سیدنا ابن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”ناک جھاڑو (اور صاف کرو) دو بار یا تین بار، خوب اچھی طرح۔“ [سنن ابي داود/كتاب الطهارة/حدیث: 141]

سیدنا لقیط بن صبرہ رضی اللہ عنہ کہتے ہیں کہ قبیلہ بنی مُنتَفِق کا جو وفد رسول اللہ صلی اللہ علیہ وسلم کی خدمت میں آیا تھا، میں اس کا سردار تھا یا ایک فرد۔ جب ہم رسول اللہ صلی اللہ علیہ وسلم کی خدمت میں پہنچے تو ہم نے آپ صلی اللہ علیہ وسلم کو گھر میں نہ پایا۔ ہم نے ام المؤمنین سیدہ عائشہ رضی اللہ عنہا کو پایا۔ انہوں نے ہمارے لیے «خَزِيرَة» ”خزیرہ“ بنانے کا حکم دیا اور وہ ہمارے لیے بنا دیا گیا۔ پھر ہمارے سامنے ایک کھجوروں بھرا طبق لایا گیا، قتیبہ رحمہ اللہ نے لفظ «قِنَاع» ”قناع“ نہیں بولا۔ اور «قِنَاع» ”قناع“ ایسے طبق کو کہتے ہیں جس میں کھجوریں ہوں۔ پھر رسول اللہ صلی اللہ علیہ وسلم بھی تشریف لے آئے اور دریافت فرمایا: ”کیا تمہیں کچھ ملا ہے یا تمہارے لیے کچھ کہا گیا ہے؟“ ہم نے عرض کیا: ”ہاں اے اللہ کے رسول! (ہم نے خزیرہ کھا لیا ہے)۔“ اس اثنا میں جبکہ ہم آپ صلی اللہ علیہ وسلم کے پاس بیٹھے تھے، چرواہے نے رسول اللہ صلی اللہ علیہ وسلم کی بکریاں باڑے کی طرف چلائیں اور اس کے پاس بکری کا ایک بچہ بھی تھا جو ممیا رہا تھا۔ آپ صلی اللہ علیہ وسلم نے پوچھا: ”ارے کیا جنوایا ہے؟“ اس نے کہا: ”ایک بچہ ہے۔“ آپ صلی اللہ علیہ وسلم نے فرمایا: ”اب ہمارے لیے اس کے بدلے ایک بکری ذبح کر دو۔“ پھر (ہم سے) فرمایا: ”یہ نہ سمجھنا کہ ہم تمہاری خاطر اسے ذبح کر رہے ہیں۔“ (سیدنا لقیط رضی اللہ عنہ کہتے ہیں کہ رسول اللہ صلی اللہ علیہ وسلم نے یہاں لفظ «تَحْسِبَنَّ» سین کے کسرہ (زیر) کے ساتھ ادا فرمایا، فتحہ (زبر) کے ساتھ نہیں)۔ ”(دراصل) ہماری سو بکریاں ہیں، ہم نہیں چاہتے کہ اس سے بڑھ جائیں۔ تو یہ چرواہا جب بھی کسی بکری کے بچہ جننے کی خبر لاتا ہے تو ہم اس کے بدلے ایک بکری ذبح کر لیتے ہیں۔“ سیدنا لقیط رضی اللہ عنہ کہتے ہیں کہ (اس موقع پر) میں نے کہا: ”اے اللہ کے رسول! میری بیوی ہے اور اس کی زبان میں کچھ ہے، یعنی زبان دراز اور بدگو ہے۔“ آپ صلی اللہ علیہ وسلم نے فرمایا: ”اسے طلاق دے دو۔“ میں نے کہا: ”اے اللہ کے رسول! اس کا میرے ساتھ ایک وقت گزرا ہے اور میری اس سے اولاد بھی ہے۔“ آپ صلی اللہ علیہ وسلم نے فرمایا: ”تو پھر اسے نصیحت کرو۔ اگر اس میں خیر ہوئی تو سمجھ جائے گی۔ اور ایسے مت مارنا جیسے اپنی لونڈی کو مارتے ہو۔“ پھر میں نے کہا: ”اے اللہ کے رسول! مجھے وضو کے بارے میں ارشاد فرمائیے۔“ آپ صلی اللہ علیہ وسلم نے فرمایا: ”وضو خوب کامل کیا کرو اور انگلیوں کے درمیان خلال کیا کرو اور ناک میں خوب پانی چڑھایا کرو الا یہ کہ روزے سے ہو۔“ [سنن ابي داود/كتاب الطهارة/حدیث: 142]

عاصم بن لقیط بن صبرہ اپنے والد (لقیط بن صبرہ رضی اللہ عنہ) سے راوی ہیں، جو کہ وفدِ بنی منتفق کے سردار تھے کہ وہ سیدہ عائشہ رضی اللہ عنہا کے پاس آئے اور مذکورہ بالا حدیث کے ہم معنی بیان کیا۔ اس روایت میں ہے: ”ہم بیٹھے ہی تھے کہ اتنے میں رسول اللہ صلی اللہ علیہ وسلم زور سے قدم اٹھاتے ہوئے، آگے کو جھک کر چلتے ہوئے تشریف لائے۔“ اور اس روایت میں «خَزِيْرَةٌ» کی بجائے «عَصِيْدَةٌ» کا ذکر ہے۔ [سنن ابي داود/كتاب الطهارة/حدیث: 143]

جناب محمد بن یحییٰ بن فارس رحمہ اللہ کی سند سے بھی یہ حدیث مروی ہے، انہوں نے کہا کہ ”جب تو وضو کرے تو کلی کر۔“ [سنن ابي داود/كتاب الطهارة/حدیث: 144]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب وضو کرتے تو پانی کا ایک چلو لے کر اپنی ٹھوڑی کے نیچے داخل کرتے اور اس سے داڑھی کا خلال کرتے اور فرماتے: ”مجھے میرے رب عزوجل نے ایسے ہی حکم دیا ہے۔“ امام ابوداؤد رحمہ اللہ کہتے ہیں: ”ولید بن زوران سے حجاج بن حجاج اور ابوملیح رقی نے (بھی) روایت کیا ہے۔“ [سنن ابي داود/كتاب الطهارة/حدیث: 145]

سیدنا ثوبان رضی اللہ عنہ کہتے ہیں کہ رسول اللہ صلی اللہ علیہ وسلم نے ایک (جہادی) مہم بھیجی تو ان لوگوں کو سردی نے آ لیا، جب یہ لوگ رسول اللہ صلی اللہ علیہ وسلم کے پاس آئے تو آپ صلی اللہ علیہ وسلم نے انہیں حکم دیا کہ ”وہ اپنی پگڑیوں اور موزوں پر مسح کر لیا کریں۔“ [سنن ابي داود/كتاب الطهارة/حدیث: 146]

سیدنا انس رضی اللہ عنہ کہتے ہیں کہ ”میں نے رسول اللہ صلی اللہ علیہ وسلم کو وضو کرتے ہوئے دیکھا۔ آپ صلی اللہ علیہ وسلم کے سر پر ایک قطری پگڑی تھی تو آپ صلی اللہ علیہ وسلم نے اپنے ہاتھ پگڑی کے نیچے کیے اور سر کے اگلے حصے کا مسح کیا اور پگڑی کو نہ کھولا۔“ [سنن ابي داود/كتاب الطهارة/حدیث: 147]

سیدنا مستورد بن شداد رضی اللہ عنہ کہتے ہیں کہ ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم جب وضو کرتے تو اپنے پاؤں کی انگلیوں کو اپنی چھنگلی سے ملتے تھے۔“ [سنن ابي داود/كتاب الطهارة/حدیث: 148]

سیدنا مغیرہ بن شعبہ رضی اللہ عنہ کہتے ہیں کہ میں غزوہ تبوک میں رسول اللہ صلی اللہ علیہ وسلم کے ساتھ تھا۔ نماز فجر سے پہلے ایک مقام پر آپ صلی اللہ علیہ وسلم راستے سے ایک جانب کو ہو گئے تو میں بھی آپ صلی اللہ علیہ وسلم کے ساتھ مڑ گیا۔ نبی کریم صلی اللہ علیہ وسلم نے اپنا اونٹ بٹھایا اور قضائے حاجت کے لیے چلے گئے۔ واپس آئے تو میں نے لوٹے سے آپ صلی اللہ علیہ وسلم کے ہاتھ پر پانی ڈالا۔ آپ صلی اللہ علیہ وسلم نے پہلے اپنے ہاتھ اور پھر چہرہ دھویا۔ پھر آپ صلی اللہ علیہ وسلم نے اپنے ہاتھ کو جبے کی آستینوں سے نکالنا چاہا مگر وہ تنگ تھیں، تو آپ صلی اللہ علیہ وسلم نے اپنے ہاتھ واپس آستین میں ڈال لیے اور انہیں جبے کے نیچے سے نکالا اور انہیں کہنیوں تک دھویا، پھر آپ صلی اللہ علیہ وسلم نے اپنے سر کا مسح کیا، پھر اپنے موزوں پر مسح کیا، پھر آپ صلی اللہ علیہ وسلم سوار ہو گئے اور چل دیے حتیٰ کہ ہم نے لوگوں کو نماز میں پایا اور وہ سیدنا عبدالرحمٰن بن عوف رضی اللہ عنہ کو (بطور امام) آگے کر چکے تھے۔ انہوں نے نماز پڑھائی جب کہ نماز کا وقت ہو گیا تھا، ہم نے پایا کہ سیدنا عبدالرحمٰن رضی اللہ عنہ انہیں نماز فجر کی ایک رکعت پڑھا چکے تھے۔ رسول اللہ صلی اللہ علیہ وسلم مسلمانوں کے ساتھ صف میں کھڑے ہو گئے اور عبدالرحمٰن بن عوف رضی اللہ عنہ کے پیچھے دوسری رکعت پڑھی۔ سیدنا عبدالرحمٰن رضی اللہ عنہ نے (نماز مکمل ہونے پر) سلام پھیرا تو نبی کریم صلی اللہ علیہ وسلم اپنی نماز پوری کرنے کے لیے کھڑے ہو گئے۔ (یہ دیکھ کر) مسلمان گھبرا گئے اور بہت زیادہ تسبیح کہنے لگے، کیونکہ انہوں نے نماز میں نبی کریم صلی اللہ علیہ وسلم سے سبقت کی تھی۔ جب رسول اللہ صلی اللہ علیہ وسلم نے سلام پھیرا تو فرمایا: ”تم لوگوں نے درست کیا۔“ یا کہا ”بہت اچھا کیا۔“ [سنن ابي داود/كتاب الطهارة/حدیث: 149]

سیدنا مغیرہ بن شعبہ رضی اللہ عنہ سے روایت ہے، وہ کہتے ہیں کہ ”رسول اللہ صلی اللہ علیہ وسلم نے (ایک بار) وضو کیا (تو) اپنے سر کے اگلے حصے پر مسح کیا۔ ساتھ ہی یہ کہا: ”پگڑی پر بھی۔““ جناب معتمر کی روایت میں سیدنا مغیرہ رضی اللہ عنہ سے مروی ہے کہ ”نبی کریم صلی اللہ علیہ وسلم موزوں پر، اپنے سر کے اگلے حصے اور اپنی پگڑی پر مسح کیا کرتے تھے۔“ بکر کہتے ہیں کہ ”میں نے یہ روایت مغیرہ کے بیٹے سے براہ راست سنی ہے۔“ [سنن ابي داود/كتاب الطهارة/حدیث: 150]