سیدنا مغیرہ بن شعبہ رضی اللہ عنہ سے روایت ہے کہ ”رسول اللہ صلی اللہ علیہ وسلم موزوں پر مسح کیا کرتے تھے۔“ محمد بن صباح کے علاوہ (دوسرے مشائخ) نے کہا کہ ”آپ نے موزوں کی پشت (یعنی پاؤں کی اوپر والی جانب) پر مسح کیا۔“ [سنن ابي داود/كتاب الطهارة/حدیث: 161]

سیدنا علی رضی اللہ عنہ سے روایت ہے، انہوں نے فرمایا: ”اگر دین رائے اور قیاس پر مبنی ہوتا تو موزوں کا نیچے والا حصہ اوپر والے کی بہ نسبت مسح کا زیادہ مستحق ہوتا، مگر میں نے رسول اللہ صلی اللہ علیہ وسلم کو دیکھا ہے کہ آپ صلی اللہ علیہ وسلم اپنے موزوں کے اوپر ہی مسح کیا کرتے تھے۔“ [سنن ابي داود/كتاب الطهارة/حدیث: 162]

جناب اعمش اپنی سند سے اس حدیث کو روایت کرتے ہیں، انہوں نے کہا: ”میں پاؤں کے نیچے والے حصے ہی کو زیادہ لائق سمجھتا تھا کہ اسے دھویا جائے حتیٰ کہ میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم اپنے موزوں کے اوپر کے حصے ہی کا مسح کرتے تھے۔“ اس حدیث کو وکیع نے اعمش سے اپنی سند سے روایت کیا تو کہا: ”میں سمجھتا تھا کہ پاؤں کا نیچے والا حصہ ہی اس بات کے زیادہ لائق ہوتا ہے کہ ان کا مسح کیا جائے حتیٰ کہ میں نے دیکھا کہ رسول اللہ صلی اللہ علیہ وسلم ان کے اوپر کی جانب مسح کرتے تھے۔“ وکیع نے کہا کہ «قَدَمَيْنِ» سے مراد ”موزے“ ہیں۔ اس حدیث کو عیسیٰ بن یونس نے اعمش سے ویسے ہی روایت کیا ہے جیسے وکیع نے روایت کیا ہے اور اسے ابوالسوداء نے ابن عبد خیر سے، انہوں نے اپنے والد سے نقل کیا تو کہا کہ ”میں نے سیدنا علی رضی اللہ عنہ کو دیکھا، انہوں نے وضو کیا تو اپنے قدموں کے اوپر کے حصے کو دھویا اور کہا کہ اگر میں نے رسول اللہ صلی اللہ علیہ وسلم کو یہ کرتے نہ دیکھا ہوتا (تو میں یہی سمجھے رہتا کہ ان کا نیچے والا حصہ ہی دھونے کے لائق ہوتا ہے)“ اور آخر تک حدیث اسی طرح بیان کی۔ [سنن ابي داود/كتاب الطهارة/حدیث: 163]

جناب حفص بن غیاث نے اعمش سے یہ روایت بیان کی تو کہا کہ ”اگر دین رائے اور قیاس پر مبنی ہوتا تو قدموں کے تلوے ان کے اوپر والے حصے کی نسبت مسح کے زیادہ حقدار ہوتے، جب کہ نبی کریم صلی اللہ علیہ وسلم نے موزوں کی پشت (اوپر والے حصے) پر مسح کیا ہے۔“ [سنن ابي داود/كتاب الطهارة/حدیث: 164]

سیدنا مغیرہ بن شعبہ رضی اللہ عنہ بیان کرتے ہیں کہ ”میں نے سفر تبوک میں نبی کریم صلی اللہ علیہ وسلم کو وضو کروایا تو آپ صلی اللہ علیہ وسلم نے (اس موقع پر) موزوں کے اوپر اور نیچے مسح کیا۔“ امام ابوداؤد رحمہ اللہ کہتے ہیں کہ ”مجھے یہ بات پہنچی ہے کہ جناب ثور نے یہ حدیث رجاء سے نہیں سنی۔“ [سنن ابي داود/كتاب الطهارة/حدیث: 165]

سیدنا سفیان بن حکم ثقفی یا حکم بن سفیان ثقفی رضی اللہ عنہ کہتے ہیں کہ رسول اللہ صلی اللہ علیہ وسلم جب پیشاب کرتے اور وضو کرتے تو ”(اس کے بعد شرمگاہ والی جگہ پر) چھینٹے مار لیتے۔“ امام ابوداؤد رحمہ اللہ کہتے ہیں کہ ”محدثین کی جماعت نے اس سند میں راوی کا نام ”سفیان بن حکم“ کو راجح قرار دیا ہے جبکہ بعض نے حکم یا ابن حکم ذکر کیا ہے۔“ [سنن ابي داود/كتاب الطهارة/حدیث: 166]

مجاہد رحمہ اللہ..... بنو ثقیف کے ایک شخص سے، وہ اپنے والد سے روایت کرتے ہیں کہ ان کے والد رضی اللہ عنہ کہتے ہیں: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم نے پیشاب کیا اور پھر اپنی شرمگاہ پر چھینٹے مارے۔“ [سنن ابي داود/كتاب الطهارة/حدیث: 167]

مجاہد، حکم یا ابنِ حکم سے، وہ اپنے والد رضی اللہ عنہ سے روایت کرتے ہیں کہ ”نبی کریم صلی اللہ علیہ وسلم نے پیشاب کیا، پھر وضو کیا اور اپنی شرمگاہ پر پانی کے چھینٹے مارے۔“ [سنن ابي داود/كتاب الطهارة/حدیث: 168]

سیدنا عقبہ بن عامر رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کی خدمت میں ہوتے تھے اور اپنے کام خود ہی سرانجام دیتے تھے اور باری باری اونٹ چرایا کرتے تھے۔ میری باری آئی تو سہ پہر کو میں انہیں واپس لایا (اور رسول اللہ صلی اللہ علیہ وسلم کی مجلس میں آ حاضر ہوا) میں نے رسول اللہ صلی اللہ علیہ وسلم کو اس حالت میں پایا کہ آپ صلی اللہ علیہ وسلم لوگوں سے خطاب فرما رہے تھے۔ میں نے آپ صلی اللہ علیہ وسلم کو سنا آپ صلی اللہ علیہ وسلم فرما رہے تھے: ”تم میں سے کوئی وضو کرے اور اچھی طرح (مکمل) وضو کرے، پھر کھڑا ہو کر دو رکعتیں پڑھے، اپنے دل اور چہرے سے نماز ہی میں مگن رہے تو اس نے اپنے لیے جنت واجب کر لی۔“ میں نے کہا: ”بہت خوب! بہت خوب! کس قدر بہترین عمل ہے۔“ تو میرے سامنے سے ایک شخص بولا: ”اے عقبہ! جو اس سے پہلے فرمایا ہے وہ اس سے بھی خوب تر ہے“، میں نے نظر اٹھائی تو وہ عمر بن خطاب رضی اللہ عنہ تھے، میں نے کہا: ”اے ابوحفص! وہ کیا ہے؟“ انہوں نے کہا کہ تمہارے آنے سے پہلے ابھی ابھی یہ ارشاد فرمایا ہے: ”تم میں سے جو شخص وضو کرے اور اچھی طرح (مکمل مسنون) وضو کرے اور وضو کے بعد یہ کلمات کہے: «أَشْهَدُ أَنْ لَا إِلَهَ إِلَّا اللَّهُ وَحْدَهُ لَا شَرِيكَ لَهُ وَأَنَّ مُحَمَّدًا عَبْدُهُ وَرَسُولُهُ» ”میں گواہی دیتا ہوں کہ اللہ کے سوا اور کوئی معبود نہیں، وہ اکیلا ہے، اس کا کوئی ساجھی نہیں، اور میں گواہی دیتا ہوں کہ محمد ( صلی اللہ علیہ وسلم ) اس کے بندے اور رسول ہیں۔“ تو اس کے لیے جنت کے آٹھوں دروازے کھول دیے جاتے ہیں جس میں سے چاہے اس میں داخل ہو جائے۔“ معاویہ بن صالح کہتے ہیں کہ مجھے ربیعہ بن یزید نے ابوادریس سے، انہوں نے عقبہ بن عامر رضی اللہ عنہ سے روایت کیا۔ [سنن ابي داود/كتاب الطهارة/حدیث: 169]

ابوعقیل نے اپنے چچیرے بھائی سے، انہوں نے عقبہ بن عامر جہنی رضی اللہ عنہ سے، انہوں نے نبی کریم صلی اللہ علیہ وسلم سے مذکورہ بالا کی مانند روایت کی ہے اور اس میں اونٹوں کے چرانے کا ذکر نہیں کیا اور ”اچھی طرح وضو کرنے“ کے موقع پر کہا کہ ”پھر وہ (وضو کرنے والا) اپنی نظر آسمان کی طرف اٹھائے (اور یہ دعا پڑھے)“ اور معاویہ بن صالح کی روایت کی مانند بیان کیا۔ [سنن ابي داود/كتاب الطهارة/حدیث: 170]