا جو سورج غروب ہونے سے تھوڑی دیر پہلے پاک ہو جاتی ہے تو انہوں نے فرمایا: ”وہ عصر کی نماز ادا کرے گی۔“ میں نے دریافت کیا: ”جو شفق غروب ہونے سے پہلے پاک ہو جائے؟“ تو انہوں نے فرمایا: ”وہ مغرب کی نماز ادا کرے گی۔“ میں نے دریافت کیا: ”اگر وہ صبح صادق ہونے سے پہلے پاک ہو گئی؟“ انہوں نے فرمایا: ”وہ عشاء کی نماز ادا کرے گی۔“ میں نے دریافت کیا: ”جو سورج طلوع ہونے سے پہلے پاک ہو جائے؟“ تو انہوں نے فرمایا: ”وہ صبح کی نماز ادا کرے گی۔“ نبی کریم صلی اللہ علیہ وسلم نے ہمیں یہی ہدایت کی تھی: ”ہم عورتوں کو یعنی اپنی خواتین کو اس بات کی تعلیم دیں۔“ اس روایت کو محمد بن سعید نامی راوی نے نقل کیا ہے۔ یہ شخص متروک الحدیث ہے۔ [سنن الدارقطني/ كتاب الحيض/حدیث: 868]

سیدنا جابر بن عبداللہ رضی اللہ عنہ بیان کرتے ہیں: ایک مرتبہ ہم نبی کریم صلی اللہ علیہ وسلم کے ہمراہ غزوہ ذات الرقاع میں شریک ہوئے۔ اس دوران ایک شخص نے ایک مشرک عورت کے ساتھ صحبت کر لی۔ جب نبی کریم صلی اللہ علیہ وسلم واپس تشریف لا رہے تھے تو اس کا شوہر بھی آ گیا جو پہلے وہاں موجود نہیں تھا۔ اس نے یہ قسم اٹھائی کہ وہ اس وقت تک باز نہیں آئے گا جب تک نبی کریم صلی اللہ علیہ وسلم کے اصحاب میں سے کسی ایک کا خون نہیں بہائے گا۔ پھر وہ نبی کریم صلی اللہ علیہ وسلم کے پیچھے روانہ ہو گیا۔ جہاں کہیں بھی نبی کریم صلی اللہ علیہ وسلم پڑاؤ کرتے (قاضی نے یہ الفاظ نقل کیے ہیں)۔ جب نبی کریم صلی اللہ علیہ وسلم نے ایک جگہ پڑاؤ کیا تو آپ نے ارشاد فرمایا: ”آج رات کو ہماری پہرے داری کون کرے گا؟“ تو ایک انصاری اور ایک مہاجر شخص آگے بڑھے۔ نبی کریم صلی اللہ علیہ وسلم نے فرمایا: ”تم دونوں گھاٹی کے کنارے پر رہنا۔“ پھر نبی کریم صلی اللہ علیہ وسلم اور آپ کے اصحاب نے وادی کی گھاٹی میں پڑاؤ کیا۔ جب یہ دونوں حضرات گھاٹی کے سرے پر پہنچے تو انصاری شخص نے مہاجر سے کہا: ”تم رات کے کون سے حصے میں سونا پسند کرو گے، پہلے حصے میں یا آخری حصے میں؟“ اس نے کہا: ”پہلے حصے میں۔“ راوی بیان کرتے ہیں: وہ مہاجر شخص ہٹ کر سو گیا اور انصاری کھڑا ہو کر نماز ادا کرنے لگا۔ وہی شخص (مشرک) آیا۔ جب اس نے ایک شخص کا چہرہ دیکھا تو اسے پتہ چل گیا کہ یہ لوگوں کی حفاظت کے لیے ہے۔ تو اس نے اس انصاری کو تیر مارا جو اسے لگا۔ اس انصاری نے اس تیر کو نکالا، کھڑا رہا۔ پھر اس شخص نے دوسرا تیر مارا جو اسے لگا۔ تو انصاری نے اسے بھی نکال دیا اور خود نماز پڑھتا رہا۔ اس شخص نے تیسرا تیر مارا جو اس انصاری کو لگا تو اس انصاری نے اسے نکال کر رکھ دیا۔ پھر وہ انصاری رکوع میں گیا، پھر سجدے میں گیا، پھر اس نے اپنے ساتھی کو اٹھا دیا (اور اس سے کہا): ”اٹھ جاؤ کیونکہ میرا بہت خون بہہ گیا ہے۔“ جب اس مشرک نے ان دونوں حضرات کو دیکھا تو اسے اندازہ ہو گیا کہ اب یہ اسے ماریں گے۔ جب مہاجر نے انصاری کا خون بہتا ہوا دیکھا تو بولا: ”سبحان اللہ! تم نے مجھے پہلے بیدار کیوں نہیں کیا؟“ ایک روایت میں یہ الفاظ ہیں: ”جب اس نے تمہیں پہلے تیر مارا تھا تم نے اس وقت مجھے کیوں نہیں بتایا؟“ تو اس انصاری نے کہا: ”میں ایک ایسی سورت پڑھ رہا تھا، اسے ختم کرنے سے پہلے مجھے درمیان میں چھوڑنا اچھا نہیں لگا۔ لیکن جب اس شخص نے مسلسل میری طرف تیر اندازی کی تو پھر میں رکوع میں چلا گیا (نماز ختم کرنے کے بعد) پھر میں نے تمہیں بیدار کیا۔ اللہ کی قسم! نبی کریم صلی اللہ علیہ وسلم نے مجھے جس چیز کی حفاظت کی ہدایت کی تھی اگر میں اس کو ضائع کرنے والا نہ ہوتا تو (میری یہ خواہش تھی) اس کو ختم کرنے سے پہلے مر جاتا۔“ [سنن الدارقطني/ كتاب الحيض/حدیث: 869]

سیدنا مسور بن مخرمہ رضی اللہ عنہ بیان کرتے ہیں: سیدنا عمر رضی اللہ عنہ نماز ادا کرتے رہے جبکہ ان کے زخم سے خون بہہ رہا تھا۔ [سنن الدارقطني/ كتاب الحيض/حدیث: 870]

یہی روایت ایک اور سند کے ہمراہ بھی سیدنا مسور بن مخرمہ رضی اللہ عنہ کے حوالے سے سیدنا عمر رضی اللہ عنہ کے بارے میں منقول ہے۔ [سنن الدارقطني/ كتاب الحيض/حدیث: 871]

سیدنا جرھد رضی اللہ عنہ بیان کرتے ہیں: نبی کریم صلی اللہ علیہ وسلم ان کے پاس سے گزرے۔ وہ اس وقت مسجد میں تھے۔ انہوں نے ایسی چادر لی ہوئی تھی جس میں ان کی ران ظاہر ہو رہی تھی۔ نبی کریم صلی اللہ علیہ وسلم نے ارشاد فرمایا: ”ران پردے کی چیز ہے۔“ [سنن الدارقطني/ كتاب الحيض/حدیث: 872]

یہی روایت ایک سند کے ہمراہ بھی منقول ہے۔ [سنن الدارقطني/ كتاب الحيض/حدیث: 873]

سیدنا علی بن ابوطالب رضی اللہ عنہ بیان کرتے ہیں: نبی کریم صلی اللہ علیہ وسلم نے مجھ سے یہ فرمایا: ”تم اپنی ران پر پردہ رکھنا کیونکہ ران پردے کی چیز ہے۔“ [سنن الدارقطني/ كتاب الحيض/حدیث: 874]

سیدنا علی بن ابوطالب رضی اللہ عنہ بیان کرتے ہیں: نبی کریم صلی اللہ علیہ وسلم نے مجھ سے یہ فرمایا: ”تم اپنی ران کو بے پردہ نہ کرنا اور کسی زندہ یا مردہ شخص کی ران کی طرف نہ دیکھنا۔“ [سنن الدارقطني/ كتاب الحيض/حدیث: 875]

سیدنا علی بن ابوطالب رضی اللہ عنہ بیان کرتے ہیں: میں نے نبی کریم صلی اللہ علیہ وسلم سے اس پٹی کے بارے میں پوچھا جو زخم پر باندھی جاتی ہے کہ ایسا شخص وضو کیسے کرے گا، اور اگر وہ جنبی ہو جائے تو غسل کیسے کرے گا؟ نبی کریم صلی اللہ علیہ وسلم نے فرمایا: ”ایسا شخص جنابت کی حالت میں پانی سے اس پر مسح کر لے گا۔“ پھر میں نے عرض کیا: اگر سردی ہو یا جان کا اندیشہ ہو؟ نبی کریم صلی اللہ علیہ وسلم نے فرمایا: ”وہ اپنے پورے جسم پر مسح کر لے گا۔“ پھر آپ نے یہ آیت تلاوت کی: ”تم اپنے آپ کو قتل نہ کرو، بیشک اللہ تمہارے بارے میں رحم کرنے والا ہے۔“ آپ نے فرمایا: ”ایسے شخص کو جب اندیشہ ہو تو وہ تیمم کر لے۔“ [سنن الدارقطني/ كتاب الحيض/حدیث: 876]