سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اگر تم یہ چاہتے ہو کہ تمہاری نماز پاکیزہ ہو جائے، تو تم اپنے نیک لوگوں کو آگے کرو (یعنی ان سے امامت کرواؤ)۔“ ابوالولید نامی راوی خالد بن اسماعیل ہے اور یہ ضعیف ہے۔ [سنن الدارقطني/ كتاب الصلاة/حدیث: 1312]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص نماز کی ایک رکعت کو پالے، اس نے اس نماز کو پا لیا، یعنی وہ اس سے پہلے پائے کہ امام (آخری رکعت کے رکوع سے) کمر اٹھا چکا ہو (یعنی کھڑا ہو چکا ہو)۔“ [سنن الدارقطني/ كتاب الصلاة/حدیث: 1313]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب تم نماز کے لیے آؤ اور ہم سجدے کی حالت میں ہوں، تو تم بھی سجدے میں چلے جاؤ، لیکن اس کو رکعت شمار نہ کرنا اور جو شخص ایک رکعت کو پالے، اس نے نماز کو پا لیا۔“ [سنن الدارقطني/ كتاب الصلاة/حدیث: 1314]

سیدنا ابومسعود رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اس شخص کی نماز نہیں ہوتی جو رکوع اور سجدے میں کمر سیدھی نہیں رکھتا۔“ اس حدیث کی سند ثابت اور صحیح ہے۔ [سنن الدارقطني/ كتاب الصلاة/حدیث: 1315]

یہی روایت ایک اور سند کے ہمراہ بھی منقول ہے، تاہم اس میں یہ الفاظ ہیں: ”اس شخص کی نماز نہیں ہوتی جو شخص نماز میں کمر کو قائم نہیں رکھتا۔“ [سنن الدارقطني/ كتاب الصلاة/حدیث: 1316]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے اپنی ایک اہلیہ کو دیکھا جو نماز ادا کر رہی تھی، وہ اپنی ناک زمین پر نہیں رکھ رہی تھی، نبی کریم صلی اللہ علیہ وسلم نے ارشاد فرمایا: ”اے خاتون! تم اپنی ناک زمین پر رکھو، اس شخص کی نماز نہیں ہوتی جو اپنی ناک اور پیشانی کے ساتھ نماز کے دوران زمین پر نہیں رکھتا۔“ اس روایت کا راوی ناصب ضعیف ہے اور مقاتل کی عروہ کے حوالے سے نقل کے حوالے سے یہ روایت مستند نہیں ہے۔ [سنن الدارقطني/ كتاب الصلاة/حدیث: 1317]

سیدنا عبداللہ بن عباس رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”اس شخص کی نماز نہیں ہوتی جو اپنی ناک زمین پر نہیں رکھتا۔“ دیگر راویوں نے اس کو مرسل حدیث کے طور پر نقل کیا ہے۔ [سنن الدارقطني/ كتاب الصلاة/حدیث: 1318]

سیدنا عبداللہ بن عباس رضی اللہ عنہما بیان کرتے ہیں: آپ صلی اللہ علیہ وسلم نے ایک شخص کو نماز ادا کرتے ہوئے دیکھا جو ناک زمین پر نہیں رکھ رہا تھا، نبی کریم صلی اللہ علیہ وسلم نے ارشاد فرمایا: ”اس شخص کی نماز نہیں ہوتی جو اس وقت ناک زمین پر نہیں رکھتا جب وہ پیشانی زمین پر رکھتا ہے۔“ یہ روایت ایک اور سند کے ہمراہ مرسل کے طور پر منقول ہے۔ [سنن الدارقطني/ كتاب الصلاة/حدیث: 1319]

عبدالعزیز بیان کرتے ہیں: میں نے وہب سے کہا: اے ابونعیم! آپ نماز کے دوران اپنی پیشانی اور ناک زمین پر کیوں نہیں رکھتے؟ تو انہوں نے فرمایا: میں نے سیدنا جابر بن عبداللہ رضی اللہ عنہ کو یہ بیان کرتے ہوئے سنا ہے: میں نے نبی کریم صلی اللہ علیہ وسلم کو دیکھا، آپ نے پیشانی کے اوپر والے حصے، یعنی جہاں سے بالوں کا آغاز ہوتا ہے، اس پر سجدہ کیا تھا۔ اس روایت کو نقل کرنے میں عبدالعزیز نامی راوی منفرد ہیں اور یہ مستند نہیں ہیں۔ [سنن الدارقطني/ كتاب الصلاة/حدیث: 1320]

سیدنا عبداللہ بن عمر رضی اللہ عنہما بیان کرتے ہیں: نماز میں (بیٹھنے کا) سنت طریقہ یہ ہے کہ بائیں پاؤں کو بچھا لیا جائے اور دائیں پاؤں کو کھڑا رکھا جائے۔ اس روایت کو نقل کرنے میں عبدالوہاب نامی راوی منفرد ہیں۔ [سنن الدارقطني/ كتاب الصلاة/حدیث: 1321]